1 “I zawt lo tute in i zong i.
I sii lo tute in i tawk i.
I hming ai ko lohnak mi phun pakhat hnenah,
kaimah in, ‘Heta ah ing, heta ah ing.’
ti in rel ing.
2 Mi tawng thai cio,
a pha lo lampui ah vak thai ngio,
3 A catlo in i hmai ah thinraw tuh in
i tawk thai,
Vuandum songah raithawi thai,
Ukkhe awlta vumah rimhmui tai thai,
4 Hlankua lakah to thai,
Hlankua songah zancaam thai,
Voksa ei thai,
Ningdul kuk kawkti khiah
amahte bel songah dah thai,
5 Cen, “Tlan tu teu. I hnenah kawi mah.
Ziangmanti fangin nangmah hnak in
cianghlim sawn ing.” ti thai mite hnenah
sunnivui in i kut thawn hawl ing.
He mite khiah i hnarkua songai maikhu le
sunnivui ai kanghnak mai bang i.
6 “Sik tuu-ih. I hlanah ngan cia zo i:
Pong lo in um tuh lo ing. Rul tuh ing.
Amahte kaang songah rul tuh ing.
7 Ning sualhnak le ning paate sualhnak
khiah ning rul tuh ing.”
“Mualtlang vumah rimhmui tai ai,
Tlang vumah zauh i suam manin,
Amahte naper awnghnak khiah
amahte kaang songah teh sah tuh ing.”
ti in Bawipa in rel i.
8 Bawipa in,
“Capitti bor songah, capittizu thar khiah um ai,
Mi pakhat in, ‘Cia cipitti bor khiah hnawm mah.
A songai hmuifu umi lai.’ti in rel bangin,
I hnenumte ca manin bawn tuh ing.
A veksenin rek tuh lo ing.
9 Jacob songai suakhnak fate le
Judah songin i mualpui roco tu tuh kawih tuh ing.
I rilhnak te in co tuh i.
I hnenum in ciata ah khuato tuh i.
10 I sii tu i minungte ca in,
Sharon khiah tu le me rual leng hmun cang tuh i.
Achor Rawn zawllai khai kawlpawte bual hmun cang tuh i.
11 Ikhalselai ningte khiah Bawipa zam tu,
a Cianghlim i mualtlang hai tu,
Gad ca ai cabuai pharh tu,
Milimte hnenah ding tuh hlu tu te i si.
12 Ciamanin vangsau ca in ning siar tuh ing.
Ning veksenin rek tuhin ut tuh i si.
Ziangmanti fangin, ning ko fangin,
i awi lo i si.
Thu ning rel fangin, i ngai lo i si.
Ikhalselai i hmai ah a pha lo bawn ai,
I lungkhim lohnak sawn ril i si.”ti in rel i.
13 Ciamanin Bawipa Pathian in,
“Sik tuu-ih. I hnenumte in ei tuh i.
Ikhalselai ri ning kaam tuh i.
Sik tuu-ih. I hnenumte in ding tuh i.
Ikhalselai ti ning haal tuh i.
Sik tuu-ih. I hnenumte in ang tuh i.
I khalselai zak ning thi tuh i.
14 Sik tuu-ih. I hnenumte in ang manin lasa tuh i.
Ikhalselai lungsia in kap tuh i si.
Thin ur in kap tuh i si.
15 I irhnak mite hnenah ning hming khiah
awrsia bangin hlum tuh i si.
Ziangmanti fangin Bawipa Pathian in
ning rek tuh ai a hnenumte khiah a hming dangin ko tuh i.
16 Ciamanin laivumah amah veve hmuifu bur tu khiah
Thuhman Pathian hming in hmuifu bur tuh i.
Cen laivumah cukcam tute in
Pathian hming in cukcam tuh i.
Ziangmanti fangin a hlan ai harsahnak khiah hai tuh sio ai,
Amahte khiah i hmai in thup tuh sio i.
17 Ziangmanti fangin van thar le laipua thai bawn ing.
A hlan ai te khiah hih tuh lo ai hai tuh i.
18 Ikhalselai i bawnhnak lakah kumzangza in ang tuu-ih.
Ziangmanti fangin Jerusalem khiah
angkul khua in bawn tuh ing.
A minungte khai ang tuhin bawn tuh ing.
19 Jerusalem le i minungte lakah i ang tuh i.
A songah lungsiahnak aw khiah za tuh lo i hang.
Kaphnak aw khai za tuh lo i.
20 Nausente khai ni tlawm niu lek nung tuh lo i.
Cen patar te khai a kum khim hlanah thi tuh lo i.
Ziangmanti fangin naupang te khai kum zakhat fangin thi tuh i.
Ikhalselai misualte kum zakhat nung tu khiah awrsia in cam tuh i.
21 Amahte in inn sa tuhai hluh tuh i.
Capit vuandum bawn tuhai a thai ei tuh i.
22 Amahte in inn sa in mi dang in hluh tuh lo i.
Amahte in bir in mi dang in ei sah tuh lo i.
Thingkung bangin i minungte khai i tuh ve i.
I rilhnak te in amahte kut ai perhnak khiah a rai ngai ei tuh i.
23 Amahte in a lovang in naper tuh lo i.
A fate khai hnaihnok tuhin te tuh lo i.
Ziangmanti fangin amahte khiah a fate kawmin
Bawipa ai hmuifu burhnak mite tesin fate i tuh i.
24 Ciafangin amahte in i ko hlanah awi tuh ing.
Amahte in pong laitak in, kaimah in za sah tuh ing.
25 Mahleng le tu faniu khai hmunkhat in
rong ei tlang tuh i.
Chintit in kawlpaw bangin hampa ei tuh i.
Laivut khiah rul rong i tuh i.
A cianghlim i mual vumah amahte in
ur ruai in rek dun tuh lo i.” ti in Bawipa in rel i.