1Ciafangin Bawipa in Moses hnenah, “He hmun in suak tu i lai, ‘Na tesin fate hnenah pe tuh ing.’ ti ai Abraham le Aizek le Zakuk hnenah i khamhnak ramah, Izip ramin na suahhnak mite thawn feh tuu-ih. 2I Vancungmi khiah ning hmai in feh ruai tuh ai Khanaan mite le Amor mite le Hit mite le Perez mite le Hiv mite le Jebus mite khiah hnawt tuh ing. 3Cawhnawi le khoitilu luang hmun ramah feh tuu-ih. Ikhalselai ning thawn tu feh khat tuh lo ing. Ziangmanti fangin ningte khiah mi thinruh mi ungtuangte ning i manin lamlak ah ning rek ngah mawh ngang.” ti in ti i. 4He thu sia khiah cia mite in za fangin, anite khai lungsia in kap ai aisu khai thuampar sil lo i. 5Ziangmanti fangin Bawipa in Moses hnenah, “Israel mite hnenah, ‘Ningte khiah mi thinruh mi ungtuangte i si. Ning hnenah cammalak in kawi in ning rek thai sek ing. Ciamanin ning thuam parhnak thilrite khiah hawk tu sio i lai kontih bangin ning bawn tuh khiah ruat rih tuh ing.’ti in rel tu.” ti in ruai i. 6Ciamanin Israel mite in Horeb mualtlang hiang ah amahte thuamparhnak thilri te khiah hawk sio i.
7Moses khai a buk khiah amahte caam hmun camp pua a hla thah ah thawn ai pum khawm hmun tabernacle ti in ko i. Ciafangin Bawipa hnenah thuzawt nuam tu hmuah in camp pua ai cia pum khawm hmun tabernacle ah kawi de i. 8Ciatih bangin Moses khai cia tabernacle ah kawi cang fangin, aisu hmuahhmuah khai tho ai amahte buk dawngkham ten ah ding ai Moses khai tabernacle songah lut hlan lo sik de i. 9Moses khai tabernacle songah lut cang fangin meiro pui khai zu ai tabernacle dawngkham ah ding vung ai BAWIPA in Moses khiah pon de i. 10Mi hmuahhmuah in cia meiro pui khiah tabernacle dawngkham ah ding hmu fangin anite khai amahte buk dawngkham ten ah ding ai Pathian bia i. 11Ciatih bangin Bawipa in Moses khiah hmai le hmai tonin mi pakhat in a rualpa pon bangin pon de i.
12Ciafangin Moses in Bawipa hnenah, “ ‘Sik tu! He mite khiah konghoi tu.’ ti in i ruai i si. Ikhalselai aisu in kin fehpui tuh i ti in i rel lailo i si. Inapui ai, ‘Na hming khiah na ling ing. Cen i ngaihharhnak khai ngah zo i si.’ ti in i ti i si. 13Ciamanin na ngaihharhnak khiah ngah lengkhaw na ling thillhnak tuhin le na ngaihharhnak i ngah thillhnak tuhin na lampui i hmuh tu. Cen he mite khiah na minungte i ti khiah hih tu.” ti in ti i. 14Ciafangin Bawipa in, “Kaimah in na fehpui tuh ing. Cen comhmun na pe tuh ing.”ti in rel i. 15Ciafangin Moses in, “Nangmah in kin fehpui hlahlesikhaw heta in kin thawn ruai mah. 16Ziangmanti fangin nangmah in kin fehpui hlahlesikhaw a kontih in na minungte le kai khiah ngaih kin har i si ti ling thill tuh i ing? Ciafangin ian in na minungte le kai khiah laivum pumpalah ai mi hmuahhmuah thawn kin dang dun tuh i.”ti in sawn i.
17Ciafangin Bawipa in Moses hnenah, “Cen he na relhnak bangin khai bawn tuh ing. Ziangmanti fangin i ngaihharhnak khiah ngah zo i si. Cen na hming in khai na ling ing.” ti in sawn i. 18Ciafangin Moses in, “Na sunpar na thangphathnak khiah i hmuh tu.” ti in ngen i. 19Ciafangin Bawipa in, “I phathnak hmuahhmuah na hmai in feh ruai tuh ing. Cen Bawipa hming khiah na hlan ah thang ruai tuh ing. I nuamhnakte khiah ngaihhar tuh ai i nuamhnakte khiah ninghio tuh ing. 20Ikhalselai i hmai tu i hmu thill tuh lo i si. Ziangmanti fangin i hmai hmu tu khiah thi tuh lio i.” ti in sawn i. 21Ciafangin Bawipa in, “He i hiang ai lungto pui vumah ding tu. 22Cen i sunpar i thangphathnak in na khel teng fangin nangmah khiah lung kua songah na dah ngangkhaw i khel teng fangin i kut in na khuk tuh ing. 23Ciaben fangin i kut in na khuk awl tuh ai i hnualam lek hmu tuh i si. Ikhalselai i hmel tu i hmu thill tuh lo i si.” ti in ti i.