Jeremiah 8

<<  JEREMIAH 8  >>

1“Ciafangin amahte in Judah kumpibawite ruh le a bawite ruh le phungkite ruh le prawfet te ruh le Jerusalem ai umtute ruh khiah amahte hlan song in suah tuh i. 2Ciafangin amahte in cia ruh te khiah amahte ithnak le amahte hlunhnak le amahte ai siihnak le biahnak vancung mite veksen hnenah le ni le hla hmai ah pho tuh i. Cia ruhte khiah khawm khai khawm tuh lo, vui khai vui tuh lo ai laivum ai ek bangin cang tuh i. 3Ciafangin he a siava mite songai taanghnak te khiah i hnawt hmun ramah nunhnak tah in thihhnak khiah ril tuh i.” ti in vancung mite BAWIPA in rel i.

4  “Ciazolo ah amahte hnenah, ‘BAWIPA in,
“Amahte khiah bah fangin, tho leh lo im?
Mi pakhat in vak teu fangin, tlung leh lo im?

5  Ilekhaw zaimanin he mite in a hnualam ah let ngio i?
Zaimanin Jerusalem khiah a catlo in sang thanau in um ngio i?

   Amahte in thudon khiah rel ngio ai,
Let leh nuam lo i.

6  Amahte relhnak khiah ngai ai za ing.
Amahte in a hman in rel lo i.
Aisu in khai amahte sual khiah sir lo i.
“Zai bawn ngah te ing?” ti in zawt lo i.
Siphuh in raaltawng hmun lamah dawp bang
in,  Amahte nuam hmun ten ah feh tlang i.

7  Van ai vaniu rin in a tikcu khiah ling i.
Cumdur le nga sartam le paipi te rinin amahte vai cuu khiah ling i.
Ikhalselai i minungte in BAWIPA thukham khiah ling lo i.

8 Akontih in , ‘Mifim i ing. BAWIPA thukham
khiah kinmah hnenah um i.’ ti thill i si?
Sik tuu-ih. Cazite in thudon lo lek ngan i.

9  Mifim te khiah zakthi in dah i.
Amahte khiah thinzul in um ai thang ai awk lio bang i.
Amahte in BAWIPA thu khiah el i.
Ciamanin zai fimhnak nai i?

10 Ciamanin amahte nu khiah midang te hnenah pe tuh ing.
Amahte lo khai mi dangte in co ruai tuh ing.
Ziangmanti fangin a lian ber ai panin a cikber tian in,
Iksik dun hnak lek bawn i.
Prawfet ai panin phungki tianin
Thudon in naper i.

11 Amahte in i minungte urhnak khiah a
tlawmniu ian lawm ruai i.
Remhnak um napui lo ai,
‘Remhnak, remhnak.’ti in rel i.

12 Amahte in ningdulkul khiah bawn fangin zakthi awm?
Zakthi lo i. Hmaisong khai hal lo i.
Ciamanin a bah tu te kawmin bah tuhai
Cawhkuan nia ah amahte khiah tlu tuh i.” ti in BAWIPA in rel i.

13 BAWIPA in, “Amahte khiah hnawm ruai tuh ing.
Capit kung vum ah a thai um tuh lo i.
Thai thing vumah a thai um tuh lo i.
Amahte hnah khiah voi tuh i.
Amahte hnenah i pehnak khiah lang sah tuh berh i.” ti in ti i.

14 “Zaimanin to meng in um i si?
Hmunkhat in khawm tu i lai,
A kho ngai ai kulhhnak khuate songah lut
nga singkhaw, ciata ah thi nga sing.
Ziangmanti fangin kinmah in
Bawipa lakah sual manin
Bawipa kin Pathian in kin rek tuhin
cukti ding tuhin kin pe zo i.

15 Remhnak sii napui ai a pha pakhat khai hleng lo i.
Ur lawm tuhin cakhnak sii napui ai rimsuhnak lek um i.

16 A siphuh haihawhhnak khiah Dan ram in zak i.
A siphuhte runghnak aw manin, ram veksen in lau i.
Ziangmanti fangin amahte khiah kawi tuhai,
he  ram le a songai umhnak khiah ei tuh sio i.
Khuapui le a songai umtu mite khai
hnawmcan tuh sio i.

17 Ziangmanti fangin ning lakah rul hlat tuh ing.
A zawl thill lo a ru nai rul hlat tuh ing.
Amahte in ning cik tuh i.” ti in BAWIPA in rel i.

18 Kaimah veve khiah i lungsiahnak lawm ruai tum fangin
I thin khiah zul bengbo i.

19 “Bawipa khiah Zion ah um lo im?
A kumpibawipa khiah
a khua songah um lo im?”
ti in i minungte in ram hla ngai ai
auhnak aw khiah ngai tu.
“Ziangmanin amahte milim le a dang
pathiante thawn amahte in thin i raw tuhin
thin i tok hnelhno i?”

20 “Rongkhawm cu khiah bo zo i.
Fur khai bo zo i.
Inapui ai kin o nawn lo i!”

21 Ziangmanti fangin i minungte urhnak in
kai khai i ur ve i.
Lungsia in kap ing.
Ngaihsun i ur rauh i.

22 Kilead ah si um lo im?
Ciata ah sibawi khai um lo im?
Ilekhaw zaimanin i minungte khiah cak thill lo i?

<<  JEREMIAH 8  >>