Nahum 3

<<  NAHUM 3  >>

1  Thi thawn dim khuapui khiah rimsu tu selaw!
Cia khua khiah thudon le ruko thawn dim i.
A rekhnak te khiah tlan awng lo i.

2  Rihual thawn vithnak aw le,
Leng leu hnak pau le
Siphuh te dawphnak aw le
Siphuh thirleng leuhnak pau hmun!

3  Siphuhto tu te in a tleu vangsau le
Faipui tleu zutzo thawn tawng i.
Mi tam pui khiah thi ai,
A thi te pum khiah a siar zo lo ai,
Mite khiah mithi pum vumah bah liang lo i.

4  Cia khiah mi zawl thai phatemah in
phatemah tam ngai bawn manin i.
Cia nuu khiah a dawi nai nuu i ai,
Phatemah thawn mi phun tam ngai khiah
mi cengfa cang ruai i.
Mi tam ngai khiah a dawi thawn mi sal cang ruai i.

5  Vancung mite BAWIPA in,
“Nangmah khiah na tawng tuh ing.
Na hnik khiah na hmai ah na zar sah tuh ing.
Mi phun tam ngai hmai ah kawngkolh in na dah tuh ing.
Kumpibawi tam ngai hmai ah zak na thi ruai tuh ing.

6  Ningdulkul hnawmborh khiah na vumah lon tuh ing.
Na riim ruai tuh ing.
Mite in sik tuh in na dah tuh ing.

7  Nangmah na sik tute in,
‘Nineveh khiah hnawm lio i.
Aisu in kah tuh i?’ ti in rel kongin
Amahte khiah tlan tuh i.
A thinnuam ruai tu tuh in akonah sii tuh ing?” ti in rel i.

8  Nile Runpui vum ai Thebes tah in na pha sawn im?
Thebes khiah a hiangcim ah ti um i.
Cia runpui khiah a khakber tu i.
Runti in amah khiah seen bang in kulh i.

9  Ethiopia le Izip ram khiah a bo nia um lo in a tha pe tu i.
Put le Lubim khiah na bawmtu te i.

10 Ikhalselai amah khiah phur teu ai
Amahte khiah raalte in pom ai thawnghla i.
Cen a fa naupangte khai lampui caang ah nuamnung in sat sah i.
A bawi te khiah me hlah in lang sah i.
A mi upate khiah a veksenin thirri thawn pen i.

11 Nangmah khiah zu na kham tuh ve i.
Relh tuh hnelhno i si.
Raalte hmunin relhhmun tuh buanhmun sii tuh i si.

12 Na raalkapte inn khai thaihmin thawn dim thaikung te bang i.
Thaikung khiah hlin lekhaw,
A thai te khiah a ei tu pa ka songah tlok tuh i.

13 Na raalkapte khiah sik tu.
A veksenin nupang ciang i.
Na ram songai kawldawngkham khai
na raalte hmai ah hong liang in um i.
Mai in amahte khuam khiah kang sek i.

14 Raal in ning sim manin ti cawi tuu-ih.
Ning buanhmun innte khiah kho ruai tuu-ih.
Laisawr khiah cop tuu-ih.
Bilat mi khiah rawih tuu-ih.
Ukkhe khoi te khiah rem tuu-ih.

15 Ciata ah mai in na kang tuh i.
Vangsau thawn na rek tuh i.
Khokhuak bang in na ei tuh i.
Khokhuak bang in zaai tuu-ih

16 Ning dawr bawntute khiah
van ai arsi tah in tam sawn i.
Ikhalselai khokhuak bangin na ram khiah
ei sio ben fangin zuang sio i.

17 Na raalviltu te khiah khokhuak te bang i.
Na bawite khiah khokhuak lian pui te bang i.
Cia khokhuak te khiah khuasik nia ah
bangkhang vumah com i.
Ikhalselai ni suak fangin anite khai zuang
berh ai, a zuanghmun khiah aisu in khai ling sah lo i.

18 Aw Assiria kumpibawipa,
Na tukhal te in mitmu i.
Na bawite khiah laivut lakah mitmu i.
Na minungte khiah mual vum caang ah
piak ai aisu in khai sii in khawm lo i.

19 Zai in khai na hmaihma khiah lawm ruai thill tuh lo i.
Na hmaihma khiah a rauh ze i.
Na thu za tu hmuah in, na im in papabeng tuh i.
Ziangmanti fangin na huatsuak hnak tuar lo tu aisu um i?

<<  NAHUM 3  >>

Recent Posts