1 I aw thawn Pathian hnenah kap ing.
Pathian hnenah kap ing.
Ciafangin amah in i ngaai sah i.
2 Rim i su nia ah BAWIPA khiah sii ing.
Com tau lo in i kut khiah amah hnenah san ing.
I rauhla in thinnuam ruai tuhin a zawl hlelhlo daih lo i.
3 Aw Pathian, nangmah khiah na hih ai,
thin rim i su i.
Ngaisung kong in um ai, i rauhla khiah thanau ngai i. Selah
4 I mit te khiah i hong sah ngio i si
Thin i hnaihnok ze manin, pong thill tau lo ing.
5 Hlan lai ai nikhua te khiah ruat de ing.
Hlan lai ai kum te khai ngaisung de ing.
6 Zanlai in i la te khiah hih de ing.
I thin songin ngaisung hnelhno ing.
I rauhla in a kungniu in sii hnelhno i.
7 BAWIPA in kumzangza in kin lon ngai im?
Zaikom in khai kin daih tuh nawn lo i hang im?
8 A ngaihharhnak khiah kumzangza in bo lio i hang im?
A thukhamhnak khiah a kumkhua in pilh i hang im?
9 Pathian in ngaihhar dan hai lio i hang im?
A raw manin mite khiah ngaihhar awl lio i hang im? Selah
10 Ciafangin kaimah in, “Thin i ur i.
Ikhalselai kum siar ai A Sangber Pa huthawm khiah hih tuh ing.”
ti in ti ing.
11 BAWIPA bawnhnak khiah hih tuh ing.
Thungai in hlan lai ai na ngaihsun urkul khiah hih tuh ing.
12 Na bawnhnak hmuahhmuah ngaisung in ruat tuh ing.
Na na perhnak te khiah rel tuh ing.
13 Na lampui khiah a cianghlim i.
Kin Pathian bangin aisu Pathian khiah lian pa?
14 Nangmah khiah ngaihsun urkul bawn tu Pathian i si.
Na tha khiah minungte lakah hmuh zo i si.
15 Na huthawm thawn na minungte Zakuk le
Joseph fate khiah luangtlan i si. Selah
16 Aw Pathian, ti te in na hmu i.
Ti te in na hmu ai anite khai lau i.
Ti thuk te khai thing biakbo i.
17 Mairo te in ruahsi ruai i.
Van vumin khuari i.
Na conkiangte khai tleu zutzo i.
18 Khuahu songin na khuari aw khiah pau i.
Van tlingtlaleuh in laivum khiah khuavar i.
Laipua khiah thingbiakbo ai hlin i.
19 Na lampui khiah tipui songin feh i.
Na khung khiah ti songin feh i.
Na keniah tu hmu thill lo i.
20 Moses le Aaron kut in na minungte khiah konghoi i si.