1Izip ramin Israel mite suak khelleh kum kum zali le kum sawmriat kumah Solomon khiah Israel mite uk khelleh kum li hnak, hla nih hnak Ziv hla ah Solomon in Bawipa inn khiah sa pan i. 2Kumpibawipa Solomon in sahnak Bawipa inn khiah, a saulam khiah dong sawmruk, a kaulam dong kul le a sanglam dong sawmthum i. 3Cen a cianghlim khaanpui hmai ai donka khiah a saulam dong kul sau ai, a kaulam khai a inn hmailam in dong ha kau i. 4A padinpauh te khiah thingtlang thawn sa i.
5Cen a cianghlim khaanpui le a cianghlim ber a khaanniu nak veve ah khaan cikniu niu sa ai a cingkim in a nak ai khaante khiah sa i. 6A hniataber khaanniu khiah dong nga kau ai, a laiteng ai khaanniu khiah dong ruk kau i. A pathumhnak khaanniu khiah dong sarih kau i. Ziangmanti fangin temple bangkhang vumah zai khai khen tuh lo in, amah in bangkhang pua ah khang cikniu sa i. 7Cia temple khiah sa fangin a lungto te khiah a khuar hmunah at cia ai, a sa teng in haibul le thir tum le thir thilri zai khai hmang lo in sa i. 8A thuah nihhnak dawngkham khiah temple kiahhan lamah i. A thuah nihhnak le a thuah thumhnak vum khiah kaipum thawn kaai i. 9Ciatih bangin amah in temple khiah sa ai sa ben i. Temple khiah sida thing tlep le sida luangkiang te thawn sa i. 10Temple nak pumpalah ah khaan cikniu niu sa ai dong nga ten saang ai, temple hnenah sida luangkiang thawn zom i.
11Ciafangin Bawipa thu khiah Solomon hnenah hleng ai, 12Bawipa in,”He temple na sahnak thu ah, i dan upadi le i thukhanhnak le i thukhamte khiah hlunin bawn lesikhaw, na paa David hnenah i relhnak bangin, i thu khiah khim ruai tuh ing. 13Israel mite lakah um tuh ing. Cen i minung Israel mite khiah zam tuh lo ing.”ti in rel i.
14Ciamanin Solomon in temple khiah sa ai ben i. 15Temple songlam bangkhang khiah sida thingtlep thawn sa i. Temple khang in a siling tian a songlam in thing thawn sa ai, temple khang khiah saipres thingtlep thawn sa i. 16Cen temple a hnualamah dong kul khaan pakhat khiah a khang ai panin siling tian sida thenglep thawn sa i. Cia khaan khiah a songta khaan i ai a Cianghlim ber Khaan i. 17Cia khaan hmai ai temple khaan khiah dong sawmli sau i. 18Temple songlam khiah sida thawn sahnak i ai, papar ku le papar a par suaihnak zukte um i. A vekin sida thawn sa ai, lungto pakhat khai hmu tuhin um lo i. 19Temple songah a songta khaan khiah Bawipa thawn lungkhim dunhnak thingkuang dah hmun tuh in sa i. 20Cia a songta khaan khiah dong kul sau ai, dong kul kau ai dong kul sang i. Sui a cit thawnin cia khaan khiah khut ai awlta khiah sida thawn khuk i. 21Ciatih in Solomon in temple songlam khiah sui thawn khut i. Sui ri khiah cia a songta khaan hmailam ah a nak khat in a nak khat tian khih i. Sui thawn in khut i. 22Temple a pumpalah in a ben tianin sui thawn khut i. Cen a songta khaan hiangai awlta khai sui thawn khut i.
23A songta khaan songah cherubim panih khiah oliv thing thawn sa ai dong ha veve sang i. 24Cherub ko pakhat khiah dong nga sau ai a khatta ko khiah dong nga sau i. A ko par pakhat in a khatta ko par tian khiah dong ha sau i. 25A khatta cherub khiah dong ha i. Cherubim a panih khiah a tia vek i. A hmel khai a bang vek i. 26Cherub pakhat khiah dong ha sang ai, a khatta khai cia zah sang ve i. 27Ciafangin cherub te khiah a songta khaan songah dah i. Cherub ko pakhat in bangkhang khiah tong ai a khatta cherub ko in a khatta lam bangkhang khiah tong i. Cen a khaan laiteng ah amahte ko khiah tong dun i. 28Cherub te khiah sui thawn khuthnak i.
29Ciafangin temple a songta le a puata khaan ai bangkhang vumah cherubim le ung kuang le papar par te khiah suai i. 30Cen a songta le a puata khaan khang khiah sui thawn khut i.
31A songta khaan lut hmun tuh dawngkhamte khiah oliv thing in sa i. Dawngkham khuam le a vumai zauhnak thingte khiah bangkhang hmun nga khan hmun khat kau i. 32Dawngkham te a panih in oliv thing thawn sahnak i. Cia dawngkhamte vumah cherubim le ung kuang le papar parte khiah suai ai sui thawn khut i.Cen cherubim le ung kuangte khiah sui thawn mat i. 33Cen a sumpua khaan dawngkham khuamte khai oliv thing thawn sa ai bangkhang thawn hmunli khan hmun khat kau i. 34Dawngkham a panih khiah saipres thing thawn sa ai, cia dawngkham pakhat khiah a hlep thai in thingtlep thawn sa ai a khatta khai a hlep thai in sa ve i. 35Ciafangin cherubim le ung kuang le papar par khiah a vumah suai ai sui thawn a mam hliang in khuk i.
36Cen a songta tualvan khiah a atcia lungto tluang thum le sida luangkiang tluang khat thawn sa i. 37Kum lihnak Ziv hla ah Bawipa inn a ham khiah sa pan i. Kum hlaili kum hla riat hnak Bul hla ah, cia inn khiah a khim liangin a tuatcia bangin sa ben i. Ciamanin a sahnak khiah kum sarih rai i.