Number 11

<<  NUMBERS 11  >>

1Israel mite in aitam in cam fangin BAWIPA khai thintok i. Ziangmanti fangin Bawipa in amahte camhnak khiah za sah ai thinraw i. Ciamanin Bawipa mei khiah amahte lakah suak ai camp hiangai mite hrekkhat khiah kang berh i. 2Ciafangin mite in Moses hnenah kap le Moses in BAWIPA hnenah sawngen fangin  mei khai hmit berh i. 3Ciamanin cia hmun khiah Taberah ti in ko i. Ziangmanti fangin ciata ah BAWIPA mei khiah amahte khiah kang i.

4Ciafangin Israel mite songai Israel mi phun lo mi phun dangte khai rong rawp rauh manin Israel mite khai kap leh thio ai, “Aisu in ei tuh sa kin pe tuh i? 5Izip ramah a man um lo in ngasate le zil le phazeti le khahsuat le lasun te ei de khiah hih i ing. 6Tun tu he manna lek ei tuh um manin kin ruang khai kin rom sek i hang.”ti in kap leh thio i. 7Manna khiah koriander mu bang i ai a pianzia khiah dellium bang i. 8Anite in cia manna khiah khul ai lungrial thawn rial ai ihlahle sum ah su ai ukang songah sangper bangin em i. Cen thau thawn emhnak lawti bangin urr i. 9Camp hiang ah naidawh tla fangin manna khai nai vumah tla ve i.

10Ciafangin mite khiah amahte innkua tlang in amahte buk dawngkham ah kap khiah Moses in za ai BAWIPA khai thinraw rauh ai Moses khai lungkhim bul lo i. 11Ciamanin Moses in BAWIPA hnenah, “Zaimanin na hnenum khiah rim i si? Zaimanin na ngaihharhnak khiah ngah lo ing. Ciamanin he mite thilrit khiah a vekin i phurh i sim? 12He mite heh a vensenin i song ai suakhnak im? A  pupaate hnenah na khamhnak ramah, ‘naulen tu in hnawi ding lai nausen khiah a kang ah cawi bangin cawi tu,’ti in i rel tu hete heh i song ai suakhnak mite im? 13A konin he mite veksen ei tuhin sa ngah tuh ing? Ziangmanti fangin amahte in i hnenah, ‘Ei tuh sa kin pe tu.’ti in kap i. 14He mite thilri khiah kaimah lek in phur ben lo ing. Ziangmanti fangin a rit ze i. 15Hetih bangin i rim lesikhaw, tunin heta ah i rek tu lio -ngaih i har lesikhaw i rimsukhnak khiah i hmu ruai mah.”ti in rel i.

16Ciamanin BAWIPA in Moses hnenah, “Na linghnak mite lakai a upa le a bawite Israel mi upa pasal sawm sarih khiah i hnenah khawm ruai tu. Nangmah thawn ding tlang tuhin tawkdunhmun tabernacle ah kawih tu. 17Ciafangin tolh ngangkhaw thu na rel tuh ing. Na vumai Rauhla khiah lang ngangkhaw amahte vumah khai dah tuh ing. Ciafangin  mite thilrit khiah  nangmah lekin phur loin anite in khai na phur bawm tuh i. 18Ciafangin mite hnenah, ‘Thangha ah a cianghlim in um tu i lai sa ei ngah tuh i si. Ziangmanti fangin ningte in BAWIPA zak in, “Aisu in ei tuhin sa kin pe tuh i? Izip ah kin hiam sawn i.”ti in ti i si. Cafangin Bawipa in sa ning pe tuh i. 19Ni khat le ni nih le ni nga le ni ha le ni kul lek ei tuh lo ai  20hla khat song ning hnar songin suak in niing ning tianin sa ei tuh i si. Ziangmanti fangin ning lakai umtu BAWIPA khiah zauhsuam ai amah hmai ah, “Ziangmanin Izip ram in suak zuarzo i pa sing?”ti in kap i si.’ti rel tu.”ti in ruai i. 21Ciafangin Moses in, “Kaimah thawn umtu mite pasal ciang  thawng zaruk  um i. Ikhalselai nang in, ‘Hla khat song ei tuhin sa pe tuh ing.’ti i si. 22Amahte ei khop tuhin kawlpaw le tute ro tuh im? Ihlahle amahte ei khop tuh in tipui songai nga hmuahhmuah khiah hmun khat in khawm tuh im?” ti in ti i. 23Ciafangin BAWIPA in Moses hnenah, “Bawipa banpui khiah comniu im? I relhnak bang in khim tuh le khim tuh lo khiah hmu tuh i hang si.”ti in ti i.

24Ciamanin Moses khai suak ai BAWIPA relhnak thu khiah amahte hnenah rel ai mi lakai upate sawm sarih khiah khawm ai tabernacle cingkim ah dah i.  25Cia fangin BAWIPA khai mairo songin tolh ai Moses hnenah thurel ai Moses vumin a Ciang Rauhla khiah lang ai cia mi upa sawm sarih vumah dah le anite in prawfet bangin thurel awng napui lo ai, prawfet bangin thurel pan i.

26Ikhalselai pasal panih te tu camp songah um hlen i. Pakhat ta hming khiah Eldad i ai a khatta hming khiah Medad i. Amahte vumah Cianmg Rauhla khai um ve i. Amahte khiah a rilhnak i napui ve ai anite in tabernacle ah kawi lo i. Ikhalselai camp songah prawfet thu rel ve i. 26Cia fangin tlangval pakhat khai dawp ai Moses hnenah, Eldad le Medad in camp songah prawfet thu rel i.” ti in than i. 28Ciamanin Moses bawmtu a fai ber Nun fapa  Joshua in Moses hnenah, “I bawipa , Moses, amahte khiah kham tu.”ti in ruai i. 29Ciafangin Moses in a hnenah, “I ca in amahte khiah iksik i sim?  Aw, BAWIPA minung veksen khiah prawfet i liang selai, cen amahte vumah Bawipa in a Ciang Rauhla khiah lo dah selai i daih napui i.”ti  in sawn i. 30Ciafangin Moses khai Israel upate kawmin camp songah let leh i.

31Ciafangin BAWIPA hnenin hli khiah zuang ai tipui hmunlam in seklah khiah camp hiang ah hleng bial i. Camp hiang cingkim ni khat tha hla sau le dong nih thuk in seklah khiah tla bial i. 32Ciafangin anite khai suni vui le zan khuavar le a thangha sun nivui in seklah khiah khul ai camp hiangah ah pho i. (A tlawm ber khul tute in homer sawmkhat dim khul i. 33Ikhalselai cia seklah sa khiah amahte in kial manhlan a kam kualakah um lai in BAWIPA rawhnak khiah mite vumah hleng ai BAWIPA in cia mite khiah urhnak lianpui thawn ur ruai i. 34Ciamanin cia hmun khiah Kibroth Hattaavah ti in ko i. Ziangmanti fangin ciata ah amahte in rong khiah rawp tute khiah vui i. 35Kibroth Hattaavah in anite khai Hazeroth ah thawn ai  Hazeroth ah cam i.

<<  NUMBERS 11  >>