<< 2 KAWRINTHIAN 2 >>
2Lungsia kongin ning tlawng leh tuh thio lo in ruat zo ing. 2Ziangmanti fangin lung ning sia ruai lengkhaw i lungsia ruaihnak ningte lo a dang aisu in i ang ruai leh tuh i. 3I hleng fangin i ang ruaitu tuh ningte in lung i sia ruai lohnak tuhin he mi thu khiah lai in ning kuat cia ing. Ziangmanti fangin i anghnak khiah ning veksen ai anghnak i tuh ve i ti in ning lakah ning sang rauh ing. 4Ziangmanti fangin thin rimsu le thinritngai thawn le mithli tamngai thawn lai ning kuat ing. Cia khiah lung ning sia ruai tuhai ning kuat i lo ai kaimah ai ning ithnak khiah ning ling thill thaihnak tuhin ning kuat ing. 5Ikhalselai mi pakhat in lungsia ruai lekhaw kai lek lung i sia ruai lo ai a hrekkhat ah ngawn, a tamze in rel lo in, ning veksen in lung ning sia ruai i. 6Ningte a tamsawn in amah ning cawhhnak khiah amah ca ah tawk zo i hang. 7Ciamanin amah khiah sualhlat in thinnuam ruai tu sawn ih. Cialofangin lungsia ze in lo neh mawh ngai. 8Ciamanin ningte in amah khiah it tuh hlen in ning ngen ing. 9Ciamanin ningte in zaizongza ah i thu i ngai i si ti ning cuhnak tuhin cia ca in khai lai ning kuat ing. 10Sual ning hlat sahhnak pa khiah kai in khai sualhlat ve ing. Cen kai in aisu sualhlat sah tuh nai in cia pa suahlat sah lengkhaw ningmah ca in Khrih hmaiah sual hlat ing. 11Cialofangin Satan in hnawm kin can tuh i. Ziangmanti fangin Satan thuruat dan khiah ling lo in um lo i sing.
12Khrih kawspal ca in Troas ah i hleng fangin Bawipa in dawng i hon napui ai 13I unau Titus tawk lo manin thinmuam lo in um ing. Ikhalselai amahte khiah hlum ai ciata in Masidonia ah feh ing. 14Ikhalselai Pathian khiah an ing. Ziangmanti fangin Khrih songin zai hmuahhmuah vumah nehhnak kin pe ai a konkonah khai Zisu linghnak thu khiah kin songin zihmui bangin laarruai i. 15Ziangmanti fangin kinte khiah ohnak ngahtute le a rall tute lakah Pathian hnenah Khrih rimhmui i sing. 16A rallte hnenah kinte khiah thihhnak zihmui i sing. Cen a nungte hnenah nunghnak zihmui i sing. Ciamanin hete khiah aisu in bawn liang ben thill i? 17Ziangmanti fangin Pathian thu khiah amahte miatthnak ai hmangtu mi tamngai bangin i lo i ing. Ikhalselai a ngaingai in le Pathian minung bangin Pathian hmai ah Khrih songin thurel i ing.
<< 2 KAWRINTHIAN 2 >>