Upadi dan cuktu sazate le Farasite khiah hau i (Mark 12:38-40; Luke 11:37-52; 20:45-47)
1Ciafangin Zisu in miburpui le a hnuahlunte hnenah, 2“Upadi Dan cuktu sazate le Farasite khiah Moses tohmun ah to i. 3Ciamanin amahte ai ning ruaihnak khiah hlun in per tuu-ih. Ikhalselai amahte naper khiah cung mah ih. Ziangmanti fangin amahte in rel napui ai amahte relhnak bangin bawn lo i. 4Ziangmanti fangin amahte in mi ai phur tuhin rimsu kul thil rit ngai khiah minungte kodar ah phurh ai amahte in tu a kut zungnge rin in khing nuam lo i. 5Ikhalselai amahte naperhnak hmuah khiah minungte ai hmu tuh ian ai per i. Amahte in Lai cianghlim phurhnak thingkuang cikniu niu khiah a lian rauh in bawn ai amahte pon par khiah a lian ngai in bawn i. 6Puai hmunah a upaber tauhhmun daih ai sanginn songah a saangber tauhkheng ah to nuam i. 7Dawrhmun ah mi khiah ponhlum thawn pon ai, Rabbi, Rabbi, ti in ko daih i. 8Ikhalselai aisu in khai Rabbi ti in ning ko ma seh. Pakhat lek khiah ning saza i ai cia pa khiah Khrih i. Ning veksen in ulenau tlang i si. 9Cen he laivum ah aisu khai i paa ti in ko mah ih. Ziangmanti fangin pakhat lek khiah ning Pa i ai vancung ah um i. 10Aisu in khai ningte khiah sazate ti in ning ko ma seh. Ziangmanti fangin pakhat lek khiah ning saza i cia pa khiah Khrih i. 11Ikhalselai ning lakai a lianber khiah ning hnenum cang tuh i. 12Amah veve do tu hnelhno khiah niam ruai tuh ai, amah veve niam ruaitu khiah do tuh i. 13Ikhalselai harsahnak ning vumah hleng tu selaw, upadi dan cuktu sazate le Farasite, mi hrokhrawlte! ziangmanti fangin vancung ukhnak khiah mite hmunin dawngkham khaam lio i si. Ningmah le lut hlong lailo cia a lut tumtu te le lut siang lo i si. 14Harsahnak khiah ning vumah hleng tu selaw, upadi dan cuktu sazate le Farasite, mi hrokhrawlte! ziangmanti fangin hmaitongte inn khai rok ai kaphahnak in a raingai sawngen khel i si. Ciamanin a rauh hngehnge in cawhkuan ngah tuh i si. 15Harhnak khiah ning vumah hleng tu selaw, upadi dan cuktu sazate le Farasite, mi hrokhrawl pawl! ziangmanti fangin mi pakhat khiah Judah dan cang ruai tuhin tipui le laipua vumin feh i si. Cia pa khiah Judah dan cang fangin, ning tah in a let nihin amah khiah hell ram fa cang ruai i si. 16Rimsuhnak ning hleng tu selaw, mitcaw konghoitute, ‘Temple hming in thukham dun heh zaikhai i hang lo i. Ikhalselai temple songai sui hming in thukham tu pa in a thukhamhnak bangin bawn kul i.’ ti in ti i si. 17Mivoi le mitcawte, Sui maw sui khiah a cianghlim ruaitu temple khiah thupui sawn i? 18Cen, ‘A hludah hmun awlta cabuai hming ai thukham dun heh zaikhai i hang lo i. Ikhalselai cia awlta cabuai vumai a hlu hming in thukham dun tu in a thukhamhnak bangin bawn kul i.’ti in ti i si. 19Mivoi le mitcawte, A hlu maw a hlu cianghlim ruaitu awlta cabuai khiah thupui sawn i? 20Ciamanin awlta cabuai hming in thukham tu in, awlta cabuai le a vumai thil hmuah thawn thukham i. 21Ciabang in temple hming in thukham tu in, temple le temple songai umtu hming thawn thukham i. 22Cen vancung hming ai thukham tu in Pathian tohmun kumpibawi tauhkheng le cia tauhkheng vumai to tu pa hming in thukham i. 23Rimsuhnak ning vumah hleng tu selai, upadi dan cuktu sazate le Farasite, mi hrokhrawlte! khahsuat, nanan le phaksi te bang khiah hmunha khan hmunkhat hlu i si. Inapui ai a thupui sawn upadi dan le thukhanhnak le ninghiohnak le a kungniu ai um dan te bang tu zainam lo i si. Cia a cikniu te lek hlu lo in a thupui sawnte khiah bawn tuu-ih. 24Mitcaw konghoite, thosem niu khiah khai hnelhno ai kala-uk sawntu lem vung i si. 25Rimsuhnak ning vumah hleng tu selaw, upadi dan cuktu sazate le Farasite, mi hrokhrawlte! khuat le pakan a pualam tu ciang ruai hnelhno i si. Ikhalselai a songlam ah tu pamhaphnak le mah phathnak lek ruathnak thawnin dim i. 26Farasi mitcawpa, khuat song le pakan song khiah ciang ruai hmasa tulai ciafangin a pualam khai ciang tuh ve i. 27Rimsuhnak ning vumah hleng tu selaw, upadi dan cuktu sazate le Farasite, mi hrokhrawlte! ziangmanti fangin ningte khiah a ngo liang ai mathnak mithi hlan bang i si. Cia mithi hlan khiah a pua in tu mawi ngai napui ai a songah tu mithi ruh le a rim hmuahhmuah thawn dim i. 28Ciabang in ningte khai ning pua lamin tu mi hmai ah dikcang ngai in ning lar i. Ikhalselai ning songlam ah tu hrokhrawlhnak le sualhnak thawn in dim i. 29Rimsuhnak khiah ning vumah hleng tu selaw, upadi dan cuktu sazate le Farasite, mi hrokhrawlte! prawfette hlan khiah sak ai mi dikcangte hlan khiah par i si. 30Cia, ‘Kin paate sanah um ta inglai, amahte thawn prawfette thi khiah luang ruai bawm tuh napui lo i ing.’ ti in ti i si. 31Ciamanin ning mahte khiah profette rektu fate ti in ningmah veve tetti khan i si. 32Ciamanin ning paate ai tehhnak khiah dim ruai tuu-ih. 33Rulpui, a ru nai rul phun pawl, a kontihin hell cawhkuan khiah khel thill tuh i si.? 34Ciamanin ning hnenah prawfette le mifimte le upadi dan uktu sazate khiah ning kuat ing. A hrekkhatte khiah rek tuh ai thinglamteh in tar tuh i si. A hrekkhatte khiah ning sanginn songah vit tuh ai khua khat hnua khua khat ah rek tuh i si. 35Ciamanin laivum ah luangruaihnak dikcang mite thi khiah a dikcang Abel thi ai panin temple le a hlu dah hmun awlta cabuai laklawh ai ning rekhnak Berekhai-ah fapa Zekharai-ah thi tianin ning vumah hleng tuh i. 36Thungai in ning rel ing, Hete hmuah khiah he sanah khim tuh liang i.
Jerusalem ca in Zisu kap i (Luke 13:34-35)
37“Aw Jerusalem, Jerusalem, prawfette rektu le na hnenah hlat hnakte lungto thawn rektu, arpui in a fate khiah a ko hnia ah khawm bangin na fate khiah vel zaizah khawm i nuam napui de i; cianapui ai na nuam lo i! 38Siktu hang, na inn khiah zaikhai bek lo in na hlum sah lio i hang. 39Ziangmanti fangin ning rel ing, ‘Bawipa hming in a hleng tu pa khiah hmuifu i.’ ti in na ti hlan lo, tunai panin i hmu tuh lo i hang i si.” ti in ti i.