1Ciateng in Hezekiah khiah thi banghma in ur i. Ciafangin Amoz fapa Isaiah khai a hnenah kawi ai, “Bawipa in, ‘Na thi tuhai na nung tuh lo i hang. Ciamanin na inn khiah a remcia in dah tu.’ ti in na ti i.”t i in rel i. 2Ciafangin Hezekiah khai bangkhang hmunlam ah her ai, Bawipa hnen ah, 3“Aw Bawipa, Na hmai ah a hman le thinkung niu in vak ai na hmai ah a pha i bawnhnak khiah lo i hih sah tulaw.” ti in sawngen i. Ciafangin Hezekiah khai lungsia ngai in kap i. 4Ciafangin Isaiah khai a laiteng tualvan rin hleng man hlanah, Bawipa thu khiah, 5“Let leh tulai i minungte uktu Hezekiah khiah, ‘Na paa David Pathian, Bawipa in, “Na sawngen hnak khiah na za sah ing. Na mithli khai na hmu sah ing. Na cak ruai tuh rori ing. Ni thumhnak fang in Bawipa inn ah hong tuh i si. 6Cen kum hlainga tian na nunhnak na belh tuh ing. Nangmah le he khua khiah Assiria kumpibawi kut songin luat ruai tuh ing. Kaimah ca le i hnenum ca in he khua khiah o tuh ing.” ti in ti i.’ ti in rel tu,” ti in ruai i. 7Ciafangin Isaiah in, “Thaihmin hlom khat lang tu.” ti in ti i. Ciamanin anite in thaihmin khiah lang ai a hmaihma vumah nawih le ani khai cak lio i.
8Ciafangin Hezekiah in Isaiah hnenah, “Bawipa in i cak ruai tuh ai, ni thumhnak fangin Bawipa inn ah hong tuh khiah zai bang hnikhniahhnak um tuh i?” ti in zawt i. 9Ciafangin Isaiah in, “Bawipa in a relhnak bangin bawn tuhhnak hnikhnaihhnak khiah he i: A hlaa khiah hmailam ah degree sawmkhat maw a hnualamah degree sawmkhat feh ngai?” ti in ti i. 10Ciafangin Hezekiah in, “A hlaa khiah degree sawmkhat feh tuh khiah a bai niu i. Ciamanin degree sawmkhat a hnualamah let tu seh.” ti in sawn i. 11Ciamanin prawfet Isaiah in Bawipa hnenah au ai, Ahaz ni tehhnak vumah a hlaa khiah Bawipa in degree sawmkhat a hnualamah let ruai leh i.
12Ciafangin Baladan fapa Babylon kumpibawipa Berodach-Baladan in Hezekiah ur za manin, lai le lehsawng te kuat i. 13Ciafangin Hezekiah in amahte khiah a phanniu in sik ai, a inn songai a hlawnthil ngun le sui le rimhmui le a mankhung thaute le a thilkhawi hmunai a raalkap thilthuam te khiah a veksenin hmuh sio i. A inn songai le a ukhnak ram songai a thil hmuahhmuah a hmuh lohnak pakhat khai um lo in Hezekiah in amahte khiah hmuh sio i.
14Ciafangin prawfet Isaiah khai Kumpibawipa Hezekiah hnenah kawi ai, “He mite in zai na rel pa? Cen a kon ramin amahte khiah hleng i?” ti in zawt i. Hezekiah in, “Amahte khiah ram hla ngai Babylon in hleng i.” ti in sawn i. 15Ciafangin Isaiah in, “Na inn songah amahte in zai hmu pa?” ti in zawt i. Ciamanin Hezekiah in, “Amahte in inn songai umhnak hmuah a veksen in hmu liang i. I hmuh lohnak hlawnthil pakhat khai um lo i.” ti in sawn i. 16Ciafangin Isaiah in Hezekiah hnenah, “Bawipa thu khiah ngai tu: 17‘Na inn songai um hnak hmuahhmuah le na paa ai tun nia tian khawlhnak hmuahhmuah khiah pakhat khai taang lo in Babylon ah phur tuhhnak nia hleng tuh i lai. 18Cen na songai suakhnak na fapa a hrekkhatte khai amahte in lang tuh ai Babylon kumpibawi inn ah amahte khiah a til ret sa in naper tuh i.’ ti in Bawipa in rel i.” ti in rel i. 19Ciafangin Hezekiah in Isaiah hnenah, “Na relhnak Bawipa thu khiah pha i.” ti in sawn i. Ziangmanti fangin Hezekiah in, “I nun song tengteng ah ngawn thuhman le remhnak um tuh lo im?” ti in ti i.
20Hezekiah bawnhnak hmuahhmuah le tikhur co ai khua songah laipua songin kua co ai ti kawihhnak thute kawm in Judah kumpibawite thuanthu khumhnak ca-uk songah khum liang i lo im? 21Ciatih bangin Hezekiah khai a paa te bangin thi ai a fapa Manasseh in a ca in kumpibawi cang i.