1Ciafangin Israel mite pawlpui khai a veksenin huk in au tlang ai zan khuavar kap tlang i. 2Ciale Israel mite in Moses le Aaron hnenah cam ai pawlpui a veksenin amahte hnenah, “Izip ramah kin thi sawn ta selai! Ihlahle he hmapalakah kin thi sawn ta selai! 3Zaimanin Bawipa in he ramah vangsau thawn kin rek tuhin le kin nu le fate khai rek tuhin kong kin hoi i pa? Izip ramah let leh pha sawn lo im?”ti in ti i. 4Ciamanin anite khai pakhat le pakhat khiah, “Kong kin hoitu tuhin mi pakhat ril nga singkhaw, Izip ramah let leh nga sing.”ti in sawm tlang i. 5Ciafangin Moses le Aaron khai Israel mite pawlpui hmai ah bok i.
6Cen Khanaan ram cul ai feh tu Nun fapa Joshua le Jephunneh fapa Kaleb khai amahte thuam khiah zik ai, 7Israel mite pawlpui hnenah, “Kin culhnak ram khiah ram pha ngai i. 8Bawipa in kin lakah lungkhim lekhaw, he ramah kin fehpui tuhai, ‘cawhnawi le khoitilu luang hmun ram’ khiah kin pe tuh i. 9Bawipa zong tawng mah ih. Cen cia ram ai mite khai kih mah ih. Ziangmanti fangin amahte khiah kin rong i. Amahte khakbertu khiah tlan teu i hang. Bawipa khiah kin hnenah um i. Amahte khiah kih mah ih.”ti in sawm i. 10Ciafangin pawlpuite in amahte khiah lungto in sep tum i. Ciafangin Bawipa thangphathnak khiah Israel mite hmai ah tawkdunhmun tabernacle songin dak i.
11Ciafangin Bawipa in Moses hnenah, “He mite in zaicam tian i hnawl tuh i? Zaicam tian i sang lo in um tuh i? Amahte lakah hnikhnaihhnak a tam ngai bawn zo ing. 12Amahte khiah urhnak thawn seu tuh ing. Amahte in i ro khiah i co sah tuh lo i. Nangmah khiah amahte hnakin mi phun lian sawn le hat sawn in na bawn tuh ing.”ti in rel i.
13Ciafangin Moses in Bawipa hnenah, “Cia ilekhaw Izip mite in na za tuh i khaw. Ziangmanti fangin na huthawm thawn he mite khiah amahte songin suah sah i si. 14Ciafang anite in he ram ai umtu mite khiah rel tuh i. Nangmah Bawipa khiah he mi thawn um ti khiah amahte in zazo i. Cen nangmah Bawipa khiah amahte thawn hmaiton in hmu dun ai amahte vumah mairo khiah kaai ai amahte hmai in sunin mairo songin vakai zan fangin meiko pui songin vak i si ti khiah amahte in zazo i khaw. 15Ciamanin he mite khiah mi pakhat rek bangin rek lesikhaw, na hming thang hnak za tu he mi phunte in, 16‘Bawipa in he minungte khiah a kham hmun ramah hlen ben lo manin nelrawn songah rek sio i pa hlah maw.’ti in na rel tuh i. 7Ciamanin, na kun ing, na relhnak bangin na huthawm khiah lian tu seh. 18Cen ‘Bawipa khiah thinsau ngai le ngaihharhnak thawn dim i. Sualhnak le khelhhnak hlat sah thai tu i. Ikhalselai a mawhtu khiah zah lo ai a paa te sual khiah a fate san thum le san li tian in cawh tuh i.’ti in rel zo i si. 19Ciamanin na kun ing. He mite khiah Izip ramai panin tuntian amahte sual na hlat bangin, a lian ngai na ngaihharhnak bangin he mite sual khai hlat sah tu.”ti in ngen i.
20Ciafang Bawipa in, “Na thu bangin amahte sual khiah hlat sah zo ing. 21Ikhalselai thungai in i nun song hmuahin, laivum pumpalah khiah Bawipa thangphathnak thawn dim tuh i. 22He mite veksen in i thangphathnak le Izip ramah le nelrawn song ai hnikhnaihhnak i bawnhnak khiah hmu napui ai he vel sawmkhat i cu hnelhno ai i aw khai i ngai lo manin 23amahte in a paate hnenah i khamhnak ram khiah hmu tuh lo i. Cen i hnawl tute in khai hmu tuh ve lo i. 24Ikhalselai i hnenum Kaleb tu thinlung dang nai ai a khim niu in i thu i hlun manin, a feh hmun ram ah hlenpui tuh ai a tesin fate in cia ram khiah co ruai tuh ing. 25Ciateng ah Amalek mite le Khanaan mite khiah muallak ai zawllai hmun ramah um i. Thangha ah Ti San Lampui hiang ai nelrawn songah thawn tuu-ih.”ti in rel i.
26Ciafangin Bawipa in Moses hnenah, 27“I lakah cam hnelhno tu he misiava te khiah zaicam or tuh ing? Israel mite in i lakah cam hnelhnohnak khiah zazo ing. 28Amahte hnenah Bawipa in, ‘I nung song hmuah in i zak ai ning ponghnak bangin ning bawt tuhing. 29I lakai a cam tu kum kul le kum kul tan vum te a veksenin pum ning siar zah in he nelrawn songah ning thi ruai tuh sek ing. 30Jephunneh fapa Kaleb le Nun fapa Joshua siar lo ningte aisu in khai ning hnenai i khamhnak ramah lut tuh hrimhrim lo i si. 31Ikhalselai ‘kin fate khai kin rek sah tuh i.’ ti ai ning tihnak ning fate zong cia ramah fehpui tuh ing. Ning ai zauh ning suamhnak ram khiah amahte in co tuh i. 32Ikhalselai ningte tu nelrawn songah ning thi tuh i. 33Ning fate khiah kum sawmli song nelrawn songah kawlpaw khal in um tuhai nelrawn songah ning thi sio hlan lo ning hlotlau manin cawhkuan phur tuh i si. 34Cia ram ning culhnak ni sawmli zah in ni khat ca in kum khat tuar in kum sawmli song tuar tuh i si. Ciafangin i elhnak khiah ling tuh i si. 35He khiah kaimah Bawipa in rel ing: I tawng tuhai hmunkhat ai taitu he a siava pawlpui veksen lakah he a veksen in bawn tuh ing. He nelrawn songah amahte khiah ur tuhai thi tuh i.’ti in rel tu.”ti in ruai i. 36Moses in ram cul tuhai hlat ai cia ram thu khiah a pha lo in report pe manin pawlpuite in Moses lakah cam ruai ai 37cia ram a pha lo ai report tute khiah Bawipa hmai ah ur ai thi sek i. 38Ikhalselai cia ram cul tuhai feh tute lakai Nun fapa Joshua le Jephunneh fapa Kaleb tu thi lo in nung hlen i.
39Ciafangin Moses in he thu hmuah khiah Israel mite hnenah rel ai, anite khai a rauhngai in lungsia in kap i. 40Anite khai zingniu in tho ai mualtlang vumah hongai, “Bawipa in kin khamhnak ramah feh tuhin heta ah um i ing. Ziangmanti fangin kin sual zo i.”ti in ti i. 41Ciafangin Moses in, “Zaiman in Bawipa ruaihnak lakah sual i si? Ziangmanti fangin he khiah cang thill tuh lo i. 42Ciamanin feh mah ih. Ning raalte in ning neh tuh i. Ziangmanti fangin Bawipa khiah ning lakah um lo i hang. 43Ziangmanti fangin Amalek mite le Khanaan mite khiah ning hmai ah um ai vangsau thawnn ning rek tuh i. Ningmah in Bawipa hmun in let manin Bawipa khiah ning hmun ah um lo i.”ti in rel i. 44Ikhalselai anite khai mual vumah hong tekto i. Ikhalselai Bawipa thukham hnak thingkuang le Moses tu camp songin suak lo i. 45Ciafangin cia mualtlang vumai umtu Amalek te le Khanaan mite khai zu le amahte khiah tawng ai Hormah tian hnawt berh i.