1Ciazolo ah Bawipa in i hnenah, “Laihnah zual lian ngai lang tulai, minung kalawngdan thawn Maher-Shalal-Hash-Baz thu ngan tu. 2Ciafangin phungki Uriah le Jeberekhaiah fapa Zekharaiah te khiah a sangtlak i tettikhan tu tuh in ko tuh ing.” ti in i rel i. 3Cafangin kai khai i nu prawfet thawn it khat ai ani in fapaai le pasal niu in te i. Ciafangin Bawipa in i hnenah, “A hming khiah Maher-Shalal-Hash-Baz ti in ko tu. 4Ziangmanti fangin nau niu in, ‘I paa, i nuu,’ ti in ko thiam hlanah, Damaskhas naihnak thilri le Samaria ai longhnak thilrite khiah Assiria kumpibawipa hmai ah kawih tuh i.” ti in i rel i.
5 Ciafangin Bawipa in i hnenah i pon leh thio ai,
6 He mite in a fungniu ai luanghnak Shiloah ti khiah daih lo ai
Rezin le Remaliah fapa vumah ang manin,
7 Ciamanin Bawipa in amahte vumah
a lian le a cakngai Run ti – Assiria kumpibawipa khiah
a raalkapte kawmin kawih tuh i.
Cia Run ti in a kaak le a varkam te khiah cum tuh sio i.
8 Cen cia Run ti in Judah ram khai a hawng tian in cum in luang tuh i.
A ko pharh hnak in na ram song khiah
a veksenin khuk tuh i, aw Immanuel!” ti in i rel i.
9 Aw mi phun dangte pawl, ning keh in ning khoi tu sio seh.
Ram hla ngai ai mite, ning veksen in ngai tuu-ih.
Ning raal thilthuam vong tuu-ih.
Ikhalselai ning khoi tuh sio i.
Ningmah veve khiah raal thilthuam vong tuu- ih.
Ikhalselai ning khoi tuh sio i.
10 Thusawm tlang tuu-ih.
Ikhalselai zaikhai khim tuh lo i.
Ning tumhnak khiah rel tuu-ih.
Khim tuh lo i.
Ziangmanti fangin Pathian khiah kin hnenah um i.
11 Ziangmanti fangin Bawipa in a kut pui khiah i vumah dah ai, he minungte bangin nung tuh lo in i tiam i. Bawipa in,
12 “He mite in, ‘ raaltawng tuh tho i.’ ti in rel bangin nang in rel mah.
Amahte lauhnak khiah lau mah.
Kih khai kih mah.
13 Vancung mite Bawipa khiah a cianghlim in zul tu.
Amah lek khiah lau in amah lek khiah kih tu.
14 Amah khiah na buanhmun i tuh i.
Ikhalselai Israel mite le lakah amah khiah
a bah ruai tu lungpui le a sui tuh lungto i.
Cen Jerusalem ai umtu mite lakah
amah khiah thang bangin awk ruai tu i tuh i.
15 Amahte lakai mi tamngai in cia lung khiah
sui tuhai, amahte khiah bah tuhai,
ek tuh le amahte khiah thang bang in
awk tuhai pom tuh i.” ti in i rel i.
16 Tettikhanhnak thu khiah pen tu lio.
Dan upadi khiah i hnuahlunte hnenin khawi tu lio.
17 Bawipa in a hmai khiah Zakuk mi hnenin thup khalselai,
Kai ngawn amah na per sah tuh ing.
Amah khiah umm tuh ing.
18 Bawipa ai i pehnak fate le kaimah khiah heta ah um i ing.
Kinmah khiah Zion Mual vumai umtu
vancung mite Bawipa in Israel ram songah bawnhnak
ngaisun urkul le hnikhnaihhnak i ing.
19 Amahte in ning te hnenah, “Tlahsan thiam te le hnam nai te khiah sii tuu-ih,” ti in ning ruai fangin, ningte in Pathian sawn sii tuh lo i sim? A nung mite ca in mithi te khiah zawt tuh im? 20Upadi dan le tettikhan hnak sawn ah sii tuu-ih. Amahte in he thu bangin rel hlahlekhaw, amahte songah khuavar um lo i. 21Amahte khiah thin rimsu le rikaam in ram lakah vak tuh i. Amahte khiah rikaam ze in van lamah sik tuh ai kumpibawipa le amahte Pathian khiah awrsia in cam tuh i. 22Ciafangin anite khai laipua khiah siik fangin, thin rimsuhnak le khuathim le thinhnawmhnak lek hmu tuh ai amahte khiah khuathim songah hnawt tuh i.