1 Ciafangin Namath mi Zophar in,
2 “He na relhnak thute khiah
sawn lo in um thill tur im?
Hetih ai pongtu pa khiah luat ruai tuh im?
3 Thu lovang na ponghnak man in
mi dangte in pong lo niu in um tuh hlen im?
Zauhsuam in na pong fangin
mite in na hau tuh lo im?
4 Ziangmanti fangin nangmah in,
‘I sanghnak khiah a hman i.
Ning hmai ah i ciang i.’ ti in rel i si.
5 Aw, Pathian in pong in
a kaa in lo na hau selai!
6 Fimhnak thuthup khiah lo na hmuh selai!
Ziangmanti fangin na fimhnak khiah
let nih in na khaang ruai tuh i.
Ciamanin, Pathian in na sual hnak tahin
tlawm sawn in na cawh khiah ling tu.
7 A thukngai Pathian fimhnak khiah
sii ban aw sim?
A Cungnung Pathian in zaizah bawn ben khiah
ling thill aw sim?
8 Ciate khiah vancung hnak in saang sawn i.
Zai bawn ben pa si?
Hlankua hnak in thuk sawn i.
Zai ling thill pa si?
9 Amahte khiah laipua hnak in sau sawn ai
tipui hnak in kau sawn i.
10 Amah khiah kawi in thawng na hla selai,
zung ah taza na cuai selai, aisu in el ben tuh i?
11 Ziangmanti fangin amah in
mi thuzawl thaite khiah ling i.
A pha lo hmu fangin, ling tuh lo im?
12 Ziangmanti fangin hampalak ai lak fa khiah
minung cang thill lo bangin,
fimhnak nai lo pa khai mifim cang thill lo i.
13 Ikhalselai na thinlung khiah rem in
na kut khiah amah hnen lamah pharh lesikhaw,
14 Na kut songah sualhnak um in, cia sualhnak
khiah nangmah thawn a hla ngai ah dah in na
buk songah a pha lo khiah um ruai hlah lesikhaw,
15 ciafangin zakthi lo in na hmai khiah
suah thill tuh i si.
A kho ngai in ding ben tuh ai na lau tuh lo i.
16 Ziangmanti fangin na rimsuhnak khiah
hai tuh le a luangzo ti bang lek in hih tuh i si.
17 Na nunhnak khiah sunlai ni tah in tleu tuh sawn
Khuathim songah um tuh napui ai,
zingniu bangin um tuh i si.
18 Ummhnak um manin na thin na kho tuh i.
Na hiang cingkim khiah sik tuh ai
a muang niu in com tuh i si.
19 Na taal fangin khai aisu in khai
na lau ruai ngam tuh lo i.
Mi tam ngai in na hmuifu sii tuh i.
20 Ikhalselai misualte mit khiah hnawm tuh i.
Amahte khiah luat tuh lo i.
Thi tuh lek khiah amahte ummhnak i.” ti in sawn i.