1Tyre kumpibawi Hiram in Solomon khiah amahte in a paa David ca in kumpibawi cang tuhin ril i ti za fangin, Solomon hnenah a hnenumte khiah kuat i. Ziangmanti fangin, Hiram in David khiah it awng i. 2Ciafangin Solomon in Hiram hnenah, 3“Bawipa in a raalte khiah a ke hnia ah dah sah hlan lo i paa David khiah nuamhmun cang in a raalte in tawng manin, Bawipa a Pathian ca in inn sa thill lo khiah ling i si. 4Ikhalselai tunin Bawipa in nuamhmun cang ah remhnak i pe manin tunin raal tawng tuh le a phalo ziang khai um lo i. 5Bawipa in i paa David hnenah, ‘Na ca in kumpibawi i dahhnak na fapa in i hming ca inn sa tuh i.’ti ai rel bangin, Bawipa i Pathian hming ca in inn sa tuum ing. 6Ciamanin amahte in Lebanon ai sida thing khiah i vong sah tuhin rel tu. I hnenumte in na hnenumte thawn naper khat tuhai, na ngenhnak bangin na hnenumte khiah hlawhtham tuh ing. Ziangmanti fangin Sidon te bangin kin lakah thing at thiam um lo i.”ti in rel i.
7Ciamanin Hiram in Solomon relhnak thu khiah za fangin, ang ngai ai, “Tunnia ah Bawipa khiah hmuifu tu seh. Ziangmanti fangin amah in he mi lian ngai mite uk tuh in David khiah a fim ngai fapa pe zo i.”ti in ti i. 8Ciafangin Hiram in Solomon hnenah, “Na thu kuathnak khiah a phanniu in ruat ai sida le saipres thingtum khiah na daihhnak bangin bawn tuh ing. 9I hnenumte in cia thingtum te khiah Lebanon in tipui hnenah kawih tuh i. Ciata in tipui vumah thingtumte khiah hmunkhat in penin na ruaihnak hmunah lan ruai tuhai ciata ah a rihawk tuh le ciata in ningmah in lang thai i si. Ciafangin i innkua te ca in rong i pe tulai lung i khim tuh i.”ti in rel i. 10Ciamanin Hiram in Solomon khiah sida le saipres thingtum khiah a daih zah in pe i. 11Ciafangin Solomon in Hiram khiah a innkua ei tuhin sangvut kor thawngkul le a rialhnak thau kor kul khiah pe ai Solomon in Hiram khiah kum khat hnua kum khat pe i. 12Ciamanin Bawipa in Solomon khiah a thukham bangin fimhnak pe i. Cen Hiram le Solomon khai a remniu in um ai a panih in hmunkhat remhnak tuhin hmingthu kawm i.
13Ciafangin Solomon in Israel mi veksen songin kuli khuai ai, a kulite khiah mi thawng sawmthum i. 14Amahte khiah thawngha thawngha in Lebanon ah kuat i. Cia thawngha te khiah Lebanon ah hla khat um ai inn ah hla nih um i. Kulite uktu bawi khiah Adoniram i. 15Solomon in thilphurtu thawng sawmsarih le mual vumah lungto khuar tu thawng sawmriat nai i. 16Ciazolo ah kuli khawngtu tuhin in Solomon in mi thawng thum le zathum nai i. 17 Temple ham sahnak tuhin, Solomon in amahte khiah lungto lian ngai ngai le a mankhung lungto khuar in cem ruai i. 18Ciamanin Solomon innsatute le Hiram innsatute le Kebal mite in temple sa tuh in lungto khiah khuar ai, thingtumte te le lungtote khiah at i.