1 “I mit in he khiah a veksen in hmu zo ing.
I naa in khai za zo ai ling zo ing.
2 Ning linghnak khai ling ve ing.
Ning hnak in khai tah i nau lo i.
3 Ikhalselai a Cungnung Pathian thawn pong i nuam i.
Pathian hnenah i thu rel i nuam i.
4 Ikhalselai ningte khiah thudon reltute i si.
Ning veksen in zai fai lo sibawite i si.
5 Pong lo niu in um sawn i silai,
mifim ning cang tuh sawn i.
6 I ruathnak khiah i ngai sah tuu-ih.
I kaa ai i kunhnak khiah i ruat sah tuu-ih.
7 Pathian ca in pon sual pong tuh i sim?
Amah ca in thudon rel tuh i sim?
8 Amah khiah hmaisong in thurel sah tuh i sim?
Pathian ca in thu el sah tuh i sim?
9 Amah in ning thu ning zong sah fangin,
ning pha hliang ngai im?
Mite zawl bangin amah khiah zawl ben ngai i sim?
10 A thupniu in mi hmaison in thu rel leisikhaw,
amah in ning hau tuh rori i.
11 Amah sunparhnak in na lau ruai tuh lo im?
Amah khiah kih tuh lo i sim?
12 Ning santehhnak thu khiah laivut bang teng i.
Ning rinsanhnak khiah laisawr bang teng i.
13 Pong awl tu i lai, kai in pong rih ngang.
Ciafangin i vumah a hleng nuamhnak khiah hleng tu seh.
14 Zaimanin kaimah veve khiah a laukul in dah ing?
Zaimanin i nunhnak khiah i kut songah haih ing?
15 Amah in i rek khalselai,
amah khiah sang tuh ngio ing.
I thu khiah a hmai ah rel tuh ing.
16 Amah khiah i o tu tuh i.
Ziangmanti fangin misualte khiah
a hmai ah kawi thill lo i.
17 I ponghnak khiah a kungniu in ngaai tuu-ih.
Ning bil thawn i relhnak khiah ngaai tuu-ih.
18 I thu khiah a khim niu in ralring cia zo ing.
Ciamanin amah in mawh lo i ti in
i luat ruai tuh khiah ling ing.
19 Aisu in mawh i hluk thill tur im?
Cia ilekhaw pong lo niu in um in thi sawn lio ngang.
20 “Aw Pathian, he panih ngawn i pe tu lai
na hmai in thup tuh lo ing:
21 Na kut khiah i hnenin a hla ngai ah thawn tu.
A kihkul nangmah khiah i lau ruai mah.
22 I ko tulai, na awi tuh ing.
Ciahlahle, pong i siang tulai,
nangmah in i sawn tu.
23 I khelhhnak le i sualhnak khiah zaizah i?
I mawhhnak le i sualhnak khiah i ling ruai tu.
24 Zaimanin na hmai khiah thup ai,
kaimah khiah na raal i vuah i si?
25 Hlivua ai lanhnak thinghnah khiah
lau ruai nga sim?
Vaikung ro khiah hnawh nga sim?
26 Ziangmanti fangin a pha lo bik
i thu khiah ngan i si.
I naulai ai i mawhhnakte khiah
ro i co ruai i si.
27 I kete khiah i hen sah i si.
I vakhmun i khung khiah a kungniu in
i cul sah i si.
I kehnia ah hnikhnaihhnak khen i.
28 Minung khiah thil hmon bangin zaan i.
Pelep eihnak angki bang i.