1Judah kumpibawipa Uzziah fapa Jotham fapa Ahaz san ah Siria kumpibawi Rezin le Israel kumpibawi Remaliah fapa Pekah khai Jerusalem tawng tuhin feh napui ai neh ben lo i. 2Ciafang in David mite khiah, “Siria raalkapte in Efraim te thawn taangkhat i.” ti in rel i. Ciafangin Ahaz le a minungte khiah tu songai thingte khiah hlivua zuang in hlin ruai bangin, anite khai thinlau ngai in um i. 3Ciafangin Bawipa in Isaiah hnenah, “Na fapa Shear-Jashub thawn Ahaz khiah Ponsawptu Lo lam feh hmun lamcehpui hiang ai a cungta tikhur ah tizu hmunah tawk tuhin feh tulai, 4amah hnenah, ‘Ralring in um tu. Thin nuam in um tu. Lau mah. Rezin le Siria le Remaliah te thinraw hnak khiah a hmitsa thing tum panih song in maikhu lek suak bangin hete panih khai cia thing tum te bang ngawn i. Ciamanin thanau in um mah. 5Siria, Efraim le Remaliah te in na tawng tuhin paai i. 6Amahte in, “Judah khiah tawng nga sing. Amahte khiah rim ruai nga sing. A renhnak sen khiah bal sah nga singkhaw, Tabeel fapa khiah amahte uk tu tuhin kumpibawi cang ruai nga sing.” ti in rel i.
7 ‘Ikhalselai Bawipa Pathian in,
“Amahte relhnak bangin khim tuh lo i.
Cang khai cang tuh lo i.
8 Ziangmanti fangin Siria lu khiah Damaskhas i.
Damaskhas lu khiah Rezin i.
Kum sawmruk le kum nga kum songah Efraim khiah
zaan tuh berh ai minung pakhat khai taang tuh lo i.
9 Efraim lu khiah Samaria i.
Samaria lu khiah Remaliah fapa i.
Sang hlah lesikhaw, na kho tuh lo i.”
ti in ti i.’ ti in rel tu.” ti in ruai i.
10 Ciazolo ah Bawipa in Ahaz hnenah, 11“A thuk ber song ai i tu seh, a saangber vum ai i tu seh, Bawipa na Pathian hnenah hnikhnaihhnak ngen tu.” ti in ruai leh thio i. 12Ikhalselai Ahaz in, “Ngen tuh lo ing. Bawipa khai cu tuh lo ing.”ti in sawn i. 13Ciafangin Isaiah in, “Aw David minung te, ngai tuu-ih. Minungte rin li hnelhno khiah a menma i lo i. Ikhalselai i Pathian khai li tum i sim? 15Amah in a sia khiah el in a pha khiah ril thiam thai in thawpah le khoitilu ei tuh i. 16Ziangmanti fangin cia naupang niu in a sia khiah el in a pha khiah ril thiam hlanah, na kihhnak ramte khiah amahte kumpibawite in zam tuh i. 17Bawipa in nangmah le na minungte le na paa te innkua vumah Assiria kumpibawipa khiah kawih tuh i. Cia nia khua bang khiah Efraim in Judah hnenin tlan awng khelleh ah hleng awng lohnak nia khua i tuh i.” ti in rel i.
18Cia nia ah Bawipa in Izip ramai a hlaber ai runti ai umtu thothi te le Assiria ramai umtu khoi te khiah singsir tumin ko tuh i. 19Cia thothi le khoi te khai kawi tuhai, a veksenin rawnkua songah le lungkua songah le hling vum cang ah le hampa vum cangah khop tuh i. 20Cia nia ah Bawipa in Runpui ralkhat ai Assiria kumpibawi hnenin vang san ngai khiah zawng tuhai, ning lu le ning ke ai hmul le ning kahmul khiah ning met sah tuh i. 21Cia nia ah mi pakhat in kawlpaw niu pakhat le tu panih vul tuhai, 22Cia te in cawhnawi tamngai pe tuh manin, cia pa in thawpah ei tuh i. Cia ramai a taang tute hmuah in thawpah le khoitilu ei tuh i.
23Cia nia ah tangka shekel thawngkhat man capitti kung thawngkhat um awng hmun ah maimaw le hling kung lek po tuh i. 24Ciata ah mite khiah conkiang le kahpuk thawn hleng tuh i. Ziangmanti fangin cia ram khiah a veksen in maimaw le hling kung lek um tuh i. 25Taruang thawn cek thillhnak mualtlang hnenah, maimaw le hlingkung kih in kawi ngam tuh lo i si. Ikhalselai cia hmun khiah kawlpaw le tu te leng hmun ah cang tuh i.