1 Ning rok napui lo ai mite rok tu,
Ning zuar napui lo ai mite khiah zuartu,
Rim ning su tu selaw.
Ningte in mi zuar awl fangin,
Amahte in ning zuar thun tuh i.
2 Aw Bawipa, ngaih kin har tu.
Nangmah khiah na iang i ing.
Zing siar in kin hat ruai tu.
Rim kin su fangin kin o tu.
3 Khuari bangin na aw za fangin,
mi te khiah tlan sio i.
Nangmah khiah tho fangin,
mi phun hmuahhmuah peu sio i.
4 Na rokhnak thilte khiah,
pangangte in khawm bangin, na khawm sah tuh i.
Khokhuak te dawp lianglo bangin,
amah in amahte vumah dawp tuh i.
5 Bawipa khiah hming thang i.
Ziangmanti fangin amah khiah vancung ah um i.
Amah in Zion khiah thuhman le
dikcanghnak thawn dim ruai i.
6 Amah khiah ning san songah, fimhnak le linghnak le
ohnak tamngai thawn, ning kho ruai tu i tuh i.
Bawipa kih hal tute in cia hlawnthil co tuh i.
7 Amahte lakai raalpha ngai mite khiah sumpua ah kap i.
Remhnak kawih tu nalaangte khiah lungsia ngai in kap tuh i.
8 Lamceh pui vumah aisu khai khualsi in vak nawn lo i.
Amah in lungkhim dunhnak thukham khiah pilh ruai i.
Amah in khuate khiah nautat i.
Amah in aisu khai zainam lo i.
9 Laipua khai kap ai hnawm lio i.
Lebanon khai zakthi in ton lio i.
Sharon khai nelrawn bang in cang i.
Bashan le Carmel te thai khai tlok sio i.
10 Bawipa in, “Tunin tho tuh ing.
Tunin hming i thang tuh i.
Kaimah veve do tuh ing.
11 Ningte in vaikung khiah nau bangin paai i si.
Ning songin hampa ro te tuh i.
Ning haihawh in mai bangin ning kang tuh i.
12 Mite khiah miphio bangin kang tuh i.
Hling bangin cem tuhai mai songah tai tuh i.
13 A hlangai ai umtute, i bawnhnak khiah za tuuih.
A nong ai umtute, i huthawm khiah ling tuu-ih.”ti in rel i.
14 Zion khua songai misualte khiah lau i.
Mileplete khai lau ve i.
“Kin lakah aisu in mai kang tuar ben tuh i sing?
Kin lakah aisu in kumzangza kanghnak mai songah um ben tuh i?”
ti in rel i.
15 Dikcang niu ai nung tu le thuhman rel tu le
Mi thilri sut ai miat lo tu,
Nawhthuh saang lo tu,
Mirek tuh thu khiah ngai lo tu,
A pha lo khiah sik lo tu,
16 Cia pa khiah a sangber hmunah um tuh i.
A buanhmun khiah lungpui vumai raal relh hmun inn i tuh i.
Amah khiah rong le ti pe tuh i.
17 Na mit in Kumpibawipa a mawihhnak khiah hmu tuh i si.
A hla ngai ram khiah hmu tuh i si.
18 Hlanlai ai ning lau awnghnak khiah ruat tuh i si:
“A bawi upaber khiah akonah i?
Siahdawng tu pa khiah akonah i?
Inn sangngai kil tute khiah akonah i?”ti in ngaisung tuh i si.
19 Ningte in khia mi puarte khiah hmu tuh nawn lo i si.
A ponghnak ling sah thill lo mite khiah hmu tuh nawn lo i si.
20 Kin puai bawn hmun tuh Jerusalem khiah sik tuu-ih.
Jerusalem khiah a remniu in um in hmu tuh i si.
Tabernacle buk khiah bal tuh nawn lo i.
A zaarhnak rihual te khiah cat ruai tuh lo i.
Cen rihual sih hmun thing tante khai phok tuh lo i.
21 Ikhalselai a songlawi ngai Bawipa khiah
kin ca ah run le rawn kau ngai bang i tuh i.
Cia ti songah timbawte khiah
a cawkhnak kawmin feh tuh lo i.
Cen a songlawi timbawite khai khel tuh lo i.
22 Ziangmanti fangin Bawipa khiah kin Thukhantu i.
Bawipa khiah Dan Upadi kin pe tu i.
Bawipa khiah kin Kumpibawipa i.
Amah in kin o tuh i.
23 Ning rihual khiah dolh manin,
Pon zar hmun tuh khuam khiah tung thil lo i.
Ciamanin pon zar thill lo i.
Ciafangin a rokhnak thilri tamngai khiah khan tlang tuhai,
Thanai lote rinin co ngah tuh i.
24 Zion ai umtute in, “I ur i.”ti in rel tuh lo i.
Zion khua songai umtute sualhnak khiah hlat sah tuh i.