1Manasseh khiah kumpibawi per pan fangin kum hlainih i ai, Jerusalem ah kum sawmnga le kum nga kumpibawi tuan i. A nuu hming khiah Hephzibah i. 2Israel mite hleng hlanah Bawipa ai hnawthnak mi phunte ai ningdulkul bawnhnak bangin, Manasseh in Bawipa hmai ah sualhnak bawn i. 3Ziangmanti fangin amah in a paa ai bal awnghnak a saanghmun ai raithawi hmun te khiah sa leh sio ai, Israel kumpibawi Ahab ai bawn bang in, Baal awlta te le Asherah te khiah sa ai, vancung ai van mite hmuahhmuah bia i. 4Bawipa in, “I hming khiah Jerusalem ah haih tuh ing.” ti napui ai, Manasseh in Bawipa inn songah awlta tamngai sa i. 5Cen Bawipa inn tualvan panih songah vancung ai van mi veksen ca in awlta te khai sa i. 6Cen a fapa khai mai in tai ai raithawi hnak in hmang i. Cen tlah khai san ai, dawi khai hmang i. Mithite rauhla thawn pon thiam tute hnenah khai thuzawt i. Ciatih bangin amah in Bawipa khiah thinraw ruai tuhin a hmai ah a rauh ngai in sual i. 7Cen Bawipa in David le a fapa Solomon hnenah, “Israel hin hmuahhmuah songin i rilhnak he inn songah le Jerusalem ah kumzangza in i hming haih tuh ing.” ti ai relhnak Bawipa inn songah amah ai bawnhnak Asherah milim zuk khai dah i. 8Cen Bawipa in, “Amahte i ruaihnak bangin le i hnenum Moses in ruaihnak i thukham khiah a veksenin a kung niu in hlun lekhaw, Israel mite khiah a paate hnenah i pehnak ram songin vai kul tuh lo i hang.” ti in khai ti i. 9Ikhalselai amahte in ngai nuam lo ai, Manasseh in amahte khiah, Israel mite hleng hlan ai Bawipa in hnawmcan hnak mi phun dang te tahin sual sawn tuhin, sopaw i.
10Cen Bawipa in a hnenum a profette songin, 11“Judah kumpibawipa in he ningdulkul te khiah bawn manin (Amah in a hlanai Amor mite veksen tahin sual rauh ai, Judah mite khiah milim bia in sual ruai i), 12Israel Bawipa Pathian in, ‘Jerusalem le Judah mite vumah a pha lo rauh hleng ruai tuh ing. Ciamanin a za tu hmuahte bil khiah thing tuh sut i. 13Jerusalem khiah Samaria le Ahab inn bang in teh tuh ing. Jerusalem khiah pakan nul bangin nul in a bungbaleh in dah tuh ing. 14A taanghnak lam i ro khiah zam tuh ai a raalte kut songah ap tuh ing. Amahte raalte in amahte khiah rok in ru sah tuh i. 15Ziangmanti fangin Izip ramin a paate suak khelleh ai panin tunnia tian in amahte in i hmai ah sual ai thin i tok ruai i.’ ti i.” ti in rel i. 16Ciazolo ah Manasseh in mite thi tamngai luang ruai ai, Jerusalem khiah a khat lam in a khat lam tian thi thawn dim ruai i. Ciahlai ah amah in Bawipa hmai ah sual manin Judah mite sual ruai i.
17Manasseh bawnhnak hmuahhmuah le a sual hnak kawmin Judah kumpibawite thuanthu khumhnak ca-uk songah khum sio i lo im? 18Ciatih bangin Manasseh khai a paate bangin thi ai a inn ai Uzza vuan songah vui i. Ciafangin amah ca in a fapa Amon khiah kumpibawi cang i.
19Amon khiah kumpibawi cang pan fangin kum kul hluannih i ai, Jerusalem ah kum nih uk i. A nuu hming khiah Jotbah mi Haruz fenu Meshullemeth i. 20Amah in a paa Manasseh in bawn bangin Bawipa hmai ah sual i. 21Ciatih bangin a paa vak hmun lampui caang khiah hlun ai a paa ai biahnak milim te khai a naper sah ai bia i. 22A paate Bawipa Pathian khiah zam ai, Bawipa thu khiah hlun lo i.
23Ciafangin Amon hnenumte in amah khiah tawng ai kumpibawipa khiah amah inn fawm ah rek i. 24Ikhalselai cia ram ai mite in Kumpibawi pa Amon rek tute khiah rek sai i. Ciafangin cia ramai mite in a fapa Josiah khiah amah ca in kumpibawi cang ruai i.
25Amon bawnhnak hmuahhmuah khiah Judah kumpibawite thuanthu khumhnak ca-uk songah khum sio i lo im? 26Amah khiah Uzza vuan songai hlan ah vui i. Ciafangin amah ca in a fapa Josiah khiah kumpibawi cang i.