1 Ningmahte khiah hmunkhat in khawm tuu-ih.
Hmunkhat in khawm tuu-ih, aw zakthikul mi phun te.
2 A thu suah hlanah,
Cia nia khiah vaikung bang in bo hlanah,
Ning vumah BAWIPA thinraw rauh hnak hleng hlanah,
Ning vumah BAWIPA thinrawhnak nia hleng hlanah,
Hmunkhat in khawm tuu-ih.
3 Amah ruaihnak bang ai bawn tu,
Laivum ai thinniam mite,
BAWIPA khiah sii tuu-ih.
Dikcanghnak khiah sii tuu-ih.
Thinniamhnak khiah sii tuu-ih.
Ziangmanti fangin BAWIPA nia khua ah
lo ning thup thai pang i.
4 Ziangmanti fangin Kaza khiah zaam tuh lio i.
Ashkelon khiah zaikhai bek lo in um tuh i.
Ashdot khiah sunlai var ah amahte in hnawt tuh i.
Ekron khiah phai tuh lio i.
5 Tipui tlangtluan ai um tu, Cheret mite,
Rim ning su tu seh!
BAWIPA thu khiah ning ca ah pha lo i,
aw Filistin ram Khanaan.
BAWIPA in, “Ning rek tuh sek ing.
Ciamanin khua songah aisu khai um tuh lo i.”
ti in ning ti i.
6 Tipui tlangtluan khiah hampa vuandum cang tuh i.
Ciata ah tukhal te buk le tu te khum hmun seen um tuh i.
7 Ti tlangtluan khiah a taanghnak Judah fate ca i tuh i.
Ciata ah amahte in a tu te khiah khal tuh i.
Ashkelon te inn ah amahte khiah zan fangin cam tuh i.
Ziangmanti fangin amahte Pathian
BAWIPA in amahte khiah kilkhawl tuh ai
Raalte ai pom ai thawngtla mite khiah tlun leh tuh i.
8 “Moab te in le Ammon mite in i minung te
zauhsuamhnak le sawihnak khiah zazo ing.
I minungte ram khiah tawng tuh in
a hngal in tawngcai hnelhno i.
9 Ciamanin i nung song hmuah in,”
Vancung mite BAWIPA, Israel mite Pathian in ti i,
“Moab khiah Sodom bang in cang tuh rori i.
Ammon mite khiah Kawmawrrah mite bang tuh i.
Hampa le ci kuate thawn khuk tuh ai,
A catlo in zaikhai bek lo in um tuh i.
A taanghnak i minungte in amahte khiah rok sah tuh i.
A taanghnak i minungte in amahte khiah ping sah tuh i.”
10 Amahte in vancung mite BAWIPA
minungte khiah zauhsuam ai a hngal in tawngcai manin,
Amahte hngal hnak manin amahte in he khiah co tuh i.
11 Amahte BAWIPA khiah kih tuh rauh i.
Ziangmanti fangin BAWIPA in laivum ai
pathian te khiah a veksen in hnawmcan tuh sek i.
Ciafangin mi phun hmuahhmuah in
amahte umhmun ten in BAWIPA khiah bia tuh i.
12 Ning Ethiopia te khai,
I vangsau thawn ning rek tuh ing.”
13 Ciafangin amah in a kut khiah saklam ah
kawk tuhai Assiria khiah hnawmcan tuh i.
Nineveh khiah zaikhai bek lo in dah tuh ai,
Nelrawn bang in ro ruai tuh i.
14 Kawlpaw te khai amahte lakah bual tuhai,
Ramsa phun caang khai ciata ah kual tuh i.
Simbu te khai a khuam vumah to tuh i.
Amahte in padinpauh ah lasa tuh i.
Donsuk ah zaikhai bek tuh lo i.
Ziangmanti fangin lawithing luangkiang te
khai Amah in lar ruai tuh i.
15 He khua khiah a hiam ngai le a muang ngai khua i.
A thin song in,
“Kaimah lo a dang khua um lo i.”ti in ruat i.
Akontih ai amah khiah zaikhai bek lo in cang ai,
Ramsa te bual hmun ah cang lio i!
Amah khel tu hmuah in a kut tum in amah khiah im tuh i.