Genesis 17

<<  GENESIS 17  >>

1Abram khiah kum 99 fangin BAWIPA khiah a hnenah daak ai, “Kaimah khiah a Sangber Pathian ing. I hmai ah mawhhluk tuh um lo in vak tu. 2Nangmah thawn i thukamhnak khiah khim ruai tuh ing. A tamngai in na zaai ruai tuh ing.” ti in rel i.

3Abram khai a hmai ah bok ai Pathian in amah hnenah, “I thukamhnak khiah nangmah thawn lek i. Nangmah khiah mi phun tamngaite ai papui na cang tuh i. 5Na hming khai Abram i tuh lo i hang. Ikhalselai na hming khiah Abraham i tuh i. Ziangmanti fangin mi phun tamngaite papui na cang tuh i. 6A tam rauh in fa nai thai in na bawn tuh ing. Cen na songin mi phun tamngai suak ruai tuhai na songin kumpibawite suak tuh i. 7Nangmah le na tesin fate hnenah i thukamhnak khiah kumzangza thukam cang tuhin kho ruai tuhai nangmah le na tesin fapate Pathian i tuh ing. 8Cen nangmah le na tesin fate hnenah tunai na vaihmun ram Khanaan ram hmuahhmuah kumzangza co tuhin na pe tuh ing. Cen kaimah khiah amahte Pathian i tuh ing.”ti in rel i.

9Cen Pathian in Abraham hnenah, “Cen nangmah le na hnua ai na tesin fate in amahte san songah i thukam khiah hlun tuh i si. 10He khiah nangmah le na hnua ai na tesin fate in hlun tuhhnak i thukam i: Ning lakai pasal hmuah in ning vunpar cem kul tuh i si. 11Ning vunpar khiah cem tuhai cia khiah ningmah le kaimah thukam dunhnak hnikhnaihhnak i tuh i. 12Ning san songah nausen pasal khiah ni riat fangin a vunpar cem tuh i si. Cen na songai suak lo ai mi dang hnenai tangka thawn na laihnak hnenum i tu seh, na inn songai tehnak hnenum i tu seh a vunpar cem tuh i si. 13Na inn ai tehnak hnenum i tu seh, tangka thawn ai na laihnak hnenum i tu seh vunpar cem tu seh. Ciatih in i thukam khiah kumzangza thukam cang thai in ning taksa songah um tu seh. 14Ikhalselai a vunpar cem lo tu pa khiah a minung songin amah veve khan lio i. Ziangmanti fangin amah in i thukamhnak hlun lo i.” ti in rel i.

15Ciafangin Pathian in Abraham hnenah, “Cen na nu Sarai khai Sarai ti in ko ma hang. A hming khiah Sarah i tuh i. 16Amah khiah hmuifu bur tuh ing. Ciamanin amah songin fapa na pe tuh ing. Ciafangin amah khiah hmuifu bur tuhai mi phun tamngaite nuu cang tuh i. A song in kumpibawite suak tuh i.”ti in rel i. 17Cia fangin Abraham khai a hmai ah bok ai, “Kum 100 tar pa in fa nai thill nim? Cen kum 90 Sarah in tang fapai thill nim?” ti in a thin songin hni i. 18Ciafangin Abraham in Pathian hnenah, “Aw, Ishmael khiah na hmai ah lo nung ruai ngawn silai!” ti in ti i. 19Ikhalselai Pathian in, “I hlah. Ziangmanti fangin na nu Sarah in fapa na cawi tuhai a hming khiah Aizek (Isaac) ti in sa tuh i si. Cen Aizek le a tesin fate ca in Aizek thawn i thukamhnak khiah khim ruai tuh ing. 20Cen Ishmael thu ah na za sah zo ing. Sik tu. Amah khiah hmuifu bur ngangkhaw amah khiah a rauhngai in zaai in pung ruai tuh ing. Amah songin mibawi 12 suak tuhai amah khiah mi phun lianpui ah cang ruai tuh ing. 21Ikhalselai i thukamhnak tu khuavai tun cam fangin Sarah ai na cawihnak fapa Aizek thawn khim ruai tuh ing.” ti in rel i. 22Pathian in Abraham thawn pong ben fangin Abraham hmun in vancung ah hong leh teu i.

23Ciafangin Abraham in a fapa Ishmael le a inn songai tehnak a hnenumte le tangka thawn ai a laihnak hnenum pasalte khiah Pathian ai ruai bangin nikhat songin a veksenin a vunpar cem sah i. 24Abraham khiah a vunpar cem fangin kum 99 i. 25Ishmael khai a vunpar cem fangin kum 13 i. 26Abraham a vunpar cem nia ah Ishmael khai a vunpar cem ve i. 27A inn ai pasal hmuahhmuah a inn ai te tu le ram dang ai tangka thawn ai a laihnak hnenumte khiah amah thawn hmunkhat in vunpar cem tlang i.

<<  GENESIS 17  >>