1 Bawipa in,
“Vancung khiah i kumpibawi tauhkheng i.
Laipua khiah i kefot hmun i.
I sak tuhhnak inn khiah akonah i?
I comhmun tuh tang akonah i?
2 Ziangmanti fangin khia thil a veksenin
i kut in bawn manin a veksenin um i.”
ti in Bawipa in ti i.
Ikhalselai i siihnak pa khiah he bang i:
A farah le thinniam le i thu kih tu khiah sii ing.
3 Kawlpaw cang ro tu khiah mirek tu bang i.
Tu faniu hlu tu khiah, uico hawng ek tu bang i.
Rong mu hlu tu khiah, vok thi hlu bang i.
Rimhmui tai tu khiah, mizuk hmuifu bur bang i.
Amahte in amahte hlanlam lampui ril bangin,
Cen amahte in amahte bawnhnak
ningdul kul lakah hiam bangin,
4 Kai khai amahte ca in rimsuhnak ril sah tuh ing.
Amahte lauhnak khiah kawih sah tuh ing.
Ziangmanti fangin i ko fangin, aisu in khai i awi lo i.
I pong fangin khai amahte in ngai lo i.
Ikhalselai amahte in i hmai ah a pha lo bawn i.
I lungkhim lohnak sawn bawn tuhin ril ngio i.”ti in rel i.
5 Bawipa thu kih tu ningte
Bawipa thu khiah za tuu-ih.
“I hming manin ning lon tu,
ning hua tu ning unaute in,
‘Ning anghnak kin hmu thai in,
Bawipa khiah thangphat tu seh.’ti in rel i.
Ikhalselai amahte khiah zakthi tuh i.”ti in ti i.
6 Khua songai pauhnak aw le
Temple songai aw za tuu-ih.
Bawipa in a raalte khiah a khimniu in rulhnak aw i.
7 “A naukai hlanah, a nau te lio i.
A naukai ai ur man hlanah, pasal niu in nau nai i.
8 Cia ang heh aisu in za awng i?
Aisu in hmu awng ing i?
Ram pakhat khiah ni khat in suak thill im?
Mi phun pakhat tang camkhat in suak thill im?
Ziangmanti fangin Zion in naukai sawng fangin,
A fate khiah te tuh i.
9 Nau te banghma khim ruai in, te ruai tuh lo ing?”ti in
Bawipa in ti i.
“Nau te ruai tu kaimah in a sul khiah kham lio ngang?”
ti in ning Pathian in ti i.
10 Jerusalem it tu te,
Amah thawn ang tuu-ih.
Amah kah tute in
Amah thawn lungkhim in ang tuu-ih.
11 Ciafangin a hnawi khiah dingin ning kham tuh i.
A thangphathnak tamngai khiah
a tam ngai in ding tuhai thin na khim tuh ngai i.”ti in ti i.
12 Ziangmanti fangin Bawipa in,
Sik tu. Amah hnenah remhnak khiah
tipui bangin pe tuh ing.
Gentile te thilrite khiah rawnti bangin
a hnenah luang ruai tuh ing.
Ciafangin rong na pe tuh i.
A nak in na phur tuhai
a khuk ah na hlin tuh i.
13 A nuu ai nau thinnuam ruai bangin,
thin na nuam ruai tuh ing.
Ciale Jerusalem ah thin na nuam tuh i.
14 He khiah na hmu fangin, na ang tuh i.
Na ruhte khiah hampa bangin khang tuh i.
Bawipa khiah a hnenumte hnenah ling ruai tuh i.
A rawhnak khiah a raalte hnenah ling ruai tuh i.
15 Ziangmanti fangin Bawipa khiah
a rauh ngai ai a rawhnak hmuh tuhin
mai thawn le khuahu bang
siphuhlengte thawn hleng tuh i.
Mai lei thawn amah in hau tuh i.
16 Ziangmanti fangin mai le vangsau thawn
Bawipa in minungte khiah thukhan tuh i.
Bawipa rekhnak khiah tamngai tuh i.
17 Vuandum ah milim zuk bia tuhin le, vok sa le buthi le a ningdul kul sa ei tuhin kawi tuhin amahte veve cianghlim ruai tute khiah hmunkhat in hnawmcan tuh berh i.”ti in Bawipa in rel i.
18 “Ziangmanin ti fangin amahte naperhnak le ruathnak khiah ling sah ing. Mi phun cang le pon phuncang pongtute khiah hmun khat in khawm tuh ai amahte khiah kawi in i thangphathnak khiah hmu tuh i. 19Amahte lakah hnikhnaihhnak bawn tuh ing. Amahte lakai tlan tute khiah mi phun dangte hnenah kuat tuh ing. Tarshish le Pul le kahpuk kaptu Lud le Tubal le Javan le i hmingthang hnak za awng lo tu le i thangphathnak hmu awng lo tu a hla ngai ai tikulh songah umtu te hnenah hlat tuh ing. Amahte in i thangphathnak khiah Gentile mite hnenah rel tuh i. 20Ciafangin amahte in ning unaute khiah Bawipa hnenah a hlu in pe tuhin, ram cangcang in siphuh le siphuhleng le lak le kala-uk le laang kawmin a cianghlim i Jerusalem ah, Israel mite in Bawipa inn ah a hlu khiah a ciang bel thawn kawih bangin, kawih tuh i.”ti in Bawipa in rel i. 21“Cen a hrekkhatte khiah phungki le Levi mite ca in lang tuh ing.”ti in Bawipa in rel i.
22 “Zaimanti fangin, i bawn tuhhnak van thar le laipua thar khiah i hmai ah taang tuh ngio bangin, ning fate le ning hming khiah taang tuh ngio i.”ti in Bawipa in rel i. 23“Ciafangin, hla thar in hla thar tian, Sabbath in Sabbath tian, mi hmuahhmuah in i bia tuhin kawi tuh i.”ti in Bawipa in rel i. 24“Ciafangin amahte khai feh tuhai, i lakah sual tute vuitum khiah sik tuh i. Ziangmanti fangin amahte pangang khiah thi tuh lo i. Amahte mai khai hmit tuh lo i. Amahte khiah mi hmuah in hua tuh i.”
01/23/99:12:50PM; 12/26/20163:41PM