1 I ithnak hnenah, a vuandum thu lasak tuh ing.
I ithnak in mual hiang laipua pha ngai vumah
capit vuandum pakhat nai i.
2 Amah in cia laipua khiah co ai lungtote khiah
khul sio ben fangin a pha ber letlo capit cing i.
A vuandum laiteng ah inn saang ngai sa i.
Cen capitti rialhmun cet khai sa i.
Ciamanin a thai pha ngai thai umm i.
Ikhalselai a pha lo thai thai i.
3 “Jerusalem ai umtu le Judah minungte,
Kaimah le i vuandum khiah thu i khan sah tuu-ih.
4 I vuandum ah i bawn lohnak a dang zai bawn tuh um pa lai?
Ilekhaw zaimanin kai in a thai a pha
thai tuh umm ta ve ai a pha lo thai sawn thai i pa?
5 I vuandum lakah zai bawn tuh ing ti ning rel ngang.
A renhnak sen khiah bal ngangkhaw, mai in kang tuh i.
6 Zai khai po lo in dah tuh ing.
Hlawr khai hlawr tuh lo ing.
Co khai co tuh lo ing.
Ikhalselai maimaw le hling kungte po tuh i.
Cen mairo te khiah a vumah ruahsii tuh lo in
kham tuh ing.”
7 Ziangmanti fangin vancung mite
Bawipa vuandum khiah Israel mite i.
Judah minungte khiah a hmuhhiam hnak thingkung i.
Amah in thuhman um tuh vuah in sik ai,
Nemh dunhnak lek um i.
Dikcanghnak um tuh vuah in sik ai
kaphnak lek um i.
8 Inn pakhat le inn pakhat khiah zomdun ai
lo pakhat le lo pakhat khiah pehdun ai
a dang umhmun um lo ai amahte lek in
cia hmun laiteng ah um tute khiah rim lo su tu selaw!
9 Vancung mite Bawipa in,
“Thungai in, inn lian ngaingai le
inn mawi ngaingai te khiah aisu in
khai hluh lo in dapsek in zam tuh i.
10 Vuandum acre sawmkhat in
capitti pung khat lek suak tuh i.
Rongci voh khat cing in
rong ephah khat lek khawm tuh i.”
ti in i zak in rel i.
11 A ri thai zu ding tuhin zingtla niu in tho ai,
Capittizu in amahte khiah kang hlanlo
Zanlam tian ai ding tu te khiah rimsu tu selaw!
12 Amahte puai songah congcing le guitar le
titilu le capittizu um bial i.
Ikhalselai amahte in Bawipa naper le
amah kut ai bawnhnakte khiah zainam sah lo i.
13 Ciamanin i minungte in fimhnak nai lo manin,
amahte khiah a raalte in pom sek i.
A bawite khiah rikam in um ai,
Mirunpui khiah tihal in rokeng in um i.
14 Ciamanin hell in a inn khiah kau ruai ai,
a kaa khiah siar zolo in hong i.
Cia hell songah a bawite le mirunpui khiah
laam kong le lasa kongin lut tuh hialho i.
15 Mite khiah niam ruai tuhai,
aisu hmuah khiah thin niam ruai tuh i.
Mi hngal te mit khiah niam ruai tuh i.
16 Ikhalselai vancung mite Bawipa khiah
a thukhanhnak manin saang ruai tuh i.
A cianghlim Pathian in a cianghlimhnak
khiah dikcang hnak thawn hmuh tuh i.
17 Ciafangin tu niute in amahte hampa vumah leng tuhai,
A thau te hnawmborh lon hmunah
mikhualte in ei tuh i.
18 Sualhnak khiah hngalhnak rihual thawn
duk tu le sualhnak khiah kawlpaw leng rihual thawn
duk tute khiah rimsu tu selaw.
19 Amahte in, “Pathian in a perhnak khiah
a rang in per tu seh.
Hmu kin nuam i.
Israel a Cianghlim Pa in kin nongah kawi tu seh.
Ling kin nuam i.” ti in rel i.
20 A pha lo khiah a pha ti in ko ai a pha khiah
a pha lo ti in ko tute vumah rimsu hnak hleng tu seh.
Amahte in khuavar khiah khuathim ti i.
Khuathim khiah khuavar ti i.
A khaa khiah a hlum ti ai a hlum khiah a khaa ti i.
21 Amahte veve khiah mifim ai ruat tu le mifim ai
hmu tu te vumah rimsu hnak hleng tu seh.
22 Capittizu ding thai rauh le a ri thai zu
rawih thai hnelhno te vumah rimsu hnak hleng tu seh.
23 He mite in nawhthuh lang in misualte khiah
luat ruai ai mi dikcangte khiah a hman in
thukhan sah lo i.
24 Ciamanin mai in nimden kung kang ai,
vaikung khiah mailei in hlum sio bangin,
Amahte hnuk khiah hmon tuh sio ai,
Amahte papar khai laivut bangin hli in lan tuh sio i.
Ziangmanti fangin amahte in vancung mite
Bawipa thukham khiah hlun lo ai,
Israel a Cianghlim Pa thu khiah zainam sah lo i.
25 Ciamanin Bawipa khiah
a minungte lakah thinraw i.
Amahte vit tuhin a kut khiah daang zo i.
Amahte khiah seu ai, tlaangte khai hlin i.
Amahte vuitum khai lamceh lakah
hnawmborh bang i.
Hete veksen manin a thinraw lawm lo ai,
A kut khai daang hlen i lai.
26 Amah in a lan khiah a hla ngai in
mi phun hmuahhmuah hnenah tar tuh i.
Laivum a tong hmunin amahte hnenah
singsir tum tuh i.
Amahte khiah a rang ngai in kawi tuh i.
27 Amahte lakah pakhat bang khai cawl tuh lo i.
Bah khai bah tuh lo i.
Amahte khiah mitmu tuh lo i.
Taal khai haal tuh lo i.
A el ai amahte elpen khai hawk tuh lo i.
Amahte kedawl ri khai cat tuh lo i.
28 Amahte conkiang khiah san ngai i.
Amahte kahpuk khai a er sa liang i.
Amahte siphuh ke khai lungto bang i.
Amahte leeng khai khuahupui bang i.
29 Amahte hukhnak khiah chintit huk bang i tuh i.
Amahte in chintit niute bang in huk tuh i.
Amahte in huk in ramsate khiah dawp ai,
A him hmunah amahte in phur tuh i.
Aisu in khai cia ramsa khiah luat ruai tuh lo i.
30 Cia nia ah amahte in amahte lakah
tipui huk bangin huk tuh i.
Mi pakhat in cia ram hnen lamah sik selai,
Khuathim le lungsiahnak hmu tuh i.
Khuavar khai mairo in thim ruai lio i.