1 “Fatong fa nai awng lo te, lasa tuu-ih.
Nau kai awng lo tute in,
A cawm ngai in lasa tu lianglo ih.
Ziangmanti fangin zaikhai um lo hmun ai fate
khiah pa nai nupui fate tah in tam sawn i.”
ti in Bawipa in ti i.
2 Ning buk khiah kau ruai tuu-ih.
Ning buk ai zarhnak pon khiah a kau ngai in
rin in zar tuu-ih.
Zah lo in kau ruai tuu-ih.
Ning rihual khiah sau ruai tuu-ih.
Laipua songai ning khenhnak thingkak khiah
a kho ngai in khen tuu-ih.
3 Ziangmanti fangin kiahhan lam le kekeh lamah
ning zaai tuh i.
Ning tesin fate in mi phun hmuahhmuah khiah
ro bangin co tuh i.
A zamhnak khuapuite khiah amahte in
hluh leh tuh i.
4 “Lau mah ih. Zak ning thi tuh lo i.
Hmaisia mah ih. Zak ning thi ruai tuh lo i.
Ziangmanti fangin ning nau lai ai
zakthihnak khiah hai tuh i si.
Hmaitong manin zauhsuam hnak khiah
hih leh tuh lo i hang si.
5 Ziangmanti fangin na Bawntu pa khiah na pa i.
A hming khiah vancung mite Bawipa i.
Na Luangtlantu khiah Israel mite a Cianghlim Pa i.
Amah khiah laivum pumpalah Pathian ti in ko i.
6 Ziangmanti fangin nangmah khiah
a pa ai zam manin lungsia ai umtu nupui bangin le,
fenu niu lai in pa nai awng ai a pa in hlumhnak
nupui bangin, Bawipa in na ko zo i.”ti in
na Pathian in rel i.
7 “Campuikhat ngawn na zaam lio ing.
Ikhalselai ngaihharhnak lian ngai thawn
na khawm leh tuh ing.
8 Campuikhat ngawn i raw manin na hnenin
i hmai khiah thup lio ing.
Ikhalselai kumzangza ithnak thawn,
ngaih na har tuh ing.”ti in na Luangtlan tu
Bawipa in rel i.
9 “Ziangmanti fangin he khiah Noah san ai
tilawi bang i.
Ziangmanti fangin Noah san ai tilawi in
laivum khiah cum tuh lo i hang ti in cuk i cam awng bangin,
Ning lakah i raw in ning hau tuh lo i hang ing
ti in cukcam zo ing.
10 Ziangmanti fangin mual te khiah tlan in
tlang te khiah thawn rinin
I ngaihharhnak khiah ning hnenin tlan tuh lo i.
Thinnuamhnak i thukham khai thawn tuh lo i.”
ti in ning ngaihhartu Bawipa in rel i.
11 Aw rimsu ai, khuahu ai seuhnak le
thinnuamhnak ngah lailotu ningte,
A mawi ngai lungto thawn ning sa tuh ing.
Ning ham khiah safaia lungto thawn ning sa tuh ing.
12 Ning padipuak khiah rubi thawn sa tuh ing.
Ning dawngkham khiah lungvar thawn,
ning sen khiah a mankhung lungto thawn ning sak tuh ing.
13 Ning fate khiah Bawipa in cuk tuhai,
ning fate in thinnuam ngai in um tuh i.
14 Dikcanghnak thawn a kho ngai in um tuh i si.
Aisu in khai ning nem tuh lo i.
Zai khai ning lau tuh lo i.
Ziangmanti fangin laukulhnak khiah
ning nongah hleng tuh lo i.
15 Amahte in ning tawng tuhin tai tuh i.
Ikhalselai kai ai ruaihnak manin i tuh lo i.
Ning tawng tuhai tai tute khiah kaimah manin
sung tuh lo i.
16 “Pumsu tu pakhat bawn zo ing.
Amah in maihol khiah maiko tuhin hmut i.
A naperhnak karihza khiah kawih i.
Hnawmcan tu tuhin hnawmcantu khai bawn zo ing.
17 Ning tawng tuhin zai bang raal thilthuam in khai
ning neh tuh lo i.
Ning cawh tuhai pong tute khiah ningmah in cawh tuh i si.
He khiah Bawipa hnenumte ai co tuh ro i.
Amahte dikcanghnak khiah kaimah in pehnak i.”
ti in Bawipa in rel i.