1Sheba kumpibawinu in Solomon fimhnak le Bawipa hming khiah za fangin, amah khiah thu har ngaingai thawn cu tuhin kawi i. 2Ani khai Jerusalem ah hnuahlun tamngai le kala-uk kawmin hleng i. Cia kala-ukte in masala le sui tam ngai le a manhar lungto te phur i. Cia nuu in Solomon tawk fangin a thin songai umhnak bangin a veksenin zawt i. 3Ciamanin Solomon in cia nuu zawt hnak hmuahhmuah khiah sawn liang i. Kumpibawipa in cia nuu sawn ben lohnak a har ze pakhat khai nai lo i. 4Sheba kumpibawinu in Solomon fimhnak le a inn sahnak te le, 5a cabuai vumai a rongte le a hnenumte to dan le a rong suahtute le amahte silhnak thuam le a khuat phurtute le Bawipa inn ah kawi fangin a lut hmunte khiah a veksen in hmu fangin, a mang bangin zai rel tuh khai ling tau lo i. 6Ciafangin cia nuu in kumpibawipa hnenah, “Na thu le na fimhnak khiah i ramin i za bangin hman peu i. 7Ikhalselai i mit rori in i hmu hlanah cia thu khiah sang lo ing. Na fimhnak le na thu khiah a hrek rin i rel lo i. Na fimhnak le na lianhnak khiah i zahnak tah in hming thang sawn i. 8Na hmai ah a catlo in ding ai na fimhnak za tu na minung le na hnenumte khiah hmuifu i! 9Na lakah lungkhim ai Israel kumpibawi tauhkheng vumah na tauh tu Bawipa na Pathian khiah hmuifu tu seh! Bawipa in Israel khiah kumzangza in it manin, a cang in thukhan in a dikcang niu in bawn tuhin kumpibawi na cang ruai i.”ti in ti i. 10Ciafangin kumpibawipa khiah sui talan za le kul le masala tamngai le lungto manhar te khiah pe i. Sheba kumpibawinu in Kumpibawipa Solomon hnenah pe bangin tam in masala khiah cia hnua ah hleng leh lo i hang.
11Hiram timbawte in khai Ophir in sui tamngai kawih ai, Ophir in almak thing le lungto manhar tamngai khai kawih i. 12Kumpibawipa in cia almak thing thawn Bawipa inn kaipum le a kumpibawipa inn kaipum sa ai lasatute congcing te khai almak thing thawn bawn i. Cia hnua ah almak thing khiah ciabangin hleng leh lo ai tunnia tian in hmu khai hmu leh lo i hang. 13Kumpibawipa Solomon in Sheba kumpibawinu khiah kumpibawi thilri khiah sum ai cia zolo ah a daihhnak le ngenhnak khiah a veksenin pe i. Ciafangin cia nuu khai a hnenumte kawmin a ram ah tlung i.
14Kum siar in Solomon hnenah hlenghnak sui khiah talan zaruk le sawmruk i. 15Cia zolo ah dawr bawntute le thilzuartute le Arabia kumpibawi te le ramuktute hnenin khai ngah i.
16Ciafangin Kumpibawipa Solomon in sui thawn lum lian ngai ngai zanih bawn ai cia lum pakhat ah sui shekel zaruk hmang i. Cen sui thawn lum zathum khai bawn ai cia lum pakhat ah sui mina pathum hmang i. Cia lum te khiah kumpibawipa in Lebanon Tuu Inn songah khawi i.
18Cia zolo ah, vui haa thawn kumpibawi tauhkheng lian pui sa ai sui a cit thawn khuk i. 19Cia tauhkheng khiah kaipum pum ruk saang ai, a tauhkheng hnualam khiah a pum i. A khat lam veve ah ban zau hmun bawn ai, cia hiang ah chintit panih ding i. 20Cen kaipum pum khat caangah chintit panih, panih dah ai a veksenin chintit hlainih um i. He bang tauhkheng khiah aisu kumpibawi dangte ca in bawn awng lo i.
21Kumpibawi Solomon dinghnak khuat khiah a veksen in sui ai bawnhnak i. Cen Lebanon Tuu Inn songah khuat hmuahhmuah khai sui thawn bawn hnak i. Ngun thawn bawnhnak um lo i. Ziangmanti fangin Solomon sanah ngun tu zai khai siar lo i. 22Ziangmanti fangin kumpibawipa in Hiram thawn tipui vumah dawr thilri phurtu timbaw nai bial i. Kum thum cang fangin he timbawte in sui le ngun le vui haa le zawng le udawng te kawih de i. 23Ciamanin Kumpibawi Solomon khiah laivum kumpibawi hmuahhmuah hnak in fim ai lian sawn i.
24Laivum mi hmuah in Pathian in Solomon thin songah dahhnak fimhnak ngai tuhin Solomon hnenah kawi tuhin sii i. 25Ciate in lehsawng kawih ten i. Cia lehsawng te khiah sui le ngun thawn bawnhnak thilri, thilthuam, raal thilthuam, masala, siphuh le lakte khiah kum siar in kawih de i.
26Cen Solomon in siphuh leng le siphuhtotu mite khai khawm i. Siphuh leng thawngkhat le zali le siphuhtotu thawng hlainih nai ai, kumpibawi umhmun Jerusalem ah le siphuh leng dah hmun khua caang ah dah i. 27Kumpibawipa in Jerusalem ah ngun khiah lungto bangin zan ruai ai sida thing khiah mualtlang ham ai sikamor zah in tam ruai i.
28Cen Solomon in Izip le Keveh ram ai siphuhte khiah lai i. Kumpibawi dawr bawn sahtute in cia siphuhte khiah Keveh ramah lai i. 29Izip ramai laihnak siphuh leng pakhat man khiah shekel zaruk i. Siphuh pakhat man khai shekel 150 i. Amahte in Hit kumpibawite le Syria kumpibawite hnenah zuar sai i.