1 Cia thu khiah Hezekiah in za fangin, ani khai a thilthuam khiah zik ai vaidip sil in Bawipa inn songah lut i. 2Ciafangin Hezekiah in kumpibaw inn kilkhawltu Eliakim le cazi Shebna le phungki upate khiah vaidip sil ruai ai, Amoz fapa prawfet Isaiah hnenah feh ruai i. 3Ciafangin amahte in Isaiah hnenah, “Hezekiah in, ‘Tunnia khiah rimsu nia, hauhnak nia le zakthi kul nia i. Ziangmanti fangin nausen te banghma napui ai, a te tuhin tha nai nawn lo i. 4Rabshakeh bawipa Assiria kumpibawipa in a nung Pathian zauhsuamhnak pon khiah Rabshakeh in relhnak khiah na Bawipa Pathian in za in lo hau thai pang i. Ciamanin a tanghnak lam Judah mite ca in sawnget tu,’ti in ti i,”ti in rel i.
5 Ciamanin Kumpibawipa Hezekiah hnenumte khai Isiaih hnenah kawi i. 6Ciafangin Isaiah in amahte hnenah, “Ning bawipa hnenah, ‘Bawipa in, “Assiria kumpibawipa hnenumte ai zauh i suamhnak pon ning zahnak manin lau mah ih. 7Amah vumah rauhla pakhat hlat tuh ing. Ciafangin in amah in thudon khiah za tuh ai amah ramah let leh tuh i. Ciafangin amah ramah vangsau thawn thi ruai tuh ing,”ti i,’ti in rel tuu-ih,”ti in rel i.
8 Rabshakeh in Assiria kumpibawipa khiah Lachish in thawn i ti khiah za fangin, Ranshakeh khai let ai Assiria kumpibawipa khiah Libnah tawng lak in tawk i. 9Cen Assiria kumpibawipa in, Ethiopia kumpibawipa Tirhakah in amah tawng tuhin kawi i ti khai za i. Ciamanin Hezekiah hnenah a hnenumte khiah hlat leh thio ai, 10“Hezekiah hnenah, ‘Ning Pathian in, “Jerusalem khiah Assiria kumpibawi kut songah pe tuh lo i,”ti in ning zawl ma seh. 11 Assiria kumpibawite in mi dang ram hmuahhmuah khiah neh sio khiah za zo i si. Ciamanin na luat tuh im? 12I paa ai nehhnak ram Gozan le Haran le Rezeph le Telasser ai Eden mite pathiante in amahte khiah o ben awm? 13Hamath kumpibawi le Arpad kumpibawi le Sepharvaim le Hena le Ivah khuate kumpibawi tang a konah i hang?’ti in rel tuu-ih,”ti in hlat i.
14 Hezekiah in cia lai khiah a hnenumte hnenin ngah ai siar i. Hezekiah khai Bawipa inn ah hong ai cia lai khiah Bawipa hmai ah pharh i. 15Ciafangin Hezekiah khai Bawipa hmai ah, 16“Aw, Israel Bawipa Pathian, cherubim laklawh ai umtu, nangmah lek khiah laivum kumpibawi veksen vumah Pathian i si. Nangmah in van le laivum bawn i si. 17Aw Bawipa, na naa thawn kin ngai sah tu. Aw Bawipa, na mit khiah hong in sik tu. A nung Pathian zauhsuam tuhin kuathnak Sennacherib pon khiah ngai tu. 18Bawipa, Assiria kumpibawite in mi ram dang khiah hnawm sah peu ai, 19ciate pathian khai mai in tai sah peu i. Ziangmanti fangin amahte khiah pathian i lo ai minung kut ai bawnhnak thing le lungto te i. Ciamanin amahte in cia pathiante khiah hnawmcan berh i. 20Ciamanin, aw Bawipa kin Pathian, a kut song in kin o tulai, laivum ai kumpibawi hmuah in nangmah lek khiah Bawipa Pathian i ti in na ling tu seh,”ti in sawngen i.
21 Ciafangin Amoz fapa Isaiah in Hezekiah hnenah, “Israel Bawipa Pathian in, ‘Assiria kumpibawipa Sennacherib manin i hnenah nangmah in sawngen manin, 22Hetih bangin Bawipa in Sennacherib thu khiah rel i:
‘Zion fenu in nau na tat ai hnih na cip i.
Jerusalem fenu in na khelleh lamin amate lu khiah leuh i.
23 Aisu khiah nang in zauhsuam ai awrsia in cam i si?
Aisu lakah na aw khiah huuk in na mit thawn a hngal in sik i si?
Cia khiah Israel a Cianghlim Pa lakah bawn i si.
24 Na hnenumte thawn Bawipa khiah zauhsuam rauh i si.
Nangmah in, “I siphuhleng te kawmin
Lebanon mualvum a sangber hmunah kai ben ing.
Lebanon ai a sangber sida thingte le
a phaber farthing te khiah vawng tuh ing.
A sangber letlo hmunah lut tuh ing.
A tupui songah lut tuh ing.
25 Mi ram dangah namkum tamngai co zo ai
cia namkumte songai ti khai ding zo ing.
I keruh thawn Izip rawnti khiah kaang ruai berh ing,”ti i si.
26 Za awng lo i sim?
He hlan a raipui lai in bawn zo ing.
He hlan a raipui lai in ruatcia zo ing.
Tun fangin nangmah in a kulhnak khuapuite khiah
hnawm sio in dah tuhin kaimah in khim ruai ing.
27 Ciamanin cia khua ai umtute in tha nai tau lo i.
Amahte khiah thincawl ai zakthi ruai i.
Amahte khiah lo lai ai hampa le hnuh hing te bang i.
Innphu vumah po ai a khang hlanah ni in
kang liohnak hampa bang i.
28 Ikhalselai na umhmun le na feh hmun le na tlung hmun le
i lakah na rawhnak khai na ling sah ing.
29 I lakah na rawhnak le a luahkul na nuncan khiah
i naa songah hleng zo i.
Ciamanin i thir huk thawn na hnar na thil tuh ai,
na kahmur ah i kakharh thawn na kharh tuh ing.
Na hleng hmun lampui in na tlung ruai leh tuh ing.
30 He khiah Hezekiah, nangmah ca in hnikhnaihhnak i tuh i:
Amah thu ai pohnak rong khiah tun kumah ei tuh i si.
A kum nihhnak fangin cia rong ai pohnak ei tuh i si.
Ikhalselai a kum thumhnak fangin rong cing in rongkhawm tuu-ih.
Capit khiah bir in a thai ei tuu-ih.
31 Judah mi lakai a taanghnak mite in
a hnialam ah hnuk hla tuhai a vumlam ah thai tuh i.
32 Ziangmanti fangin Jerusalem songin a taanghnak mite suak tuhai,
Zion Mual vumin a tlan ngah tute suak tuh i.
He khiah vancung mite Bawipa in a hiam ngai in bawn tuh i.’ti in ti i.
33 Ciamanin Bawipa in Assiria kumpibawipa thu khiah,
‘Amah in he khua songah lut tuh lo i.
Ciata ah amah in conkiang khai kap tuh lo i.
Cen a hmai ah lum thawn khai kawi tuh lo i.
Cen cia khua kulh tuhin laipua khai pum tuh lo i.
34 A hleng hmun lampui pah in let leh tuh i.
Amah in he khua songah lut tuh lo i,’ti in Bawipa in rel i.
35 Ziangmanti fangin Kaimah ca le i hnenum David ca in
he khua khiah kaimah in tawngin o tuh ing,’ ti in ti i,”ti in rel i.
36 Ciale zan khat ah Bawipa vancung mi khai suak ai, Assiria raalkapte thawng za le sawmriat le thawng nga khiah rek i. Mite khai a thangha zingniu in tho fangin a veksen in mithi cang sio i. 37Ciamanin Assiria kumpibawipa Sennacherib khai ciata in let ai a khua ah tlung le Nineveh ah um ngio i. 38Sennacherib khai a pathian Nisroch temple songah Nisroch bia in um teng fangin, a fapa Adrammelech le Sharezer in vangsau thawnin amah khiah rek ben fangin anite khai Ararat ramah tlan kawm i. Cia fangin a fapa Esarhaddon in a ca in kumpibawi cang i.