Isaiah 30

<<  ISAIAH 30  >>

1 Bawipa in, “Thungai nuam thai lo fate khiah rimsu tu selaw.
Mi dang tu thu zawt ai, kai sawn tu i zawt lo i.
Tumhnak tamngai nai napui ai, i Ciang Rauhla tu sawm lo i.
Ciamanin sualhnak pakhat hnua pakhat in sual i.

2  Pharoah bawmhnak sii tuhin le
Izip nihlim ben tuhin Izip ah zu tuhin feh i.
Ikhalselai i zawt hmasa lo i.

3 Ciamanin Izip tha khiah ning zakthihnak cang tuh i.
Izip nihlim ning ben manin mi zauhsuamhnak ning cang tuh i.

4 Ziangmanti fangin a bawite khiah Zoan ah um i.
A tlangsuakte khiah Hanes ah hleng i.

5 Ikhalselai aisu hmuah khiah zakthi tuh i.
Ziangmanti fangin amahte khiah amahte ca ah zai khai hnempui lo i.
Bawm khai bawm ben lo i. Hnempuihnak khai um lo ai
Zakthi kul le hmaisia hnak lek um i.”ti in rel i.

6 Hlanglam ai ramsate ca thilrit thu.
Rimsu le harsahnak ram,
chintit pa le chintit nu hleng hmun ram,
a ru nai rul le a zuang thai mai bang rul um hmun ram songin,
Amahte in amahte naihhnak khiah lak vumah phur tuh i.
Kala-uk vumah amahte hlawnthil khiah phur tuh i.
Zai hnempui lo mi phunte hnenah kawih tuh i.

7 Izip ah kawih tuh i. Ikhalselai amahte in bawm ben tuh veng lo i.
Ciamanin amah khiah Rahab-Hem-Shebeth ti in ko zo ing.

8 Tunin feh tulai, kumzangza in um thai in,
amahte hmai ah, lungtlep vumah ngan tu. Laihnah vumah khum tu.

9 Hete khiah mi tawng thai, thudon rel thai mi,
Bawipa thukham ngai nuam thai lo mi te i.

10 Prawfet te hnenah, “Hmu mah ih.
A hman thu rel mah ih.
Thu nem thu kin rel tuu-ih.
Thudon thu rel tuu-ih.

11 Tlan tu teu ih. Lam tler tu teu ih.
Israel mite a Cianghlim Pa khiah
kin hmai ah um ma seh.”ti in rel i.

12 Ciamanin Israel mite a Cianghlim Pa in,
“Ningte in he thu khiah zainam lo ai
Mi rok tuh le sualhnak lampui sawn sang ai rinsan i si.

13 Ciamanin he sualhnak khiah ning hnenah,
khua renhnak sen khiah khoi ai camalak in tlu lio bang in hleng tuh i.

14 Amah in bel bawntu pa bel bangin khoi tuh sio ai zah tuh lo i.
Ciamanin bel khiah khoi sio manin, lungthu songai
mai bel le tikhur ai ticawihnak tuhin bel um tuh lo i.”ti in rel i. 

15 Ziangmanti fangin Israel mite a Cianghlim Pa, Bawipa Pathian in,
Sir leh in com le isikhaw, ohnak ngah tuh i si.
Daptniu in um in sang le isikhaw, tha nai tuh i si.
Ikhalselai ning nuam lo i.

16 Ikhalselai ningte in, “Kin nuam lo i.
Siphuh to in tlan tuh i ing.”ti i si.
Ciamanin tlan tuh i si.
Cen, “A rang ngai ai dawp thai siphuh to tuh i ing.”
ti in ning rel manin,
Ning hnawhtu te khiah a rang ngai in ning hnawh tuh i.

17 Mi pakhat khiah kih in mi thawngkhat khiah tlan tuh i.
Mi panga lau in tlan tuh i si.
Mual vum ai khuam bangin le tlang vumai
tarhnak a lan bangin ning taang tuh i.

18 Ciamanin Bawipa in ngaih ning har thai in, ning iang tuh i.
Amah in ning ninghio tuh le amah khiah hming thang tuh i.
Ziangmanti fangin Bawipa khiah a dikcang ai thukhantu Pathian i.
Amah naper sah tute khiah hmuifu i.

19 Ziangmanti fangin Israel mite khiah Zion ai Jerusalem ah um tuh i.
Kap tuh lo ii hang i si.
Ning kaphnak aw ning za sah fangin ngaih ning har tuh i.
Ning za sah fangin, ning awi tuh i.

20 Bawipa in raal khiah rong bangin le
Anharhnak khiah ti bangin ning pe napuikhaw,
Ning sayate khiah ning thup sah tuh lo ii hang.
Ning mit in ning sayate khiah hmu tuh i si.

21 Kiahhan lam le kekeh lamah ning her fangin,
ning hnua in, “He heh lampui i. A vumin vak tuu-ih.”
ti in relhnak pon khiah ning naa in za tuh i si.

22 Ngun thawn ai bawnhnak ning milim zukte khiah riim ruai tuh i si.
Sui thawn ai bawnhnak ning milim zukte khai riim ruai tuh i si.
Ciate khiah a rim thilrite bangin lon tuh i si.
Amahte hnenah, “Tlan tu sek ih.”ti in ruai tuh i si.

23 Ciafangin amah in laipua ah ning cing hnak
ci vumah ruahsi ruai tuhai,
Ning lo in rong tam ngai suak tuhai
Rong tam rauh in nai tuh i si.
Cia fangin ning kawlpawte khai hampa tamngai
umhmun ah leng tuh i.

24 Ciabangin lovai hnak ai hmanghnak kawlpaw cang
le lak fate khai kawpia le hli ai hmuthnak
hampa ro te ei tuh i.

25 Raalvil hmun inn sang ngai tlu ai mi tampui rek nia ah,
mual sang vum le tlang sang vum caang ah,
run ti le rawn ti tamngai luang tuh i.

26 Ciazolo ah hla khiah ni bang in var tuh i.
Ni khai let sarih tamin tleu tuhai ni sarih khuavar bang tuh i.
Cia nia ah Bawipa in a minungte hmaihma khiah pen sah tuh ai
Amahte maa khiah ur lawm ruai tuh i.

27 Bawipa hming khiah, mai bang sa a thinrawhnak le
maikhu pui thawn a hla ngai in hleng i.
A ka songah thinrawhnak thawn dim i.
A lei khai a kang thai mai thawn bang i.

28 A haihawh khai hor pui bang in luang ai, a hawng tian ban i.
Mi phun dangte khiah hnophnak khoseng songah zawi i.
Amahte khiah khelh ruai tuhin, amah ka songah kakharh dah i.

29 Ciafangin a cianghlim puai bawn zan bangin lasa tuh i si.
Mite in Bawipa mual, Israel mite Bawipa hnenah
titilu tum kongin kawi bangin, ning ang tuh i.

30 Bawipa in a aw mawi ngai khiah,
mite za ruai tuhai, a banpui khiah thinrawhnak le
a ko hiangho mai le mairopui le khuahupui le
rial kawmin a hnialam ah zuk khiah hmuh tuh i.

31 Ziangmanti fangin Bawipa aw thawn
Assiria mite khiah piak ruai tuh i.
A tokrolh thawn seu tuh i.

32 Bawipa in amahte khiah a tokrolh thawn
cawh hmun cang ah congcing le khuang tum
kong in cawh tuh i.
Amahte khiah a banpui thawn raaltawng hmunah seu tuh i.

33 Tophet khiah hlanlai in ralring zo i.
Kumpibawi ca in ralring zo i.
A mai sem hmun lungthu khiah a thuk le kau ngai i.
Mai le thing khai tamngai um i.
Bawipa haihawh in cia thingte khiah kat mai bangin,
kang ruai i.

<<  ISAIAH 30  >>