1 KINGS 11

<<  1 KINGS 11  >>

1Ikhalselai Kumpibawipa Solomon in Pharaoh fenu le Moab le Ammon le Edom le Sidon le Hit ram dang ai nupangte khiah daih i. 2Cia mi phun te khiah Bawipa in Israel mite hnenah, “Amahte khiah nu mah ih. Cen amahte in khai ning nu ma seh. Ziangmanti fangin amahte in ning thinlung khiah amahte pathian hnenah ning her ruai tuh i.”ti hnak mi phunte i. Ikhalselai Solomon in he mite nupang khiah nu i. 3Solomon in kumpibawi fenu zasarih nu nai ai, nunawn khai zathum nai ai a nute in amah khiah lamtler ruai i. 4Ziangmanti fangin Solomon khai tar fangin, a nute in a thinlung khiah amahte pathiante hnenlam ah her ruai ai, a paa David bangin a thinlung khiah Bawipa a Pathian hnenah kung lo i. 5Ziangmanti fangin Solomon in Sidon te nupang pathian Ashtoreth le Ammon te ningdulkul pathian Milkhom khiah bia i. 6Solomon in Bawipa hmaiah sual ai, a paa David bangin Bawipa khiah a kungniu in hlun lo i. 7Ciafangin Solomon in Moab te ningdulkul pathian Khemosh le Ammon te ningdulkul pathian Molek bia hmun tuh khiah Jerusalem in nisuak hmun lamah sa i. 8Ciatih bangin ram dangai a nu te veksen ca in bawn ai amahte in amahte pathian hnenah rimhmui tai ai raithawi i.

9Ciamanin Bawipa khai Solomon lakah raw i. Ziangmanti fangin  Israel Bawipa Pathian khiah a hnenah vel nih daak ai, 10pathian daangte khiah bia tuh lo in he thu khiah rel napui ai Solomon in Bawipa relhnak thu khiah ngai lo in Israel Bawipa khiah bia lo i. 11Ciamanin Bawipa in Solomon hnenah, “Nangmah in he khiah bawn ai, i thukham le i dan upadi te khiah i ruaihnak bangin hlun lo manin, na kumpibawi ram khiah na zik sah tuh ai na hnenum hnenah pe tuh ing. 12Ikhalselai na paa David manin na san ah bawn tuh lo ing. Ikhalselai na fapa kut songin zik tuh lio ing. 13Ikhalselai kumpibawi ram khiah a veksein zik tuh sek lo ing. Ikhalselai i hnenum David le i rilhnak Jerusalem ca manin hin khat khiah na fapa pe tuh ing.”ti in rel i.

14Ciafangin Bawipa in Solomon tawng tuh in Edom mi Hadad suak ruai i. Amah khiah Edom ai kumpibawipa tesin fapa i. 15Ziangmanti fangin, David khiah Edom ah um tengin, raalkapte khawng tu Joab in Edom ai pasal hmuah rek sio ben fangin, a vui tuhin kawi fangin, 16(ziangmanti fangin Joab khai ciata ah Israel mi veksen kawmin Edom pasalte a veksenin rek sek hlan lo hla ruk um i), 17Hadad khai naupang niu lo i le a paa hnenum Edom mi hrekkhat kawmin Izip ramah tlan i. 18Cen Midian in khai pakhat tho ai Paran ah hleng i. Anite khai Paran ai mite khiah langai Izip ramah Pharaoh hnenah hleng ai, Pharaoh in amah khiah inn le rong le lai ram pe i. 19Pharoah khai Hadad lakah lungkhim rauh manin, a nu tuhin Pharaoh nu Kumpibawinu Tahpen ai farnu khiah Hadad pe i. 20Ciafangin Tahpen farnu in fapa niu Kenubath cawi ai, Tahpen in cia fa niu khiah kumpibawi inn ah cawm i. Ciamanin Kenubath khai Pharaoh fate kawmin Pharaoh inn ah um i. 21Hadad khai Izip in David thi khiah za fangin, raalkapte khawngtu Joab khai thi lio khiah za fangin, Hadad in Pharaoh hnenah, “I ramah i tlung siang tu.”ti in ngen i. 22Ciafangin Pharaoh in amah hnenah, “Na ramah tlung vut na nuam tu, kai thawn na samhnak zai um i?”ti in zawt i. Ciamanin amah in, “Zaikhai i sam lo i.  Ikhalselai i tlung siang tu thotho.”ti in sawn i.

23Cen Pathian in a dang raal pakhat khai suak ruai i. Amah khiah Zobah kumpibawi Hadadezer hnenin tlantu Eliadah fapa Rezon i. 24Ciamanin ani khai minung tam ngai khiah a hnenah khawm ai David in Zobah mite khiah rek fangin,  amahte captain cang i. Anite khai Damaskhas ah kawi ai, ciata ah um ai Damaskhas uk i. 25Amah khiah Solomon nung song hmuah Solomon raal cang i. Cia hlai ah Hadad in khai Solomon khiah hnaihnok i. Rezon in Israel khiah hua ai Syria khiah uk i.

26 Ciafangin hmaitong nuu Zeruah fapa Zereda ai Efraim mi Nebat fapa Jeroboam, Solomon hnenum in khai kumpibawipa khiah tawng i. 27 Zaimanin kumpibawipa khiah Jeroboam in tawng i ti fangin, Solomon in Millo khiah sa le, a paa David Khua song ai a hnawm hmunte khiah rol i. 28Jeroboam khiah thahat ngai le raalpha ngai khiah Solomon in hmu fangin, Joseph hin songai kulite khawng tu tuhin dah i. 29Ciateng in Jeroboam khiah Jerusalem in suak fangin, Shiloh mi prawfet Ahijah in lamlakah tawk i. Amah khiah pon thar sil ai amahte panih lek lo lakah um i. 30Ciafangin Ahijah in a silhnak pon thar khiah lang ai hmun hlainih in zik i. 31Ciafangin Jerohoam hnenah, “Nangmah ca in hmun ha lang tu. Ziangmanti fangin, Bawipa Israel Pathian in, ‘Kumpibawi ukhnak khiah Solomon kut songin zik sah tuh lio ai hin ha khiah na pe tuh ing. 32(ikhalselai amah in hin khat khiah i hnenum David ca in le Israel hin hmuahhmuah songai i rilhnak khua Jerusalem ca in  nai tuh i). 33Ziangmanti fangin, amahte in i zam ai, Sidon pathian nu Ashtoreth le Moab te pathian Khemosh le Ammon mite pathian Milkhom khiah bia ai,  i hmai ah a hman bawn tuhin vak lo ai, a paa David bangin i dan upadi le i thukhanhnakte khiah hlun lo i. 34Ikhalselai kumpibawi ukhnak ram khiah a veksenin a kut songin lang sah tuh lo ing. Ziangmanti fangin i rilhnak i hnenum David in i thukham le i dan upadi hlun manin David ca in Solomon khiah a nun songin kumpibawi cang tuh i. 35Ikhalselai a fapa kut song in a ukhnak khiah lang sah tuhai hin sawmkhat khiah na pe tuh ing. 36Cen i hnenum David in i hming dah hmun tuh ai i rilhnak Jerusalem ah i hmai ah mei-inn pakhat um thai hnak tuhin, a fapa hnenah hin khat khiah pe tuh ing. 37Ciamanin kaimah in nangmah khiah na lang tuhai, na thinlung ai daih zah in Israel mite vumah kumpibawi cang in uk tuh i si. 38Ciafangin, i ruaihnak hmuah khiah ngai in i lampui ah vak in, i hmai ah a hman khiah per in, i hnenum David bangin, i dan upadi le i thukhamhnakte khiah hlun lesikhaw, kaimah khiah nangmah thawn um tuhai, David inn i sak bangin kumzangza inn na sak tuh ai, Israel khiah na pe tuh ing. 39He manin David tesin fate khiah cawh tuh ing. Ikhalselai kumzangza in cawh tuh lo ing.’ti in ti i.”ti in rel i. 40Ciamanin Solomon in Jeroboam khiah rek tum i. Inapui ai Jeroboam khai Izip kumpibawi Shishak hnenah Izip ah tlan ai Solomon thi hlan lo Izip ramah um i.

41Solomon bawnhnak hmuahhmuah le a fimhnak hmuah khiah Solomon bawnhnak ca-uk songah khum liang i lo im? 42Solomon in Israel khiah kum sawmli uk i. 43Solomon khai thi ai a paa David khua ah vui i. A fapa Rehoboam in a paa ca in kumpibawi cang i.

<<  1 KINGS 11  >>