1 Izip ram ca ai thilrit.
Bawipa khiah mairo vumin a rang ngai in zuang ai
Izip ramah kawi tuh i.
Izip ramai milim zuk te khiah amah hmai ah tlu tuh i.
Izip mite thinlung khiah amahte lakah zuul tuh i.
2 “Izip mi le Izip mi,
Unau le unau,
Ompui le ompui,
Khua khat le khua khat,
Ram khat le ram khat tawng ruai tuh ing.
3 Izip mite khiah thin nau ruai tuh ing.
Amahte thusawm hnak khiah lovang cang ruai tuh ing.
Amahte in milim zuk te le mithi rauhla te le
tlahsantute hnen tu zawt i.
4 Izip mite khiah a puar ngai bawipa kut songah pe tuh ing.
Amahte khiah a riahsia ngai kumpibawipa in uk tuh i.”
ti in Bawipa, vancung mite Bawipa in rel i.
5 Tipui songai ti khiah kaang tuh lio i.
Runti te khiah ro tuh sio i.
6 Runti te khiah uih tuh i.
Rawnti te khiah kaang tuhai ro tuh sio i.
Phaikungte khiah voi tuh berh i.
7 Nile Runpui hiang ai le runti luanghmun ai
phaikungte le Runti hiang ai lo song ai
cinghnak te khiah ro tuh sio ai thi tuh sio i.
8 Ngadawitute khiah lungsia in kap tuh i.
Nile Runti songah nga sio tute khai lungsia tuh i.
Ti songai sur vorh tute khai thanau thasia in um tuh i.
9 Cia zolo ah vo pawi tute khai thin hnawm tuh i.
Thiamtak tute khai zakthi tuh i.
10 Thiam thawn naper tute khai thinhnawm tuh i.
Cen kuli hlawh ai napertute khai thin rimsu tuh i.
11 A ngaingai in Zoan ai bawite khiah mivoi i.
Pharoah ai mifimte in Pharoah sohnak thu khiah a lovang i.
Pharoah hnenah a kontih in,
“Kaimah khiah mifim pa ai fapa ing.
Hlanlai ai kumpibawite fapa ing,”
ti in ti tur si?
12 Na mifimte khiah a konah i hang?
Bawipa in Izip ram ca ai bawn tumhnak khiah
na mifimmite in tunin na rel tu hang seh.
13 Zoan ai bawite khiah mivoi cang sio i.
Memphis ai bawite khai mite in zawl lio i.
Izip ramai a kho ber tu minungte te in
Izip minungte khiah konghoi sual i.
14 Bawipa in amahte songah lu-am ruaitu
rauhla khiah thun manin,
zuri pa in a awk lakah tlu hnelhno bangin,
Amahte in Izip bawnhnak hmuahhmuah khiah sual ruai i.
15 Izip in a bawn thillhnak a lu le
a mai le ung kuang le
phaikuang i tu seh zai khai um lo i.
16Cia niakhua ah Izip mite khiah nupuite thawn bang tuh i. Amahte in vancung mite Bawipa ai amahte vumah a kut zap manin kih le lau in um tuh i. 17 Izip mite in Judah mite khiah kih tuh rauh i. Vancung mite Bawipa in amahte lakah bawn tumhnak manin, Judah hming za tu hmuah in lau tuh rauh i.
18Cia nia ah Izip ram ai khua panga te in Khanaan pon in pong tuhai, vancung mite Bawipa hnenah thukham tuh i. Cia khua panga songai khua pakhat khiah Hnophnak Khua ti in ko tuh i.
19Cia nia ah Izip ram laiteng ah Bawipa ca in awlta sa tuhai, Izip ramri ah Bawipa ca in khan bawn tuh i. 20Cia khan khiah Izip ramah Bawipa ca ai hnikhnaihnak le tettikhan hnak ca i tuh i. Ziangmanti fangin amahte nemhtute ai nemhhnak main, amahte in Bawipa hnenah kap tuhai, Bawipa in amahte khiah Otu le Raal bawipa pakhat khiah pe tu ai cia pa in amahte khiah luat ruai tuh i.21Cia fangin, cia nia ah Izip mite hnenah Bawipa khiah lar ruai tuhai, Izip mite in Bawipa khiah ling tuh i. Cia nia ah amahte in Bawipa hnenah raithawi tuhai, Bawipa hnenah thukham tuhai amahte thukhamhnak bangin amahte in bawn tuh i. 22Ciafangin Bawipa in amahte khiah urhnak thawn seu tuhai, amahte khiah ur ruai ben fangin bawl sah leh tuh i. Anite khai Bawipa khiah bia tuhai amahte ninghio kunhnak khiah Bawipa in ngai sah tuhai amahte khiah cak ruai tuh i.
23Cia nia ah Izip in Assiria tian lamceh pui um tuh i. Assiria mite khiah Izip ah kawi tuhai Izip mite khiah Assiria ah kawi tuh i. Assiria mite le Izip mite khiah hmunkhat in bia tlang tuh i. 24Cia nia ah Israel khiah Izip le Assiria kawmin laipua vumah hmuifu pathumhnak cang tuh i. 25Amahte khiah vancung mite Bawipa in hmuifu bur tuhai, “I minung Izip mite, i bawnhnak Assiria mite, i cohnak ro Israel mite khiah hmuifu tu seh,”ti in rel tuh i.