1 Aisu in kin thanhnak thu khiah kin sang sah i?
Bawipa banpui khiah aisu hnenah lar ruai i?
2 Ziangmanti fangin amah khiah amah hmai ah
thing sen niu bangin khang tuh i.
Lai ro songai suahhnak hnuk bang tuh i.
Amah khiah a hmel le a pum khiah a mawihnak nai lo i.
Amah khiah kin hmu fangin,
kin ir tuhhnak a mawi pakhat bang khai um lo i.
3 Amah khiah mi ai nautat hnak le mi ai hnawlhnak i.
Mi lungsia tu pa i ai lungsiahnak khiah ling liang i.
Kin hmai khiah amah hmunin thup i sing.
Amah khiah nautat ai amah khiah zai khai nam lo i sing.
4 Amah in kin urhnak khiah kin tuar sah ai,
Kin lungsiahnak khiah kin phur sah i.
Ikhalselai amah khiah Pathian in ur ruai ai,
vit ai harsa ruai i, ti in ruat i sing.
5 Ikhalselai kin sualhnak manin amah in dawt hnak tuar i.
Kin mawhhnak manin amah khiah pem ruai i.
Kin thinnuamhnak tuhin amah in cawhkuan tuar i.
A maa in kin te khiah kin cak ruai zo i.
6 Kinte khiah tute bang in lamtler sio i sing.
Kin veksenin kinmah hlanlam ten vak i sing.
Bawipa in kin veksen mawhhnak hmuah a vumah dah i.
7 Amah khiah nemh ai amah khiah rimsu ruai i.
Ikhalselai amah in a kaa khiah hong lo i.
Amah khiah rek tuhin tu niu bangin kawih i.
Tu khiah a hmul met tu te hmai ah dapniu in um bangin,
Ani in a kaa khiah hong veng lo i.
8 Amah khiah thawng song le thukhan hmunin fehpui i.
Aisu in a tesin fate khiah rel sah thill tuh i?
Ziangmanti fangin amah khiah a nung mite ramin rek lio i.
I minung te sualhnak manin amah khiah rek i.
9 A thi fangin amah khiah misualte vuihmun hlanah le
milian te vuihmun hlanah dah i.
Ziangmanti fangin amah in a pha lo bawn lo i.
A ka songah khai mizawlhnak pon um lo i.
10 Ikhalselai amah khiah Bawipa in pem ruai
tuhin lungkhim i.
Amah in amah khiah ur ruai i.
Nangmah in a nunhnak khiah sualhnak ca in hlu fangin,
Amah in a cii khiah hmu tuh ai,
Amah in a nunhnak khiah sau ruai tuh i.
A kut songah Bawipa anghnak khaang tuh i.
11 Amah in a thin urhnak khiah hmu tuhai lungkhim tuh i.
A fimhnak in a dikcang i Hnenum Pa in
mi tam ngai khiah luat ruai tuh i.
Ziangmanti fangin amah in
amahte sualhnak khiah phur sah tuh i.
12 Ciamanin amah in ro tamngai co tuh i.
Cen mi rokhnak thilri khai milian te thawn khan tuh i.
Ziangmanti fangin a nunhnak khiah liam in thi ai,
amah khiah misualte camra in siarhnak tuar i.
Cen amah in mi tamngai te sualhnak khiah phur sah ai,
misualte ca in ninghio kun sah i.