<< LUKE 2 >>
Zisu tehnak thu
2Ciafangin Augustus Sizar hnenin, laivum mi hmuahhmuah khiah pumsiar tuhin thusuak i. 2He khiah a hmasaber pumsiarhnak i ai Kuirinius in Siria ram uk teng in i. 3Ciamanin aisu hmuah khai amahte khua ten ah a hming khum tuhin feh i. 4Joseph khai Galilee ram Nazareth khua in Judea ramai David khua Bethlehem ti ai kohnak khua ah, David phun le tesin fasin i manin, 5A hoi tuh ai thawlthan sa zo naupaai tu Mary thawn hming khum tuh in feh i. 6Amahte khiah ciata ah a um teng fangin, Mary naute cuu khim i. 7A fa hmasaber nau pasal khiah te ai pon in zual ai kawlpaw kuang songah hlim i. Ziangmanti fangin amahte ca tuhin inn songah khaan um lo i.
Tukhalte le vancung mite
8Ciateng in cia khua hiang ai lo ah tukhal te um ai amahte in a tu runte kil i. 9Ciafangin Bawipa Pathian vancung mi khiah amahte hnenah daak ai, Bawipa thangphathnak khiah amahte hiang cingkim in tleu manin amahte khiah lau ngai i. 10Ikhalselai vancung mi in, “Lau mah ih. Ziangmanti fangin mi hmuahhmuah ca thupha ning hlen ing. 11Ziangmanti fangin tunnia ah David khua songah Nun Otu pakhat khiah te zo ai amah khiah Messiah Bawipa i. 12Cen he khiah ning ca ah hnikhnaihhnak i: Ningmah in nausen niu khiah ponin zual in kawlpaw kuang songah hlim in tawk tuh i si.” ti in rel i. 13Ciasawng fangin vancung mi thawn vancung mi tamngai khiah hleng ai, Pathian khiah an in, 14A Saangber Pathian hnenah thangphat hnak um tu seh. Cen laivumah Amah thinkhim ruaitu mite hnenah thinnuamhnak um tu seh.”ti in ti i. 15Ciafangin vancung mite khai tuukhalte hmunin feh ai vancung ah let leh fangin, tukhalte in, “Bethlehem khua ah feh nga singkhaw, Bawipa Pathian ai kin relhnak le a cang zohnak he thute khiah sik nga sing.” ti in sawm tlaang i. 16Ciamanin anite khai a rang ngai in feh ai, Mary le Joseph le nauniu khiah kawlpaw kuang songah a hlim in tawk i. 17Tuukhalte in nausen niu khiah hmu fangin, amahte hnenai relhnak cia nauniu thu khiah ciate khiah rel ai, 18A zatute hmuah in cia tukhalte relhnak thu khiah ngaihsunur ngai i. 19Ikhalselai Mary in he thu hmuahhmuah khiah khawl ai a thin songin ruat i. 20Ciafangin tukhalte khai letleh ai amahte zahnak le amahte hnenah relhnak bangin hmu manin Pathian khiah thangphat ai an i.
Zisu khiah Temple songah kawih i
21Cia nauniu khiah ni riat fangin a vunpar cem cuu khiah khim ai a nuu pum song ai a paai hlanai vancung mi ai pe ciahnak hming in amah khiah Zisu, ti in ko i. 22Moses dan bangin amahte ciangruaihnak cu khiah bo fangin Zisu khai Jerusalem ah Bawipa Pathian pe tuhin kawih i. 23Ziangmanti fangin Bawipa Pathian thukham songah, “Fapa upaber khiah Bawipa Pathian hnenah a cianghlim i, ti ai nganhnak bang in le 24Cen Bawipa thukham bang in, “laileng panih ihlahle khuro panih,” khiah hlu tuh in anite khai kawi i.
25Ciafangin Jerusalem ah Simeon tihnak mi pakhat um ai cia pa khiah mi dikcang le mikung i ai Israel lungsiahnak hnemtu tuh hmu tuh khiah umm ai Ciang Rauhla khiah amah vumah um i. 26Cen Bawipa Khrih hmu hlan ah amah khiah thi tuh lo khiah Ciang Rauhla in relcia i. 27Ciamanin Ciang Rauhla konghoihnak in amah khiah temple songah lut ai a nuu le a paa in nauniu Zisu khiah a dan bangin bawn tuh in temple songah lut fangin, 28Simeon khai nauniu khiah a kaang ah cawi ai Pathian khiah hmuifu bur ai,
29 Bawipa, tunin na hnenum khiah na thu
bang in thinnuam in i feh ruai tu hang.
30 Ziangmanti fangin i mit in,
31 Mi veksen hmai ai na bawnhnak na Nun
Ohnak khiah hmu zo ing.
32 Cia khiah Zental mi hnenah varruaihnak
khuavar le na minung Israel te thangphathnak i.”
ti in ti i.
33A paa le a nuu in Simeon thurelhnak manin ngaihsunur ngai i. 34Simeon in amahte khiah hmuifu bur ai, nauniu nuu Mary hnenah, “He nauniu khiah Israel phun songah mi tampui khupsukhnak le khangsohnak tuh le a catlo in eldun hnak hnikhnaihhnak – 35Nangmah thin rori khiah vangsau thawn na dawt sah tuh i- Mi tampui thinlung songai ruathnak thuthup khiah larruai tu tuh i.”” ti in rel i. 36Ciateng in Asher phun Phanuel fenu Anna tihnak pawofet nupui pakhat um ai amah khiah kum tar ngai i ai a fenu ai panin a pa thawn kum sarih um kawm le 37Kum sawmriat le kum li tluk hmaitong in um i. Cia nu khiah temple songin suak veng lo in sun le zan rongul le sawngen in Pathian khiah bia i. 38Ciateng fangin ani khai suak ai, Pathian khiah an ai Jerusalem ah ohnak sii tute hnenah amah thu khiah rel i.
39Amahte in Bawipa thukham bangin zai hmuahhmuah khiah bawn ben liang fangin, Galilee ram amahte khua Nazareth ah tlung i. 40Naupang pa khai khaang ai fimhnak thawn dim i. Cen Pathian ngaihharhnak khai a vumah dim i.
Nau Zisu khiah temple ah feh i
41A nuu le a paate khiah Jerusalem ah passover khelhnak puai caang in kum siar in feh de i. 42Zisu khiah kum hlainih fangin a dan bangin anite khai cia puai ah feh i. 43A ni khim fangin anite khai tlung leh fangin naupang Zisu khiah Jerusalem ah lo taang i. Ikhalselai a nuu le a paa te in cia khiah lo ling lo ai 44Mikua lakah lo i na tu ti in ruat ai ni khat pumpalah khualsi in feh le ciafangin amahte songkhat le a rualpuite lakah sii pan i. 45Anite in Zisu khiah tawk nawn lo fangin Zisu sii tuhin Jerusalem ah let leh i. 46Ni thum hnua fangin Zisu khiah temple songah sazate relhnak thu ngai kong in le amahte khiah thu zawt kong in to tlang khiah tawk i. 47A zatu hmuah in Zisu fimhnak le a thu sawnhnak lakah ngaihsunur ngai i. 48Amahte in Zisu khiah hmu fangin, ngaihsunur ngai ai, a nuu in, “Fapa, ziangman in hetih in kin dah i si? Na paa thawn thincawl ngai in na sii hnelhno i na ing.” ti in ti fangin, 49Zisu in, “Ziangman ai i sii hnelhno i si? I Pa inn ah um tuh khiah i ling lo i sim?” ti in sawn i. 50Ikhalselai anite in a relhnak khiah ling sah lo i. 51Zisu khai amahte thawn Nazareth ah feh ai amahte thu khiah ngai in um i. Ikhalselai a nuu in he thu hmuahhmuah khiah a thin songah khawl i. 52Zisu khai fimhnak lamah le taksa ruang pum lamah khang ai Pathian le minungte in amah khiah zarto ngai i.