Ruth 2

<< RUTH 2 >>

1Naomi in a pa unau Elimelek mite Boaz ti hnak mi pakhat nai ai amah khiah milian ngai i. 2Ciafangin Moab mi Ruth in Naomi hnenah, “Lo pakhat ah feh ngangkhaw, ning i hio tu pa ai vaal hnak rongmu te khiah khul ngang.” ti in ti i. Ciafangin Naomi in amah hnenah, “Feh tu, i fenu.” ti in ti i. 3Ciafangin Ruth khai feh ai rongkhawmtute hnua in rongmu te khiah khul i. Ciafangin Elimelek mite Boaz lo ah Ruth khai lo hleng ngelcel i.

4Ciafangin Boaz khai Bethlehem in hleng ai rongkhawmtute hnenah, “Bawipa khiah ning hnenah um tu seh!”ti in ti i. Rongkhawmtute in, “Bawipa in hmuifu na bur tu seh!” ti in sawn i. 5Ciafangin Boaz in rongkhawmtute uktu a hnenum hnenah, “He fenu niu tu aisu ai i?” ti in zawt i. 6Ciamanin rongkhawmtute uktu cia hnenum pa in, “Amah khiah Moab ramin Naomi thawn kawi tu Moab fenu niu i. 7Cen cia nuu in, ‘Rongkhawmtute hnua in fangtel lakah rongmu khul ngang.’ti in ti i. Ciamanin zing ai panin tuntian per ai hlam songah campuikhat lek com i.”ti in sawn i.

8Ciafangin Boaz in Ruth hnenah, “I fenu, i ngai tu. Mi dang lo ah fehin rongmu khul mah. Heta in khai tlan mah. I hnenum nupangte thawn nongniu in um tu. 9Amahte khawm hmun lo lai khiah sik tulai amahte khiah hlun tu. I hnenum tlangvalte in na tok tuh lo in kham zo i lo ing? Cen ti na haal fangin tibel ah kawi tulai, tlangvalte ai cawihnak ti ding tu.” ti in rel i. 10Ciafangin ani khai a hmai laipua ah bok ai, amah hnenah, “Ziangman kai bang ram dang mi khiah nang in ngaih i har ai i pon zuam i si?”ti in sawn i. 11Ciafangin Boaz in cia nuu khiah, “Nangmah in na pa thi khelleh ai Naomi hnenah na bawnhnak le na paa le na nuu le na tehmun ram khiah hlum ai na ling awng lohnak mite hnenah kawihnak thu khiah a khim niu in i than zo i. 12Bawipa in na perhnak khiah na tham leh tu seh. A ko hnia ah na buanhmun Israel Bawipa Pathian in a khimniu in lehsawng na pe tu seh.” ti in sawn i. 13Ciafangin amahin, “I bawipa, na hmai ah na zartohnak ngah ing. Kaimah khiah na hnenum nupang a dang te bang i napui lo ai na hnenum kaimah hnenah ponnem niu in i pon manin thin i nuam ruai i si.” ti in ti i.

14Sunsiah ei cu fangin Boaz in amah hnenah, “Heta ah kawi tulai, rong ei tu. Na pawnghmuk khiah capitti thur songah nim tu.” ti in ruai i. Ciamanin ani khai rongkhawmtute hiang ah to ai, Boaz in a theuhnak rongmu khiah pe i. Ani khai ei ai rongkham i. A eih val khai khawi i. 15Ruth khai rongmu khul tuhin tho fangin, Boaz in a tlangvalte khiah, “Fangtel lakah khai rongmu khul tu selai hau mah ih. 16Cen amah ca in rongmu khai  a tel songin theh ruai tuu-ih. Amah in khul tuhin zam tu i  lai, hau mah ih.” ti in thu pe i.

17Ciamanin ani khai zanlam tian rongmu khul ai a khulhnak rong khiah cil fangin kawlkawn ephah pakhat dim khul ngah i. 18Ciafangin ani khai a rong khiah phur ai khua songah tlung le Naomi in a khulhnak rong khiah hmu sah i. Cen a rongkham fangin a eihval a khawlhnak rong khai Naomi pe i. 19Ciafangin a nuu in amah hnenah, “Tunnia ah a konah rongmu khul i si? A konah per i si? Ning na hio tu khiah hmuifu tu seh.” ti in zawt i. Ciamanin a nuu hnenah a naper hmun khiah rel ai, “Tunnia ah Boaz tihnak pa thawn per ing.” ti in rel i. 20Ciafangin Noami in cia nuu hnenah, “A thi le a nungte khiah zam lo ai a ngaihharhnak pe tu pa khiah Bawipa in hmuifu bur tu seh.” ti in ti i. Ciafangin Noami in, “Cia paa khiah kin unau i. ”ti in rel i. 21Ciafangin Moab nuu Ruth in, “Cen amah in, ‘Amahte in i rong khawm ben hlanlo amahte thawn um tu ngio.’tin khai i ti i.” ti in rel i. 22Ciafangin Naomi in Ruth hnenah, “I fenu, amah nupangte thawn naper khat khiah pha i. Ziangmanti fangin mi dang lo ah mi dangte in na tawk tuh pha lo i.” ti in rel i. 23Ciamanin Ruth khai kawlkawn le sangvut rongkhawm ben hlan lo  rongmu khul tuhin Boaz nupang hnenum te nong ah um ai Naomi innah um i.

<< RUTH 2 >>

Recent Posts