1Moses khai mual vumah taang ngio ai um khiah Israel mite in hmu fangin, anite khai Aaron hnen ah khawm tlaang ai, “Kawi tulai, kin hmai ah feh tuhin pathiante kin bawt tu. Ziangmanti fangin Izip ramai kin suah tu he Moses le zai cang lio i ti ling lo i hang sing.”ti in ruai i. 2Ciafangin Aaron in amahte hnenah, “Ning nute le ning fapate le ning fenute bil ai sui bilvuh hawk sah tu i lai i hnenah kawih tuu-ih.”ti in ruai i. 3Ciamanin anite in sui bilvuh khiah amahte bil songin hawk sah ai Aaron hnenah kawih i. 4Ciafangin Aaron in cia sui khiah amahte kut songin lang ai pumsu in er le kawlpaw niu in cang i. Ciafangin amahte hnenah, “Aw, Israel mite, he heh Izip ramin ning suah tu ning pathian i.” ti in rel i. 5Ciaman Aaron in hmu fangin cia kawlpaw niu hmai ah awlta cabuai sa ai, “Thangha khiah Bawipa hnenah puai nia i tuh i.”ti in sap i. 6Ciafangin anite khai a thangha zingniu in tho ai mei thawn taihnak a hlu le remhnak a hlu te kawih le anite khai ei tuh le ding tuh in to ai sal tuh in tho tlaang i.
7Ciafangin Bawipa in Moses hnenah, “Feh in tolh tu zual. Ziangmanti fangin Izip ram ai na suahhnak na minungte in amahte veve hnawmcan sek i hang. 8I ruaihnak thu bangin ngai lo ai lamtler sio i hang. Amahte in kawlpaw niu zuk bawn ai cia kawlpaw niu zuk khiah bia ai raithawi ai, ‘Aw Israel, he heh Izip ramin ning suahtu ning pathian i.’ ti in ti i.” ti in rel i. 9Ciafangin Bawipa in Moses hnenah, “He minungte khiah hmu liang ing. Amahte khiah mi thinruh mi ungtuangte i. 10Hnai i hnok mah. Thin i raw ngai i; ciamanin amahte khiah rek tuh sio ing. Ciafangin nangmah khiah mi phun lian ngai ah na bawn tuh ing.” ti in ti i.
11Ciafangin Moses in Bawipa a Pathian khiah, “Bawipa zaimanin Izip ramin power lian ngai thawn na suahhnak minung te vumah thin na raw rauh i? 12Ziangmanin Izip mite in, ‘Amahte khiah hnawmcan tuh le mual vumah rek tuhin le laivum in amahte khiah cimpil ruai tuhin suah i.’ti in na ti tuh i? Ciamanin na thinraw khiah sup tulai na minungte khiah hnawmcan awl tu. 13Cen, ‘Ning tesin fate khai van ai arsi bangin zaai ruai tuh ing. Cen ning hnenah ning relhnak he ram khiah a veksenin ning tesin fate hnenah pe tuh ai amahte in kumzangza co tuh i.’ ti ai na khamhnak Abraham le Aizek le Israel na hnenumte khiah hih tu.”ti in rel i. 14Ciamanin Bawipa khai a minungte hnawmcan tuh ai a tumhnak khiah awl leh i.
15Ciafangin Moses khai mual vumin tolh ai a kut ah Tettikhanhnak lungto tlep nih sin i. Cia lungtlep khiah a hmai le a zaang lamah nganhnak i. 16Cia lungtlepte khiah Pathian ai bawnhnak i ai cia lungtlep vumai lai khai Pathian ai nganhnak i. 17Joshua in mite auhnak aw za fangin Moses hnen ah, “Camp songah raaltawnghnak aw um i.” ti in rel i. 18Ikhalselai Moses in, “Cia aw khiah raal nehhnak aw khai i lo i. Cen a sungte aw khai i lo i. Ikhalselai i zahnak aw tu lasahnak aw za bang ing.” ti in sawn i.
19Ciamanin Moses khai camp nong ah hleng sawng fangin cia kawlpaw niu le tlanglam liang lo hmu i. Ciamanin Moses khai thinraw rauh ai a kut ai lungtlep khai mual ham ah sep ai khoi ruai sio i. 20Ciafangin amahte bawnhnak kawlpaw zuk khiah lang sah ai mei in tai sah i. A nawi niu in rial ben fangin ti songah rawih ai Israel mite khiah ding ruai i. 21Ciafangin Moses in Aaron hnenah, “Hetih bangin he minungte sual ruai heh a kontih bangin anite in na bawn i pa?” ti in zawt i. 23Ciamanin Aaron in, “I bawipa, thin lo raw mah. He mite khiah ling i si. A pha lo lo lek bawn nuam pawl i. 23Ziangmanti fangin amahte in, ‘Kin hmai in feh tuhin pathiante kin bawt tu. Izip ram ai kin suahtu Moses le zai cang lio i ti ling lo i sing.’ ti in ti i. 24Ciafangin kai in, ‘Ning sui naite hmuah in ning sui hawk tu sio ih.’ti in ruai ing. Ciamanin amahte in cia sui khiah i pe ai mei songah i hla fangin he kawlpaw niu suak lio i.”ti in sawn i.
25Minungte in nuamthaih ai nung khiah Moses in hmu fangin (ziangman ti fangin a raalte hmai ah zakthi kul in, Aaron in amahte khiah hen lo in nuamthaih in amahte nuam bangin nung ruai i) 26Ani khai camp dawngkham ah ding ai, “Bawipa hnenah tang nuam te in i hnenah kawi tu seh.” ti in ti i. Ciafangin Levi fate hmuah in Moses hnenah khawm i. 27Ciafangin Moses in amahte hnenah, “Israel Pathian Bawipa in, ‘Aisu hmuah in vangsau khiah a nak ah vawh tu selai camp song lut in suak tu selai a unau le a rualpui le a ompui khiah rek tu seh.’ ti in ti i.” ti in rel i. 28Ciamanin Levi fate in Moses ruaihnak bangin bawn ai cia nia ah minung thawngthum tha thi i. 29Ciafangin Moses in, “Ning fapa le unaute tiantian rek in tunnia ah Bawipa hnenah ning pum pe manin Bawipa in hmuifu ning bur tuh i.” ti in rel i.
30A thangha fangin Moses in mite hnenah, “A rauh ngai in sual i si. Ciamanin Bawipa hnenah hong ngangkhaw ning sual ca in Pathian thawn rem lehhnak ngah tek ngang.” ti in rel i. 31Ciafang in Moses khai Bawipa hnenah let ai, “He minungte in a rauh ngai in sual ai amahte ca in sui pathian bawn lio i. 32Ikhalselai tunin amahte sual khiah hlat sah tu. (Ihlahle na nganhnak na ca-uk songin i hming i phiat tu lio),” ti in ti i. 33Cia fangin Bawipa in Moses hnenah, “I lakah a sualtu hmuah i ca-uk songin a hming phiat tuh lio ing. 34Ciamanin tunin kaimah ai na relhnak ramah he mite khiah feh pui tu. I Vancungmi khiah ning hmai in feh tuh i. Ikhalselai amahte cawh tuhin i kawi leh nia ah amahte sualhnak manin cawh tuh ing.”ti in rel i.
35Ciamanin Bawipa in Aaron ai bawnhnak kawlpaw niu manin cia mite khiah pul thawn ur ruai i.