<< REVELATION 6 >>
6Tufa niu in tacik pasarih lakai a hmasaber tacik hong hmu ing. Ciafangin a nung ramsa pali songai ramsa pakhat in khuari aw bang in, “Kawi tu.” ti in i ko khiah za ing. 2Ciafangin kai khai sik ai, siphuh ngo pakhat hmu ing. Cia siphuh totu pa in kahpuk pakhat nai i. Amah khiah kumpibawi lukhuk pe ai a ni khai raal neh betbo kongin le raal neh tuh amam in feh i.
3Amah in a panihhnak tacik hong fangin, a panih hnak a nung ramsa in, “Kawi tu.” ti in i ko khiah za ing. 4Ciafangin a dang siphuh pakhat suak ai cia siphuh khiah mailei bangin san i. Minungte in pakhat le pakhat rekdun tuhin cia siphuh totu pa khiah laivum in rem hnak langhnak tuh khuan pe i. Amah khiah vangsau lian ngai pe i. 5Amah in a pathum hnak tacik hong fangin, a pathum hnak a nung ramsa in, “Kawitu.” ti in i rel khiah za ing. Kai khai sik ai siphuh hang pakhat hmu ing. Cia siphuh totu pa in zazu pakhat sin i. 6A nung ramsa palite laiteng in suak bangin aw pakhat khiah, “Sangvut hum pawng khat khiah dainari pakhat, cen kawlkawn pong thum khiah dainari pakhat; ikhalselai thau le capitti zu tu hnawmcan mah ih.” ti in rel za ing.
7Amah in a palihnak tacik hong fangin, a pali hnak a nung ramsa in, “Kawi tu.” ti in i ko khiah za ing. 8Ciafangin kai khai sik ai siphuh raudia pakhat hmu ing. Cia siphuh totu pa hming khiah Thihhnak ti in ko ai Hell in a hnua hlun i. Amahte in vangsau thawn le rian thawn le urhnak le laipua vumai ramsate thawn laipua vum hmunli khan hmunkhat vumah rekhnak tuh power pe i.
9A pangahnak tacik khiah amah in hong fangin, awlta cabuai hnia ah Pathian thu ca le amahte tettikhanhnak man in rekhnak tuarmte rauhla hmu ing. 10Ciafangin cia rauhlate in aw cawm ngai thawn, “A cianghlim le a hman Kumpibawi pa. Kin thi ca in laivum mite khiah zaikom fangin cawh in phuzul tuh i si?” ti in au i. 11Ciafangin amahte khiah pon ngo pakhat ten pe ai amahte bangin rekhnak tuartu tuh amahte hnenumpui le unaute khiah rek hlan lo iang rih tuh in ruai i.
12Amah in a parukhnak tacik hong fangin, kai khai sik ai hlinhlin rauh ngai tlung i. Ni khiah mehmul thawn sahnak vaidip bangin hang ai hlapui khai thi bangin cang i. 13Thaikung khiah khuahu in seu fangin thai kuruhte zuk ruai bang in van ai arsite khai laivum ah tlok i. 14Van khiah laihnah bangin zual berh ai mualtlang hmuah hmuah le tikulh hmuahhmuah khai amahte um hmun in thawn sio i. 15Ciafangin laivum kumpibawite le mi up ate le raalbawite le miliante le mi thahatte le aisu hmuahhmuah sal le bawi ti lo in khu kua songah le mual lakai lung lakah relh ai, 16Mualtlang le lungte hnenah, “Kin vumah tlok in Kumpibawi tauhkheng vum ai totu pa hmai in le Tuufa niu thinrawhnak hmun in kin thup tu. “Ziangmanti fangin amahte thinrawhnak nilian nia khiah hleng zo ai aisu in tuar ben tuh i?” ti in ko i.
<< REVELATION 6 >>