Proverbs 8

<<  PROVERBS 8  >>

1 Fimhnak khiah sumpua in aai lo im?
Ling thiamhnak in a aw thawn au lo im?

2  Amah khiah lampui tawkdun hmun
hiang ai mual saang vumah ding i.

3  Khua lut hmun kawldawngkham pua le
Inn dawngkham pua ah amah in au i.

4  Amah in, “Aw minungte, ning ko ing.
I aw khiah mi fapate, ning ca ai ning ko ing.

5  Aw ning mivoite, fimhnak ling tuu-ih.
Ning mivoite, ling thiamhnak thinlung nai tuu-ih.

Ngai tuu-ih. Thu pha rauh rel tuh ing.
I kaa songin thu hman suak tuh i.

7  Ziangmanti fangin i kaa in thu hman rel tuh ing.
Sualhnak khiah i kaa in ningdul i.

8  I kaa ai pon khiah a veksen in hman i.
A konkaw le a sual um bul lo i.

9  I pon khiah a lingtute hnenah a veksen in ciang sio i.
Fimhnak tawk tu hnenah, hman liang i.

10 I thucukhnak khiah tangka tah in lang tu sawn ih.
Fimhnak khiah a phaber sui tahin saang tu sawn ih.

11 Ziangmanti fangin fimhnak khiah lungto
mankhung tahin pha sawn i.
Fimhnak khiah daihhnak caang thilri
veksen thawn santeh tuh um bul lo i.

12 Fimhnak, kaimah khiah thiamhnak thawn um
ai linghnak le thia thiamhnak khai tawk ing.

13 A pha lo hua fangin Bawipa kih khiah larr i.
Hngal le mi zainam lo le a pha lo lampui le
pon sia pong thai kaa khiah hua ing.

14 Kaimah in thutiam thiam ing.
A pha fimhnak nai ing.
Ling thiamhnak nai ing.
Tha khai nai ing.

15 Kaimah manin kumpibawite in mi uk ben i.
Kaimah manin mi-uktute in thukhan thiam i.
Kaimah manin mi bawite le mi upate le
laivum ah thukhantute veksenin uk i.

17 I it tute khiah it thun ing.
A kungniu ai i sii tute in i tawk tuh i.

18 I hnenah thilri tamngai le upathnak le
a bo nia um lo lianhnak le dikcanghnak um i.

19 I thai khiah sui hnak pha sawn i.
A phaber sui hnak in pha sawn i.

20 A dikcang lampui ah vak ing.
A hman lampui lai in vak ing.

21 Ciamanin i it tute in milian cang tuh ai,
amahte tangka khawi hmun khiah dim ruai tuh ing.

22 Bawipa in hlanlai ai a bawnhnak
veksen hlan ah i bawn awng i.

23 He hlan kon zong khuaha in i bawn awng zo i.
Laivum um hlan in a ngom ai panin i bawn awng zo i.

24 Ti thuk ngai le cirhti songin ti tamngai suak hlanah le

25 Mualte khiah um hlan ah le
Tlangte bawn hlanah, i bawn zo i.

26 Laivum le lo te bawn hlanah,
Laivut a hmasaber bawn hlanah,
kaimah khiah i bawnzo i.

27 Amah in vancung khiah bawn fangin,
kaimah khai ciata ah um zo ing.
Amah in ti thuk vumai a pum in riin fangin,

28 Van vumah mairote dah fangin,
A thuk ngai cirhti te kho ruai fangin,

29 Tipuite in a thu khiah el tuh lo in,
titlang bawt sah fangin,
Amah in laivum ham khiah sa fangin,

30 Kaimah khiah a hiang ah lettama bang in um ing.
Kaimah khiah ni siar in amah ang ruai tu ing.
Cen a hmai ah i ang tio i.

31 Amah laivum mite lakah le minung
fate lakah khai ang ngai in um tio ing.

32 Ciamanin, i fate, i ngai tuu-ih.
Ziangmanti fangin i thu a hlun tute khiah hmuifu i.

33 Tiamhnak khiah ngai tu i lai fim tuu-ih.
Cen hmuhheh mah ih.

34 I thu khiah ngai ai, i kawldawng ah
nisiar in hlir tu le i dawngkham khuam
ah haak tu khiah hmuifu i.

35 Ziangmanti fangin i tawk tu in nunghnak tawk i.
Cen Bawipa in khai zarto i.

36 Ikhalselai i lakah sualtu in amah veve ur ruai i.
I hua tu hmuah in thihhnak it i.

<<  PROVERBS 8  >>