Ruth 3

<< RUTH 3 >>

1Ciafangin a nuu Naomi in Ruth hnenah, “I fenu, nangmah khiah na sik tu tuhin innkua na sii sah pha lo im? 2A nupang hnenumte thawn ai a na naper sahhnak Boaz khiah kin unau i ta lo im?  Tunzan ah a rongcil hmun ah kawlkawnte khap tuh i peu i lo im?  3Ciamanin takhlu tulai zihmui pawh tu. A pha ber thilthuam khiah sil in a rongcil hmunah feh tu. Amah in rongei le ding ben hlan lo amah in na ling ma seh. 4Amah khiah taal fangin  a taal hmun khiah cul tulai nang khai ciata ah lut tulai a ke khiah hong sah tulai ciata ah taal tu. Ciafangin amah in na bawn tuhhnak khiah na rel tuh i.” ti in rel i. 5Ciafangin Ruth in Naomi hnenah, “Na relhnak hmuah a vekin bawn tuh ing.” ti in sawn i.

6Ciamanin ani khai rongcil hmunah kawi ai a nuu ai ruaihnak bangin a vekin bawn i. 7Boaz khai rong ei ben le zukham fangin, a thin khiah ang ai, ani khai rongmu pumhmun hiang ah taal i. Ruth khai pau lo niu in kawi ai a ke khiah hong sah ai ani khai taal i.

8Seulai fangin Boaz khai phawk sut ai, thaal fangin a ke ah nupang pakhat zau khiah hmu i. 9Ciafangin amah in, “Aisu i si?” ti in zawt i. Ciafangin cia nuu in, “Na hnenum nupang Ruth ing. Na pon par in na hnenum nuu khiah i khuk tu. Ziangmanti fangin nangmah khiah unau nong ber i si.” ti in ti i. 10Ciafangin Boaz in, “I fenu, Bawipa in hmuifu na bur tu seh. Ziangmanti fangin he ngaihharhnak na bawnhnak khiah a hmasa ai na bawnhnak tahin lian sawn i. Milian le mifarah tlangvalte khiah hnawh lo i si. 11I fenu, tunin lau mah. Na ruaihnak khiah a veksenin bawn tuh ing. Ziangmanti fangin khuasen in nangmah khiah mi dikcang ti khiah na ling i. 12Kaimah khiah na unau pui i peu ing. Ikhalselai kai hnak in nong sawn unau um i lai. 13Tun zanah heta ah um tu hlen. Thangha ah amah in a unau tavuan lang in na vumah bawn lekhaw, pha i. Bawn tu seh. Ikhalselai  amah in na vumah a tavuan bawn nuam hlahlekhaw, Bawipa nung song hmuah in, kaimah in tavuan lang tuh ing. Zingniu tian it tu hlen.” ti in ti i.

14Ciamanin ani khai a ke ah zing khuavar tian it ai khuahma niu aisu khai hmel lin hlanah tho i. Ciafangin Boaz in, “Rongcil hmunah nupang kawi i ti khiah aisu khai ling ruai malaw.” ti in rel i. 15Cen amah in, “Na ponniu khai kawih tulai i dong tu.” ti in khai ti i. Ruth in dong fangin, amah in kawlkawn ephah paruk khiah tek ai cia nuu vumah phurh i. Ciafangin ani khai khua songah tlung i. 16Ciamanin a nuu  hnenah hleng fangin, a nuu in, “I fenu i aw sim?” ti in zawt i. Ciafangin cia nuu in Boaz  in a hnenah bawnhnak hmuah khiah a vek in rel sio i. 17Ciafangin amah in, “He kawlkawn ephah paruk i pe i. Ziangmanti fangin amah in, ‘Na nuu hnenah kut lo lek in tlung mah.’ti in i ti i.” ti in rel i. 18Ciafangin Naomi in, “I fenu, he thu khiah akontih in cang tuh i ti na ling hlan hmuah to tu meng. Ziangmanti fangin tunnia ah he thu khiah bawn ben hlanlo amah khiah com tuh lo i.”ti in rel i.

<< RUTH 3 >>

Recent Posts