1 A thi thothi in zihmui naitu pa ai zihmui khiah uih ruai i.
Ciabang in a fim le mi upathnak pa ai a tlawmniu voi hnak khai ciabang i.
2 Mifim pa thinlung khiah a kiahhan kut ah i.
Ikhalselai mivoi pa thinlung khiah a kekeh kut ah i.
3 Mivoi pa khiah lam lakah vak rin in, fimhnak nai lo manin,
Amah khiah mivoi i ti in aisu hmuah hmuh i.
4 Mi uktu pa khiah na lakah thinraw lekhaw,
Na umhmun in thawn mah.
Ziangmanti fangin, a sung khan fangin
thinrawhnak lawm ruai i.
5 Vanhang hnia ah a pha lo pakhat hmu ing.
Cia khiah mi uktu te in bawn khelhhnak i:
6 Mivoite khiah bawi cang tuhin do ai
Mifimte khiah a niamhmun ah hla i.
7 Mi hnenumte khiah siphuh to ai,
Bawite khiah hnenum bangin a ke in
laipua ah vak hmu ing.
8 Kua co tu te in cia kua song ah tlok tuh i.
Sen renhnak pal bal tu khiah rul in cik tuh i.
9 Lung khuar tute khiah lungto in ur ruai tuh i.
Thing cek tu te khiah thing in ur ruai tuh i.
10 Haihpui khiah tong in a haihpui haa khiah tat hlahlekhaw,
Cia pa in tha tam ngai hmang kul tuh i.
Ikhalselai fimhnak in ben ruai thill i.
11 Rul khiah zawl lo fangin mi cik thai i.
Pongtaam te khai ciabang i ve i.
12 Mifim pa kaa ai pon khiah a hlum i.
Ikhalselai mivoi pa kaa in amah khiah lem tuh berh i.
13 A pong pan fangin voihnak thu thawn pan ai,
a ben fangin thinraw kul le amhnak suak i.
14 Mivoi pa in a tamngai in pong thliahthlo i.
Zai rel tuh khiah aisu in khai ling sah thill lo i.
A hnua ah zai cang tuh i ti in amah khiah aisu in rel thill i?
15Mivoite naperhnak in amahte khiah cawl ruai i.
Ziangmanti fangin amahte in khua songah feh peu thiam lo i.
16 Aw rampui, na kumpibawi khiah tlangval niu i fangin,
Cen ning bawite in zingniu in puai bawn pan fangin,
Rim ning su tu seh.
17 Cen aw rampui, na kumpibawi khiah mi upate fapai fangin,
Cen ning bawite in zukham tuhin i lo in,
tha nai tuhin a cu fangin puai bawn pan fangin, hmui na fu i.
18 Thazawng manin inn khiah mot i.
Zai khai per lo in nihlawh leng in um manin, inn khai zun i.
19 Puai khiah anghnak tuhai bawnhnak i.
Cen capittizu in thinlung ang ruai i.
Ikhalselai tangka in zai hmuahhmuah khim ruai i.
20 Kumpibawi khiah na thin song rin in awrsia cam mah.
Miliante khiah na khuahluan khan song rin in awrsia cam mah.
Ziangmanti fangin hli lakai vaniu in na aw khiah na thiar sah thai i.
A zuanglak vaniu in na ruathnak lo rel thai lio i.