1Ciafangin Samson khai Timnah ah zu ai Timnah ai Filistin te fenu nupang pakhat hmu i. 2Ciamanin ani khai hong ai a paa le a nuu khiah, “Timnah ah Filistin te fenu nupang pakhat hmu ing. Ciamanin i nu tuhin i dong sah tuu-ih.”ti in rel i.3Ciafangin a paa le a nuu in, “Na unaute i hlahle i minungte fenu lakah nupang um lo im? A kontih ai vunpar cem lo Filistin hnenin nu sii i si?” ti in ti i. Ikhalselai Samson in a paa hnenah, “Amah khiah i dong sah tu; ziangmanti fangin amah in lung i khim ruai i.” ti in ti i. 4Ikhalselai a paa le a nuu in, he khiah Bawipa in Filistin te tawng nuam manin bawnhnak i, ti khiah ling lo i. Ziangmanti fangin ciateng in Filistin te in Israel mite khiah uk teng i. 5Ciamanin Samson khai a paa le a nuu kawmin Timnah ah zu ai Timnah capit vuandum ah hleng i. Ciafangin chintit niu pakhat khiah huk kongin a mah khiah tawng tuhin kawi manin ngaihsun ur in um i. 6Ciafangin Bawipa Ciang Rauhla khai thawm lian ngai thawn a vumah hleng ai, Samson in a kut ah zai khai nai napui lo ai, me niu hlaai bangin cia chintit khiah hlaai sio i. Ikhalselai Samson in a bawnhnak khiah a paa le a nuu khiah rel lo i. 7Ciafangin ani khai cia nuu hnenah kawi ai cia nuu in Samson khiah lungkhim ruai ngai i. 8Cia nuu lang tuhin kawi leh fangin, chintit ruang sik tuh in kawi le cia chintit ruang songah khoi le khoitilu um khiah hmu i. 9Samson khai cia khoitilu khiah luak ai ei kong in feh i. A paa le a nuu hnenah hleng fangin, anite khai cia khoitilu khiah pe ai anite in khai ei ve i. Ikhalselai amahte khiah cia khoitilu khiah chintit ruang songai luak hnak i ti in rel lo i.
10Ciamanin a paa khai cia nuu hnenah zu i. Tlangvalte in bawn awng de bangin ciata ah Samson in puai bawn i. 11Amahte in Samson khiah hmu fangin, amah thawn um tuhin amahte rualpui sawmthum kawih i. 12Ciafangin Samson in amahte hnenah, “Thuthuk ngai pakhat ning zawt ngang. A hmanniu in i phi thiam leisikhaw, angki songruk sawmthum le thilthuam sawmthum ning pe tuh ing. 13Ikhalselai i phi thiam hlahle isikhaw, angki songruk sawmthum le thilthuam sawmthum i pe tuh i si.”ti in caai i. Ciafangin anite in, “Kin zak in na thuthuk kin rel tu.” ti in ti i. 14Ciamanin Samson in amahte hnenah, “Eitu pa songin ei tuh suak i. A hat ngai songin a hlum suak i.”ti in rel i. Ni thum songah amahte in cia thuthuk khiah phi ben lo i.
15Ciamanin ni sarih nia fangin, amahte Samson nu hnenah, “Na pa in a thuthuk a phi kin rel tuhin amah khiah sopaw tu. Cia hlalekhaw nangmah le na paa inn khiah mei in ning tai tuh i ing. Kin thil kin long tuhin kin ko i sim? A peu i lo im?” ti in ti i. 16Ciafangin Samson nu in amah hnenah kap ai, “I hua i si! i it lo i si! I mi phunpui tlangvalte hnenah thuthuk zawt ai a phi i rel siang lo i si.” ti in ti i. Ciafangin Samson in a nu hnenah, “Sik tu. I paa le i nuu te khai rel lo ing. Zaimanin na rel tuh ce ing?” ti in ti i. 17Cia nuu khai cia puai ni sarih song kap i. Ni sarih nia fangin a nu in a khengkhebel in rel ruai manin a nu khiah rel i. Ciafangin cia nu in a mi phunpui tlangvalte hnenah rel sai i. 18Ciamanin cia khua mite in ni sarih nia nitla hlanah Samson hnenah, “Khoitilu tah ai hlum sawn zai um i? Chintit hnak in cak sawn zai um i?” ti in sawn i. Ciafang in Samson in amahte hnenah, “I kawlpaw laa thawn hambong tahlah isilai, i thuthuk khiah phi thiam tuh napui lo i si.” ti in ti i.
19Ciafangin Bawipa Ciang Rauhla khai thawm lian ngai thawn amah vumah hleng ai, Samson khai Ashkelon ah zu ai cia khua mi sawmthum khiah rek ai amahte thilthuam khiah lang ai cia thilthuam khiah thuthuk phi thiamtu te khiah pe i. Ciamanin ani khai thinraw rauh ai a paa innah tlung teu i. 20Ciafangin Samson nu khiah Samson rual pha ber hnenah pe sah i.