Exodus 23

<<  EXODUS 23  >>

1Thudon thu khiah mite rel tuh lo i si. Thudik lo tettikhan in mi sualpa khiah bawm tuh lo i si. 2A pha lo bawn tuhin miburpui khiah hlun tuh lo i si. Tazacuai hmunah a sual in thukhan lohnak tuhin miburpui hlun in tettikhan tuh lo i si. 3Mifarah pa in mi tazacuai fangin cia pa khiah a hlai in bawm tuh lo i si.

4Na raal ai kawlpaw i tu seh, lak i tu seh tlamtler in pai te khiah hmu lesikhaw, cia pa hnenah tlun sah tuh i si. 5Na huatu pa lak khiah a thilrit man tho ben hlahlekhaw, bawm na nuam lo rinin bawm tuh rori i si.

6Mifarahte in tazacuai fangin a hman niu in  thukhan sah lo in um tuh lo i si. 7Thudon thu thawn ziang khai seng dun mah ih. Mawh nai lo le midikcangte khai rek mah ih. Ziangmanti fangin misualte khiah zah tuh lo ing. 8Nawhthuh lang tuh lo i si. Ziangmanti fangin  nawhthuh in mit ning caw ruai ai mi dikcangte thurelhnak khiah kawn ruai i. 9Mikhual khai zauhsuam tuh lo i si. Ziangmanti fang in mikhualte thin khiah ling i si. Izip ramah mikhual i awng i si.

10Ning ram khiah kum ruk song vai tuh ai kum ruk song rongkhawm tuh i si. 11Kum sarih kum fangin, ning lakai mifarahte ei tuh in um thai in vai lo in dah tuh i si. Cen mifarahte ai vaal hnak khiah ramsate in ei tuh i. Ciatih bangin ning capit vuan le oliv vuan khai bawn tuh i si. 12Ning kawlpaw le ning lak le ning nupang hnenumte fate le mikhualte khiah com in cawl lawm thai in ni ruk song naper tuh ai ni sarih nia fangin com tuh i si. 13I relhnak bangin a veksen in hlun tuhin ralring tuu-ih. A dang pathiante hming khiah rel tuh hrim hrim lo i si. Aisu in khai ning kaa songin ning za sah ma seh.

14Kum khat songah i hmai ah puai pathum bawn tuh i si. 15Col tel lo Puai bawn tuh i si. (Thukham ning pe bang in cia puai khiah Abib hla songah bawn tuhai ni sarih song col tel lo sangreu ei tuh i si. Ziangmanti fangin cia hla ah Izip ram in suak i si. Aisu khai i hmai ah a kut lolek in kawi tuh lo i si). 16Cen lo ai ning cinghnak ning naperhnak rongthar a hmasaber ca in Rongthar Puai bawn tuh i si. Cen ning rongkhawm ben sio ai kum bo fangin Rongkhawm Puai bawn tuh i si. 17Kum khat  songah ning pasalte veksen in Bawipa Pathian hmai ah kawi tu seh. 18I hnenah ning raithawihnak thi khiah col tel sangreu thawn hlu tuh lo i si. Cen i hnenah raithawihnak sathau khiah a thaininghla tian khawi tuh lo i si. 19Ning ramai a thai hmasaber khiah Bawipa ning Pathian inn ah kawih tuh i si. Me faniu khiah a nu hnawiti thawn suang tuh lo i si.

20Lamlak ah ning kil tu tuhin le kaimah ai ning remcia sahhnak ramah kong ning hoi tuhin Vancung mi pakhat ning kuat tuh ing.  21Amah khiah kih in a thu ngaai tuu-ih. Amah khiah     thintok ruai mah ih. Ziangmanti fangin amah in ning sualhnak ning hlat sah tuh lo i. Ziangmanti fangin i hming khiah amah songah um i. 22Ikhalselai ningte in amah thu khiah ngaai in i relhnak hmuah a veksenin hlun leisikhaw, kaimah khiah ning raalte raal cang tuh ai ning tawngtute tawngtu cang tuh ing. 23Ziangmanti fangin i  Vancung mi in Amorte le Hitte le Perizte le Khanaante le Hivte le Jebuste ramah ning kawih tuh ai amahte khiah rek tuh sio ing. 24Amahte pathian khiah bia sah tuh lo i si. A na khai per sah tuh lo i si. Cen amahte bangin naper tuh lo i si. Ikhalselai amahte khiah a veksenin hnawm sah tuh sio ai amahte khan khai khoi sah tuh sio i si. 25Ciamanin Bawipa na Pathian na khiah per sah tuh i si. Ciafangin amah in ning rong le ning ti khiah hmuifu ning bur sah tuh i. Ning lakai urhnak khai ning lang sah tuh sek ing.  26Ning ramah aisu in khai naukeh le fatong in um tuh lo i si. Ning nunhnak khiah khim ruai tuh ing.

27Ning hlanin mite in kaimah khiah kih ruai tuh ing. Ning feh hmun tuhai mite khiah a veksenin taw ruai tuh ing. Ning raalte khiah ning hmai in tlan ruai tuh ing. 28Ning hmai in tunngalte khiah hlat tuhai amahte in Hivte le Khanaan mite le Hit mite khiah hnawt tuh sio ing. 29Kum khat songin hnawt tuh berh lo ing. Ziangmanti fangin cia ramah minung um lo fangin ramsa khiah ning ca ah a tamze in zaai mawh ngai.  30Ningte khiah ning zaai in cia lairam khiah ning co ben hlan lo amahte khiah a tlawmniu niu in hnawt tuh ing. 31Ning ramri khiah Tipui San ai panin Filistin te Tipui tian le nelrawn ai panin Runpui tian i tuh i. Ziangmanti fangin cia ram ai umtu mite khiah ning kut songah ning pe tuh ai ningte in hnawt tuh i si. 32Amahte thawn i tu seh, amahte pathian thawn i tu seh thu kham dun tuh lo i si. 33Ning ramah um siang tuh lo i si. Ziangmanti fangin i lakah ning sual ruai tuh i.  Ziangmanti fangin amahte pathian khiah bia leisikhaw i lakah ning sual ruaitu cang tuh i.” ti in rel i.

<<  EXODUS 23  >>