1BAWIPA in Jeremiah hnenah relhnak, 2BAWIPA inn kawldawngkham ah ding tulai, ‘Bawipa bia tuhai he kawldawngkham songai lut tu ning Judah mite veksen in BAWIPA relhnak thu khiah ngai tuu-ih.’ ti in rel tu.” ti in ruai i. 3Israel mite Pathian, vancung mite BAWIPA in, “Ning nundan le ning bawn dan khiah thleng tuu i lai, he ramah ning taang ruai tuh ing. 4‘Bawipa temple, BAWIPA temple, BAWIPA temple.’ ti ai relhnak thudon thu khiah rinsan mah ih. 5Ziangmanti fangin, ning nundan le ning bawn dan khiah thleng sio in, mi pakhat le a ompui thu khiah a hman in thukhan sah in, 6mikhualte le paa nai lote le hmaitongte khiah hnaihnok lo in le he hmunah mawh nai lo thi luang ruai lo in le ning ur ruai tuh in a dang pathiante khiah bia hlah le isikhaw, 7Kumzangza ai co tuhin ning paate hnen ah i pehnak he ramah ning um siang tuh ing.
8Ikhalselai ningte in zai hnempuihnak um lo thudon thu khiah ngai i si. 9Ningte in ruko in mi rek in, nulepa sualhnak bawnin, thudon pui in cukcam in, Baal hnenah rimhmui tai in ning linglo hnak pathiante khiah bia in, ciaben fangin 10I hnen ah kawi in i hming ai kohnak he i inn songah i hmai ah ding in, ‘He ningdulkulte hmuah bawn tuhin kin luat ruai i?’ ti in rel nga i sim? 11I hming ai kohnak he i inn khiah, ning hmai ah ruko inn cang lio im? Kaimah rori in ning hmu ing.” ti in BAWIPA in rel i.
12Ikhalselai tunin a hmasaber ah i hming i dah hmun Shiloh ah kawi tuu i lai, i minung misual Israel mite manin Shiloh vumah i bawnhnak khiah sik tuu-ih. 13Ningmah in hete khiah bawn belbo ai, ning hnenah zingniu in tho ai ning rel napui ai ningte in za lo i si. Ning ko napui ai i awi lo i si. 14Ciamanin ningmah le ning paate hnenah i pehnak ning rinsanhnak he i hming ai kohnak he inn khai Shiloh vumah i bawn bang in bawn tuh ing. 15Ning unau Efraim tesin fate veksen khiah i hnawt sio bangin, ningte khai i hmai in ning hnawt tuh sio ing.
16Ciamanin he mite ca in sawngen sah mah. Amahte ca in kap kong in sawngen sah mah. Cen i hnenah khai amahte ca in ninghio kun tau mah. Ziangmanti fangin na ngai sah tuh lo ing. 17Judah khua caang ah le Jerusalem lamceh caang ah amahte bawnhnak khiah hmu lo i sim? 18Naupangte in thing fom i. A paate in mai sem i. Nupuite in vancung kumpibawinu ca in sangvut khiah pawnghmuk in bawn i. I raw ruai tuh in amahte in a dang pathiante hnenah ding tuh khiah hlu in thin i tok ruai i. 19Bawipa in, “Amahte in i raw ruai tuhin thin i tok im? Amahte lala zakthi tuhin thintok ruai sawn lo im?” ti in ti i. 20Ciamanin BAWIPA Pathian in, “Sik tuu-ih. He hmunah minung le ramsa le lo ai thingte le laipua ai thingthai te vumah i thinraw hnak khiah bung tuh ing. Ciafangin mai bang in kang tuhai aisu in khai hmit ben tuh lo i.” ti in rel i.
21Vancung mite BAWIPA, Israel Pathian in, “Mai thawn tai ai ning hlu hnak khiah ning raithawi hnak thawn belh tu i lai sa ei tuu-ih. 22Ziangmanti fangin mai in tai ai hlu dan le raithawi dan khiah Izip ram in ning paate i suah nia ah amahte khiah rel khai rel lo ing. Ruai khai ruai lo ing. 23Ikhalselai amahte hnenah i ruai hnak khiah, ‘I aw i ngai tu i lai, kaimah khiah ning Pathian i tuh ai ningte khai i minung i tuh i si. I ruaihnak lampui veksen bangin vak tu i lai ning pha tuh i.’ ti in rel ing. 24Ikhalselai amahte in i hlun khai hlun lo, cen a naa in khai i ngai lo ai amahte ruat sualhnak thinlung bangin nung ai hmailam ah feh lo ai khelleh lam sawn ah let i. 25Ning paate Izip ram in suak nia ai panin tunnia tian in, i hnenum prawfette a veksenin zingniu in tho ruai ai ning hnenah hlat ing. 26Ikhalselai amahte in i thu khiah hlun lo ai amahte naa in khai i ngai lo i. Ikhalselai amahte khiah ungtuang rauh in um i.
27Ciamanin nangmah in he thute khiah amahte hnenah rel tuh napui ai, amahte in na thu na hlun tuh lo i. Nangmah in amahte khiah ko tuh napui ai amahte in na awi tuh lo i.
28Ciamanin amahte hnenah, ‘He mi phunte khiah amahte BAWIPA Pathian aw hlun nuam lo ai tiamhnak khai ngai nuam lo pawl mi phunte i. Thuhman khiah rall lio ai amahte kaa songah um nawn lo i. 29Na sam khiah met tulai, lon tu teu. Zaikhai um lo hmun a saang vumah kap hnak la khiah sa tu. Ziangmanti fangin BAWIPA in a thinrawhnak mi phunte khiah hnawl zo ai zam zo i.’ ti in rel tu. 30Bawipa in, “Ziangmanti fang in, “Judah mite in i hmai ah a pha lo bawn zo i.” ti in rel i. “I hming ai kohnak inn songah rim ruai tuhin, amahte ningdulkul thil khiah haih zo i. 31Cen amahte in Hinnom Fapa Rawn zawllai ai Tophet ah a saanghmun ah raithawi hmun te khiah amahte fapa le fenu te mai ah tai tuhin sa i. Ciatih bang in bawn tuhin ruai awng lo ing. I thin in khai ruat awng lo ing.
32Ciamanin BAWIPA in ti i: “Tophet le Hinnom Fapa Rawn zawllai ti in ko tuh lo ai Rekhnak hmun Rawn zawllai ti in ko tuh ai, amahte in Tophet ah vui hmun tuh um lo tian in mithi vui tuh niakhua hleng i hang. 33Hete vuitum khiah van ai vaniu le laipua ai ramsa te rongah cang tuh i. Ciate khiah aisu in khai hung tuh lo i. 34Ciafangin Judah khua ah le Jerusalem lamceh lakah puai le anghnak aw khiah bo ruai tuh ing. Mohoitu pa le monu te aw khai pai ruai tuh ing. Ziangmanti fangin cia ram khiah dap suk so in um tuh i.” ti in BAWIPA in rel i.