1Cen a hlu hnak khiah remhnak ca ai hlu ilekhaw, kawlpaw ilekhaw a pa ihlahle a nu i tu seh, BAWIPA hnenah a maa nai lo kawlpaw hlu tu seh. 2Cia pa in cia a hluhnak lu vumah a kut khiah zau tu selai, tawkdunhmun tabernacle dawngkham ah ro tu seh. Ciaben fangin Aaron fate phungkite in a thi khiah awlta cingkim ah phiah tu seh. 3Ciafangin remhnak ca ai a hluhnak a hrekkhat khiah BAWIPA hnenah mei thawn tai in hlu tu seh. Cen a rilte khukhnak thau le a ril vumai thau le 4a kal panih le a nak ai a thau le a kal vumai thin thawn pehdun hnak a thau khiah lang tu selai 5Aaron fate in awlta vumai mei vumai thing vumah mei thawn tai tu selai mei thawn taihnak BAWIPA hnenah a rimhmui a hlu i.
6Cen remhnak ca in BAWIPA hnenah tuu le me hlu lekhaw, a cang ihlahle a laa i tu seh a maa nai lo hlu tu seh. 7Cen tuu faniu hlu lekhaw BAWIPA hnenah hlu tu seh. 8Cia pa in a hluhnak lu vumah a kut zau tu selai tawkdunhmun tabernacle hmai ah ro tu seh. Ciaben fangin Aaron fate in a thi khiah awlta hiang cingkim ah phiah tu seh. 9Ciafangin remhnak ca ai a hluhnak a thau hrekkhat le a mai ai a thau veksen khiah a zangkhun in tan in BAWIPA hnenah mei thawn tai in hlu tu seh. Cen a rilte khukhnak thau le a ril vumai thau le 10a kal panih le a nak ai a thau le a kal vumai thin thawn pehdunhnak a thau khiah lang in 11phungki pa in rong bangin awlta vumah mei thawn tai tu selai mei thawn taihnak BAWIPA hnenah a hlu i.
12Cen a hluhnak khiah me ilekhaw, BAWIPA hnenah hlu tu seh. 13Cia pa in a hluhnak me lu vumah a kut zau tu selai tawkdunhmun tabernacle hmai ah ro tu seh. 14Ciafangin a hlu hnak khiah BAWIPA hnenah mei thawn tai in hlu tu seh. Cen a rilte khukhnak thau le a ril vumai thau le 15a kal panih le a nak ai thau le a kal vumai thin thawn pehdunhnak thau khiah lang tu selai 16phungki pa in rong bangin awlta vumah mei thawn tai tu selai mei thawn taihnak a rimhmui a hlu i. Thau hmuahhmuah a vekin BAWIPA ai i.
17Thau le thi khiah ei tuh lo i si. Cia khiah kumzangza in ning umhmun caang ah hlun tuhin thukham ning pe ing.” ti in rel i.