1Ciafangin Pathian in Moses hnen ah, “Nang le Aaron le Nadab le Abihu le Israel mi upa sawmsarih khiah Bawipa hnenah hong tu i lai a hlathah in bia tuu-ih. 2Moses lekin Bawipa nong ah kawi tu selai a dangte tu a nong ah kawi ma seh. Cen miburpui khai Moses thawn hong ma seh.” ti in rel i.
3Ciamanin Moses in mirunpui hnenah Bawipa ai rel hnak thu le a thukham hmuah a veksenin rel ai cia mite khai a veksenin hmunkhat in, “Bawipa ai relhnak hmuah khiah bawn tuh i ing.” ti in sawn i. 4Ciafangin Moses in Bawipa thu khiah a veksenin ngan sio i. Ani khai zing tlaniu in tho ai mualpui ham ah awlta le Israel phun hlainih zah in khan khai sa i. 5Ciafangin Israel tlangvalte khiah ko ai mei thawn taihnak a hlu le remhnak tuhai hluhnak kawlpaw cangte khiah Bawipa hnenah hlu i. 6Moses in a thi a tlamhmat khiah lang ai bel songah thun ai a tlamhmat khiah awlta phiah i. 7Ciafangin Moses in Thukham hnak Ca-uk khiah lang ai mite za thai in siar i. Ciafangin amahte in, “Bawipa ai relhnak bang in a veksen in bawn in a thu ngaai tuh i ing.”ti in ti i. 8Moses in thi khiah lang ai mirunpui khiah phiah ai, “He thi khiah he thute bangin Bawipa in ningte thawn thukham dunhnak thi i” ti in rel i.
9Ciafangin Moses khai Aaron le Nadab le Abihu le Israel mi upa sawmsarih thawn hong ai, 10Israel Pathian khiah hmu i. A ke hnia ah safai lungto per phahhnak bang i ai vancung rori bangin ciang liang i. 11Ikhalselai Israel mi upate vumah a kut dah lo i. Ciatih in anite in Pathian khiah hmu ai ei le ding in um tlaang i.
12Ciafangin Bawipa in Moses hnenah, “I hnen mual vumah hong tulai ciata ah um tulai amahte cuk tuhin lung tlep vumah i nganhnak upadi dan le thukhamte na pe tuh ing.” ti in rel i. 13Ciamanin Moses khai a bawmtu Joshua thawn tho ai Pathian mual vumah hong i. 14Moses in mi upate hnenah, “Kin hleng leh hlan lo heta in kin iang tuu-ih. Aaron le Hur khiah ning hnenah um tuh i. Mite in harsahnak nai lekhaw amahte hnenah kawi tu seh.”ti in rel i. 15Ciafangin Moses khai mual vumah hong ai cia mual khai meiro in khuk i. 16Pathian thangphathnak khiah Sinai Mual vumah um ai meiro in cia mual khiah ni ruk song khuk i. Ni sarih nia fangin meiro songin Pathian in Moses ko i. 17Israel te mit hmai ah Pathian thangphathnak khiah mual vumah meipual pui bang i. 18Ciamanin Moses khai meiro songah lut ai mual vumah hong i. Moses khai mual vumah ni sawmli lo le zan sawmli um i.