1 Mite rimsu pe tu,
mi riahsia, mi riim te umhmun khua hnenah,
rimsu tu selaw!
2 Amah in BAWIPA aw khiah ngai lo i.
A tiamhnak khai ngai lo i.
Amah in BAWIPA khai rinsan lo i.
A Pathian hnenah khai nong nuam lo i.
3 A song ai bawite khai a huk lianglo chintit te bang i.
A thukhan tu te khai zinglam tian vaal lo
ai saruh ei tu zanlam ai mehleng te bang i.
4 A prawfet te khai hngal ngai i.
Rinsan tlak lo i.
A phungki te in temple khiah riim ruai i.
Amahte in dan upadi khiah hlun lo i.
5 BAWIPA khiah a dikcang i.
Amahte lakah um i.
Amah in a dikcang lo khiah bawn tuh lo i.
Zing siar in a hman niu ai a thukhanhnak khiah lar ruai i.
Amah in khelh awng lo i.
Ikhalselai mi sual te in zakthi ling lo i.
6 “Mi phun hmuahhmuah khiah rek zo ing.
Amahte raalkap innte khai hnawm zo sio i.
Amahte lampui khai zaikhai bek lo in bawn zo ing.
Aisu khai vak nawn lo i.
Amahte khua khai hnawm sek i.
Aisu in khai hluh nawn lo i.
7 Kaimah in, ‘Ning te in i kih tuh hlaihlawr i si.
I tiamhnak khiah ngai tuh i si.’ ti in ti ing.
Ciafangin a umhmun khiah hnawmcan tuh lo i.
I cawhkuan khiah a vumah hleng tuh napui lo i.
Ikhalselai amahte in khuahma in tho ai sualhnak lo lek bawn i.
8 Ciamanin kaimah in hnawmcan tuhin
i tho hlan lo i iang rih tu.
Mi phun hmuahhmuah le kumpibawi ram
hmuahhmuah khiah hmunkhat in khawm tuh ing.
Amahte vumah a rauh ngai ai i thinraw khiah burh tuh ing.
I iksikhnak mai thawn laivum pumpalah khiah kang tuh i.
9 Ciafangin minung te ponka khiah ciang ruai tuh ing.
Ciafangin amahte in BAWIPA hming khiah
ko tuh ai thinkhat in BAWIPA naper sah tuh i.
10 Ethiopia ai runti kaan ai umtu i biatu
a piak sio i minungte in a hlu i kawih sah tuh i.
11 Cia nia ah ningte in kaimah lakah
ning bawn khelhhnak manin zak ning thi tuh lo i.
Ziangmanti fangin ning lakai a hngal tu te
khiah ning lang sah tuh ing.
Ciafangin a cianghlim i mual vumah
Hngal tuh nawn lo i si.
12 Na songah mi thinniam le mi thinnem te dah tuh ing.
Ciate in BAWIPA hming khiah rinsan tuh i.
13 A taanghnak Israel mite in a dikcang lo na per tuh lo i.
Thudon khai rel tuh lo i.
Amahte kaa thawn mi khai zawl tuh lo i.
Amahte in a tu run khiah khal in it tuh ai
Aisu in khai amahte khiah lau ruai tuh lo i.” ti in BAWIPA in rel i.
14 Aw Zion fenu, lasa tu!
Aw Israel, au tu!
Aw Jerusalem fenu,
Ang le thinnuam rauh in um tu.
15 BAWIPA in na cawhkuan khiah na lang sah zo i.
Na raalte khiah na hnawt sah zo i.
Israel mite Kumpibawi, BAWIPA khiah ning lakah um i.
Hnophnak khiah hmu tuh nawn lo i hang i si.
16 Cia nia ah Jerusalem hnenah,
“Lau mah. Zion, na kut khiah thanau ruai mah.
17 BAWIPA na Pathian khiah na songah um i.
BAWIPA Pathian in na o tuh i.
Nangmah lakah a hiam ngai in ang tuh i.
A ithnak in thin na nuam ruai tuh i.
Nangmah lakah a hiam ngai in lasa tuh i.” ti in rel tuh i.
18 “Ning puai ca ai ning lungsiahnak te khiah
ning hnenin ning lang sah tuh ing.
Ziangmanti fangin cia khiah ning ca ah
thilrit le zauhsuam hnak cang i.
19 Cia cu ah,
Rimsu na pe tu te khiah cawh tuh ing.
Tha nai lo te khiah o tuh ing.
A hnawthnak mite khiah khawm leh tuh ing.
Amahte khiah zakthi ai dah hmun caang ah
amahte khiah mi ai cuanhnak le
hming thang thai in bawn tuh ing.
20 Ciafangin ning tlun leh tuh ing.
Ciafangin ning khawm leh tuh ing.
Ziangmanti fangin, raal te ai pom in
thawngtla mi, ning minungte khiah ning
hmai in kaimah in tlun leh fangin,
Laivum mi veksen lakah ningte khiah
hming thang in le mi ai cuanhnak
ning pe tuh ing.” ti in BAWIPA in rel i.
(1/23/201712:57PM)