4Bawite, ning hnenumte khiah a hman le dikcangniu in pe tuu-ih. Ningte in khai vancung ah Bawi nai ve khiah ling tuu-ih. 2Sawngen tu tio ih. Pathian an kongin a ralring in um tuu-ih. 3Khrih thuthup thu khiah taza kin haw thil thai in Pathian in dawng kin hon tuhin saw kin nget tu tio ih. Ciaca in thawngtlahnak tuar ing. 4A ciang ngai ai i pong thiam thai in saw i nget tuu-ih. 5Thusanglote hnenah fimhnak thawn vak tuu-ih. A cu khiah a lovang in bo ruai mah ih. 6Ning pon khiah ci rawihnak bangin a ur ngai in pong tuu-ih. Ciafangin mite khiah kontihin sawn pha khiah ling tuh i si. 7I thu khiah a veksenin Bawipa songah i hnenum pui le a rinsantlak tazahaw saza le i ithnak unau Tykhikhus in ning rel leh tuh i. 8Amah khiah ning thu ling tuhin le thin ning nuam ruai tuhin ning hnenah feh ruai ing. 9Cen ningmah songai a rinsantlak le ithnak unau Onesimus khai amah thawn ning kuat ing. Amahte in heta ai bawnhnak thute ning rel tuh i.
10I thawngtlapui Aristarkhus in hnuk ning sat i. Cen Barnabas tupa Mark in khai hnuk ning sat i. (Amah in thu ning cuk awng i. Ning tlawng lekhaw lo caang tuu-ih). 11Justus ti in khai kohnak Zisu in khai hnuk ning sat i. Hete lek khiah vunparcemte pawl mite i. Amahte in tha i so ruai i. 12Ningmah songai Zisu hnenum Epaphras in hnuk ning sat i. Pathian daihhnak khiah a khimniu le a ciangniu in ning ling thill thai tuhin saw ning nget kong in naper hnelhno i. 13Ziangmanti fangin amah in ningte le Laodicea ai le Hierapolis ai umtute ca in a thukngai in ning ruat sah i ti khiah tettikhan ing. 14Ithnak sibawipa Luke in khai hnuk ning sat i. Demas in khai hnuk ning sat i. 15Laodicea ai ulenaute le Nimpha le a innai pawlte khai lo caang tuu-ih. 16He lai khiah ning siar ben fangin Laodicea pawlte hnenah khai lo siar tu seh. Cen Laodicea ai i lai khai lo siar tuu-ih. 17Arkhippus hnenah, “Bawipa hnenai na ngah hnak naper khiah a ben tian per tuhin lo zuam tu.” ti in rel tuu-ih. 18Kaimah Paul in he lai khiah i kut in ngan ing. I thawngtlahnak khiah i hih sah tuu-ih. Ngaihharhnak khiah ning vumah um tu seh. Amen.