1Ciafangin BAWIPA in Moses hnenah, 2 “Israel mite hnenah hetih bangin rel tu: ‘Mi pakhat in BAWIPA thukham lakah sual ngah te in bawn dan lo napui in bawn pang lekhaw, 3cen a rilhnak phungki pa in sual in Israel mite mawh ruai lekhaw, a sualhnak ca in a maa nai lo kawlpaw cang pakhat khiah Bawipa hnenah hlu tu seh. 4Cia kawlpaw cang khiah tawkdunhmun tabernacle dawngkham ah Bawipa hmai ah kawih tu selai, kawlpaw lu vum ah a kut zau in Bawipa hmai ah cia kawlpaw khiah ro tu seh. 5 Ciaben fangin cia phungki pa in cia kawlpaw thi a hrekkhat khiah tawkdunhmun tabernacle ah kawih tu seh. 6Ciafangin cia phungki pa in a kut zung thawn thi khiah tok tu selai cia thi thawn Bawipa hmai ah khaandanhnak pon hmai ah vel sarih phiah tu seh. 7Cen cia phungki pa in a thi hrekkhat khiah Bawipa hmai ah tawkdunhmun tabernacle songai rimhmui taihmun awlta ai ki vumah mat tu seh. Cen a taanghnak kawlpaw thi khiah tawkdunhmun tabernacle dawngkham ai mei thawn taihmun awlta ke vumah lai tu seh. 8Cen cia kawlpaw songai a thau hmuah khiah a vek senin lang tu seh. Cia khiah sualhnak ca ai a hlu i. Cen a rilte khukhnak thau le a ril vumai thau le 9 a kal panih le a nak ai a thau le a kal vum ai thin thawn pehdun hnak thau khiah 10 remhnak ca ai hluhnak kawlpaw cang songai bangin lang tu selai phungki pa in awlta vumah mei thawn tai tu seh. 11 Ikhalselai kawlpaw phaw le a sa veksen le a lu le a kete le a ril le a sapakte le 12 kawlpaw pum a veksen khiah camp pua vutkuang laihmun a ciang hmun ah thiar tu selai thing vumah mei thawn tai tu seh. Vutkuang laihmun ah tai tu seh.
13 ‘Cen Israel mite a veksenin tum lo pui in sual ngah pang in cia sual khiah amahte mit song in thup manin ling lo in bawn dan napui lo bawn pang in Bawipa thukham lakah sual lekhaw, 14Amahte sualhnak khiah ling leh fangin, amahte in amahte sual hnak ca in kawlpaw cangniu khiah tawkdunhmun tabernacle hmai ah kawih tu seh. 15Cia kawlpaw lu vumah a kut zau in Bawipa hmai ah cia kawlpaw khiah ro tu seh. 16Ciaben fangin cia phungki pa in cia kawlpaw thi a hrekkhat khiah tawkdunhmun tabernacle ah kawih tu selai 17cia phungki pa in a kut zung khiah thi songah nim tu selai cia thi khiah BAWIPA hmai ah khaandanhnak pon hmai ah vel sarih phiah tu seh. 18Cen cia phungki pa in a thi hrekkhat khiah Bawipa hmai ah tawkdunhmun tabernacle songai a hlu taihmun awlta ai ki vumah dah tu seh. Cen a taanghnak kawlpaw thi khiah tawkdunhmun tabernacle dawngkham ai mei thawn taihmun awlta ke vumah burh tu seh. 19Cen cia kawlpaw songai a thau hmuah khiah a veksenin lang tu selai awlta vumah tai seh. 20Cia kawlpaw cang khiah sualhnak ca ai hlu bang in bawn tu seh. Ciatih bangin phungki pa in amahte sualhnak khiah khuk sah tuhai` amahte sualhnak khiah hlat sah tuh i. 21Ciaben fangin phungki pa in cia kawlpaw cang khiah camp pua ah suah tu selai a hmasa kawlpaw cang bangin mei thawn tai tu seh. Mi zapuite ai sualhnak ca ai hluhnak i.
22Mi-uktu pa in sual fangin a Pathian a Bawipa thukham bangin bawn tuh lohnak khiah bawn pang in sual lekhaw, 23 ihlahle a sualhnak khiah amah in ling leh lekhaw, a hlu tuhin me niu a cang a maa nai lo kawih tu selai 24cia me lu vumah a kut zau tu selai Bawipa hmai ah mei ai taihnak a hlu, hlu hmunah ro tu seh. Cia khiah sualhnak ca ai a hlu i. 25 Ciafangin phungki pa in sualhnak ca ai hluhnak me thi a hrekkhat khiah a zungpar thawn tok tu selai mei ai taihnak a hlu hluhmun awlta ai ki khiah nawih tu selai a taanghnak thi khiah mei ai taihnak a hlu hluhmun awlta hnia ah lai tu seh. 26Cen a thau khiah remhnak a hlu bangin awlta vumah tai tu seh. Ciatih in phungki pa in cia pa sualhnak khiah khuk tuhai a sual khiah hlat tuh i.
27Cen mi menma te in sual in Bawipa thukham bangin bawn tuh lohnak khiah bawn in amahte in sual lekhaw, 28ihlahle a sual khiah amah in ling leh lekhaw, cia pa in a maa nai lo me niu a laa khiah a sualhnak ca in hlu tuhin kawih tu seh. 29Cen a kut khiah a hluhnak me vumah zau tu selai mei ai a hlu taihmun ah cia sual ca ai hluhnak me khiah ro tu seh. 30Ciafangin phungki pa in a kut zung thawn cia thi khiah tok tu selai a hlu taihmun awlta ki vumah mat tu selai a taanghnak a thi khiah awlta ke ah lai tu seh. 31Cen remhnak a hlu songai thau lang bangin cia me songai a thau khiah a veksenin lang tu sio seh. Cia thau khiah phungki pa in Bawipa hnenah a rimhmui hlu cang tuhin awlta vumah tai tu seh. Ciatih bangin phungki pa in a sualhnak khiah khuk tuhai a sual khiah hlat sah tuh i.
32Cen a sualhnak ca in tuufa niu kawih lekhaw a maa nai lo a laa kawih tu seh. 33Ciafangin cia sual ca ai hluhnak tuu lu ah a kut zau tu selai mei ai a hlu taihmun ah cia tuu khiah sualhnak a hlu ca in ro tu seh. 34Ciafang in phungki pa in a kut zung in cia sualhnak ca ai hluhnak tuu thi a hrekkhat khiah lang tu selai a hlu taihmun awlta ki vumah nawih tu selai a taanghnak thi khiah awlta ke ah lai tu seh. 35Cen remhnak a hlu songai thau lang bangin cia tuu songai a thau khiah a veksenin lang tu sio seh. Cia thau khiah phungki pa in Bawipa hnenah mei thawn taihnak a hlu bangin awlta vumah tai tu seh. Ciatih bangin phungki pa in amah sualhnak khiah khuk tuhai a sual khiah hlat sah tuh i.