1 Jerusalem ca ai thilrit thu.
Innphu vumah kaai ang sio i si.
Zai in thin ning cawl ruai i?
2 Nangmah khiah anghnak le auhnak kawmin
ri lio ai um awng tu khua i si.
Na song ai rekhnak mite khiah vangsau thawn rekhnak i lo i.
Raaltawng ai thi hnak khai i lo i.
3 Ning uktu bawite khiah hmunkhat in tlan sio i.
Amahte khiah kakpuk kaptute in pom sek i.
Na song ai pomhnak mite khiah na raalte
a hla ngai ah um lai in tlan awng napui ai,
a veksenin thawngtla tuhin pom sio i.
4 Ciamanin kai in, “I hnenlam ah her tau mah ih.
Lungsia ngai in kap tuh ing.
I minungte in hnawmcanhnak tuar manin,
I lakah thi raal hnelhno mah ih.
5 Ziangmanti fangin, Jerusalem khua songah
vancung Bawipa Pathian in rimsuhnak le thinlauhnak
le multinghnak pe nia i.
Cia cu khiah khuarenhnak sen bal cu le
mualtlang lam sik in kap cu i.
6 Elam in conkiang dip khiah siphuhleng totute le
siphuhte kawmin phur i.
Kir in lumpui funhnak pon khiah hawk i.
7 A phaber ber ning rawn kawng songah
siphuhleng dim lio in um i.
Siphuhtotu mite khiah kawldawngkham ah tiari in um i.
8 Amah in Judah khakber hnak khiah lang lio i.
Cia nia ah Tupui songai Inn songai raltawng hnak
thilri khiah sik tuh i si.
9 David khua hnawmcanhnak khiah hmu i si.
Zaitluk in hnawm rauh i.
Cen a hniata tikhur ai ti khai cawi i si.
10 Jerusalem ai innte le khua renhnak sen kho ruai tuhin
hmang tuhin inn ning bal hnak khai siar i si.
11 A Hlun Tikhur ai ti ca in sen panih laklawh ah
tipam hmun sa i si.
Ikhalselai a bawntu Pa sawn tu sik lo i si.
Cen hlanlai ai cia ca ai tum awngtu Pa khai zainam lo i si.
12 Cia nia ah vancung Bawipa Pathian in,
Kaphnak le lungsiahnak le
Lu kolhhnak le vaidip sil in um ning ruai i.
13 Ikhalselai ning tu ang kong in
Kawlpaw le tu te ro ai
Sa le zu ding in puai bawn in um ai,
“Ei le ding in um nga sing.
Ziangmanti fangin thangha ah kin thi tuh i.”
ti in rel in um i si.
14 Vancung mite Bawipa in i zak in i rel zo i:
“He sualhnak manin na sualhnak ca in
na thi tian in sualhlathnak um tuh lo i.”ti in
vancung mite Bawipa in ti i.
15 Vancung mite Bawipa in,
“Feh tulai, kumpibawipa inn sang uktu Sheba hnenah,
16 ‘Nangmah ca tuhin a sang ngai khukua songah
hlankua co tuhin aisu in thu na pe i?
17 Aw mi bawipa, Bawipa in thinraw ngai in
na lon tuh teu i. Nangmah khiah na pom tuh rori i.
18 Amah in thinraw ngai in bawhlung bangin
nangmah khiah rampui lakah na sep tuhai,
Na thi tuh i. Ciafangin a hming thang ngai
na siphuhlengte khiah Na bawipa te innkua
zakthi ruai tu cang tuh i.
19 Ciamanin na natuan in na suah tuh lio ing.
Na umhmun in na hnawt tuh teu i.
20 Ciafangin cia nia ah Hilkiah fapa,
i hnenum Eliakim ko tuh ing.
21 Na thuam khiah amah silh tuh ing. Na elpen thawn amah khiah kho ruai ruai tuh ing. Na tavuan khiah amah pe tuh ing. Amah khiah Jerusalem le Judah ram ai umtu mite paa cang ruai tuh ing. 22David inn cabi khiah a kodar vumah haih tuh ing. Amah in hong tuhai aisu in khai kham tuh lo i. Amah in kham tuhai aisu in khai hong tuh lo i.23Amah khiah a kho hmunah tluangkhen bang in khen tuh meng ing. Amah khiah a paa innkua songah a upat kul ngai kumpibawi tauhkheng cang tuh i. 24Amahte in amah vumah a paa te innkua le a tesin fate ai thangphathnak hmuahhmuah le khuat le bel te khiah a veksenin tar tuh i. 25Vancung mite Bawipa in, ‘Cia nia ah a kho hmunah tluangkhen bang ai khenhnak pa khiah phok leh tuhai, cem tuh le tlu tuh lio i. Ciafangin a vumai tarhnak thiltom khiah cem tuh lio i. Ziangmanti fangin Bawipa in rel zo i.’ti in rel i.”ti i rel ruai i.