Joshua 2

<<  JOSHUA 2  >>

1Ciafangin Joshua in cungthauh panih khiah Shittim in a thupniu in hlat ai, “Feh tu i lai Jerikhu ram khiah cul tuu-ih.”ti in rel i. Ciamanin anite khai feh ai phatemah Rahab inn ah hleng ai ciata ah caam i. 2Ciafangin Jerikhu kumpibawipa khiah, “Kin ram cul tuhin Israel mite panih heta ah hleng zo i hang.’ ti in rel i. 3Ciamanin Jerikhu kumpibawipa in Rahab hnen ah mite hlat ai, “Na hnenah kawi ai na inn ah tlum tu mite khiah kawih tu. Ziangmanti fangin kin ram a veksenin cul tuh in hleng i.” ti in rel i. 4Ciafangin cia nuu in cia mite khiah thup ben fangin, “I peu i. Cia mite khiah i hnenah kawi peu i. Ikhalselai a konin hleng i ti ling lo ing. 5Ikhalselai khuathim ai kawl dawngkham kham fangin anite khai suak teu i. A konah kawi i ti ling lo ing. A rang ngai in hnawh tu i lai man thai tuh paam i si.”ti in rel i. 6(Ikhalselai cia nuu in amahte khiah innphu vumah kawih ai amahte khiah innphu vumai a khawihnak a ro nimden kung thawn khuk i.) 7Ciafangin anite khai Jordan run tan hmun tian hnawh i. A hnawhtute suak ben fangin kawl dawngkham khai kham i.

8Ciamanin amahte mitmu hlanah cia nuu khai innphu vumah amahte hnenah kawi ai, 9cia mite hnenah, “BAWIPA in he ram khiah ning pe zo i ti khiah ling zo ing. Ciamanin kin veksenin ning lakah kin lau rauh i. Ningmah manin he ramai umtu mi veksenin a thinzul sio i. 10Ziangmanti fangin Izip in ning suak fangin BAWIPA in ning ca in Ti San pui khiah ro ruai lio khiah zazo i ing. Cen Jordan ral khatlam ramai Amor te kumpibawi Sihon le Ok te khai cimpil lio ai ning rekhnak thu khai zazo i ing. 11He thute kin za sawng fangin kin thin khai zul berh i. Ningmah manin aisu bang khai raalpha in um nawn lo i. Ziangmanti fangin BAWIPA ning Pathian khiah vancung le laihnia ai Pathian i. 12Ciamanin ninghio ning ngen ing. Kaimah in ning ninghio bangin i paate innkua khai ning hio tuhin thu i kham tu. Hnikhnaihhnak i pe tulai, 13i paa le i nuu le i hmingpaate le i farnute khiah thihhnak in luat ruai tu.”ti in ngen i. 14Ciamanin cia mite in, “Kin bawn tuhhnak na khiah aisu khai rel hlah leisikhaw, ning nunhnak khiah kin nunhnak bang in, BAWIPA in he ram khiah kin pe fangin, a ngaingai in ninghiohnak thawn ning rul tuh i ing.” ti in sawn i.

15Ciafangin cia nuu in amahte khiah a padinpauk in rihual thawnin hla i. Ziangmanti fangin a inn khiah khua kulhhnak sen vumah sahnak i ai cia nuu khiah sen vumah um i. 16Ciafangin cia nuu in amahte hnenah, “Mual tlang ah feh tuu-ih. Cialo fangin ning hnawhtute in ning tawk mawh ngai. Ning hnawhtute let hlan lo ciata ah ni thum song relh tu i lai ciafangin ning nuam hmun ah feh tuu-ih.”ti in rel i. 17Ciafangin cia mite in cia nuu hnenah, “Nangmah ai kin kham ruaihnak thu khiah, 18he ramah kin hleng leh fangin nangmah ai kin hla hmun  padinpauh songin he ri san khiah penin na paa le na nuu le na hmingpaate le na paa songkhatte khiah na inn ah kawih hlahlesikhaw mawh kin hluk thill tuh lo i. 19Ciamanin na inn songin lampui ah suak tu pa thi khiah a tavuan i ai kin mawhhluk tuh um tuh lo i. Cen na inn songai um napui in amah khiah pom lekhaw a thi khiah kin tavuan i. 20Cen kin bawn tuhhnak na khiah rel lesikhaw na ruaihnak kin thukham songin kin luat tuh i.”ti in rel i. 21Ciafangin cia nuu in, “Ning relhnak bangin i tu seh.”ti in sawn i. Ciafangin cia nuu in amahte khiah feh ruai ai anite khai feh i. Ciafangin cia nuu in ri san khiah padinpauk ah pen i.

22Ciafangin anite khai mual tlaang ah feh ai a hnawhtute tlung leh hlan lo ni thum tian ciata ah um i. A hnawhtute in lamlak pum sii napui ai tawk lo i. 23Ciamanin cia mite panih khai tlung ai mual vumin zu ai tan ben fangin Nun fapa Joshua hnenah hleng i. 24Ciafang Joshua hnenah, “A ngaingai in Bawipa in a ram veksenin kin kut ah kin ap berh i hang. Ziangmanti fangin kinmah manin khia ramai umtu te a veksenin a thin zul berh i hang.” ti in rel i.

<<  JOSHUA 2  >>

Recent Posts