Leviticus 26

<<  LEVITICUS 26  >>

1Kaimah khiah Bawipa ning Pathian ing. Ciamanin ningte in milim zuk bawn tuh lo i si. Thing vumah a solhhnak zuk le khante bir tuh lo i si. Cen bia tuhin ning ramah lungto vumah a zuk khai suai tuh lo i si. 2I sabbath khiah ul tuh i si. I sanginn khiah zul tuh i si. Kaimah khiah Bawipa ing.

3I upadi dan le i thukham khiah hlun in bawn le i sikhaw, 4A cu bangin ruahti ning pe tuh ai ning lo in a putung in rong po ruai tuh ing. Cen ning thingkung te in khai a ha ngai in thai tuh i.  5Rongkhawm cu tian rongcil tuhai ning rong cing cu tian in rongkhawm tuh thliahthlo i si.  6Ning ramah a muang niu in ning um ruai tuh ing. Mitmu fangin khai aisu in ning lau ruai tuh lo i.  Ning ramin ramsa riahsia te khiah ning hnawt sah tuh sio ing. Cen ning ramah aisu in khai ning tawng tuh lo i. 7Ningte in ning raalte khiah hnawh tuhai ning vaang thawn amahte khiah rek tuh i si.  8Ningte panga in mi zakhat khiah hnawh tuhai ningte mi zakhat in mi thawngha khiah neh tuh sio i si. 9Ziangmanti fangin kaimah in ningte khiah a cuang in ning sik tuh ai ning pung le ning zaai ruai tuh ing. Cen ningte hnenah i thukhamhnak khai khim ruai tuh ing. 10Ning rong hlun khiah ei tuhai rong thar hleng manin a hlun khiah lon tuh i si. 11I tabernacle khiah ning lakah sa tuh ai i rauhla in ning hua tuh lo i. 12Ningmah kawmin vak khat tuh ai ning Pathian cang tuh ing. Cen ningte khiah i minung cang tuh i si. 13Kaimah khiah Izip mite cengfa tuan tuh lo ai Izip ram songin ning suah tu Bawipa ning Pathian ing. Ning haak penhnak ri per khiah ning cat sah zo ing. Ciamanin a caang in ding in ning vak ruai ing.

14Ikhalselai i thu khiah ngai lo in le i thukhamte khiah a veksenin hlun hlahleisikhaw 15cen i dan upadi khiah zainam lo in nautat in ning rauhla in i thukham khiah hua in i thukham khiah hlun lo in hnawm ruai leisikhaw 16he bangin ning vumah bawn tuh ve ing: Ning vumah a kihkul hleng ruai tuh ing. A rokeng in ning ur ruai tuh ai ning hlawng tuh dek ai ning mit khiah ning vai ruai tuh ai lung ning sia ruai tuh ing. Ci cing tuh ai a lovang cang tuh i. Ning raalte in ning ei sah tuh i. 17Kaimah in ning bawm tuh lo ing. Ciamanin ning raalte in ning neh tuh berh i. Ning hua tute in ning uk tuh ai aisu in ning hnawh tuh napui lo ai tlan tuh hnelhno i si. 18Cen hete ben in i thu khiah ngai thotho hlahleisikhaw ning sual manin let sarih tamin ning cawh tuh ing. 19Ning puarhnak ning power khiah ning ek sah tuh ing. Van khiah thir bangin cang ruai tuh ing. Ning laipua khiah dar bangin cang ruai tuh ing. 20Ning tha khiah a lovang in hmang tuh i si. Ning ramin zaikhai suak tuh lo i. Ning thingkungte in khai a thai thai tuh lo i.

21Cen i thu khiah i el in vak in i thu khiah i ngai ning nuam hlahlekhaw ning sual zah in urhnak let sarih tamin hleng ruai tuh ing. 22Hampalak ai    ramsate khiah ning lakah hlat tuh ai ning fate khiah ning dawp sah tuh i. Ning sumte ning rek sah tuh i. Cen ning minungte khai ning tlawm tuh betbo i. Ning lampui khai dap tuh sukso i.

23Cen hete manin ning thin thleng thotho lo in i el in vak thotho leisikhaw, 24kai in khai ning el tuh ve ai ning sual manin let sarih tam in ning cawh tuh ing. 25Ciafangin i thukham ca in phuzul tu tuhin ning tawng tuhin vaangsau khiah hlat tuh ing. Ning khua songah hmunkhat in ning tai fangin ning lakah urhnak a siabik hlat tuh ing. Ning raalte kut songah ning kawih tuh ing. 26Ning rong khiah ning hnenah hleng tuh lo in ning khaam sah tuh ing. Ciafangin nupui sawmkhat in lungthu pakhat songah ning sang reu khiah em tuhai ning hnenah cia sangreu khiah kawih fangin ei tuh napui ai rong ning kham tuh lo i. 27Hete ben fangin i thu khiah i ngai lo in i el in vak thotho leisikhaw 28kai khai thin i raw tuh ngai ai ning el tuh ve ing. Ning sual manin let sarih tam in ning cawh tuh ing. 29Ning fapate sa khiah ei tuh i si. Ning fenute sa khiah ei tuh i si. 30Ning raithawi hmun khiah ning hnawm sah tuh berh ing. A rimhmui ning taihmun ning awlta khai ning bal sah tuh sekai ning ruang ning vuitum khiah nunhnak nai lo ning milim vumah lon tuh ing. Cen i rauhla in ning hua tuh i. 31Ning khua te khiah ning hnawmcan sah tuh ai ning sanginnte khiah dapkhing in um tuh i. Cen a rimhmui ning hluhnak khai ning hnim sah tuh lo ing. 32Ning ram khiah minung um lo in dapkhing in um ruai tuh ing. Ciafangin ning ram ai umtu ning raalte khai ngaihsunur tuh i. 33Mi phun dangte lakah ning piak ruai tuh sio ai ning hnawh tuhin vangsau khiah phok tuh ing. Ning ram khiah cimpil in um tuh i. 34Ciafangin ning ram khai ningte khiah ning raalte kut songah ning um song hmuahin a dapniu in um tuh ai a sabbath khai ul ngah tuh i. Ciafangin ning ram khai com ngah tuh ai sabbath ul ngah tuh i. 35Ciatih ai dap sukso ai a um fangin com ngah tuh i. Ziangmanti fangin ning in ning ramah ning um teng in sabbath nia ah com man lo i si.

36Cen ning raalte ramah a taang  tu ning te khiah thinzul li in ning um ruai tuh ing. Thinghnah hlinhnak aw menma rin lau in tlan tuh i si. Vaangsau hnenin tlan bangin amahte khiah tlan tuh i. Aisu in khai hnawh napui lo ai amahte khiah bah tuh i. 37Aisu in khai hnawh napui lo ai anite khiah vangsau ai hnawh vuah in tlan tuh ai pakhat le pakhat khiah sui dun tuh i. Ning raalte hmai ah ding benhnak tha nai tuh lo i si. 38Mi phun dang lakah ning rall tuh ai ning raalte lairam in ning ei tuh sio i. 39Cen a taangtute khiah ning raalte ramah ning sualhnak thawn ning cimpil tuh berh i. Cen amahte songai a pupate sual manin khai amahte khiah cimpil tuh berh i.

40Ikhalselai amahte in amahte sualhnak le a paate sualhnak le i lakah a hlotlau in um awng ai i el in vak awng manin 41kai in khai amahte khiah el in vak ve ai a raalte ramah kawih zo ing. Ciamanin amahte vunpar cem lohnak thinlung khiah niam ruai in amahte mawhhnak khiah sir lekhaw 42ciafangin kai khai Zakuk hnenah le Aizek hnen ah le Abraham hnenah i thukham khiah hih tuhai amahte ram khiah hih tuh ing. 43Cen amahte ram songah amahte um tuh lo ai amahte um lo lakin cia ramin sabbath khiah ul ngah tuh i. Amahte mawhhnak khiah sir kul tuh i. Ziangmanti fangin amahte in i thukham khiah nautat in zainam lo ai amahte rauhla in i dan upadi khiah hua i. 44Ciatih tluk inapuikhaw amahte khiah amahte raalte ram ah um teng fangin amahte khiah lon tuh lo ing. Cen hua khai hua tuh lo ing. Cen amahte khai a vuva in hnawmcan tuh lo ing. Amahte thawn i thukham khai pilh tuh lo ing. Ziangmanti fangin kaimah khiah Bawipa amahte Pathian ing. 45Ikhalselai amahte manin amahte Pathian cang tuhin mi phun tampui hmuh in Izip ramin i suahhnak a paate thawn i thukhamhnak khiah hih tuh ing.’ti in rel tu.”ti in ruai i.

46Hete khiah Bawipa in Israel mite thawn Sinai Mual vumah Moses kut in pehnak a thukham le a dan upadi te i.

<<  LEVITICUS 26  >>

Recent Posts