Sabbath nia Zisu in mi pakhat cakruai i
(Matt. 12:9-14; Luike 6:6-11)
3Ciafangin Zisu khai sanginn songah lut leh thio i. Cia sanginn songah a kut ro lio ai naitu mi pakhat lo um i. 2Zisu in cia pa khiah sabbath nia ah cakruai na ngai maw ti in amahte in cul i. Ziangmanti fangin amahte in Zisu khiah mawhhluk nuam i. 3Ciafangin kut ro lio naitu pa hnen ah, “Ding tu.” ti in ruai ai 4Amahte hnenah, “Sabbath nia ah na pha per maw a pha lo naper dan i? Nunhnak o maw nuhnak rek khiah pha sawn i?” ti in zawt i. Ikhalselai amahte in sawn lo i. 5Ciafangin Zisu khai thinraw kongin a hiang cingkim sik ai, amahte thin ruh manin Zisu khai lungsia ai, cia pa hnenah, “Na kut pharh tu.” ti in ruai i. Cia pa in a kut pharh ai a kut khiah a khatta lam bangin cakruai i. 6Farasite khai feh ai, Herod minungte thawn Zisu rekhnak tuh thu khiah sawm tlaang i.
Tipui hiang ah mirunpui in hlun i
7Zisu khai a hnuahlunte kawmin tipui hmun lamah feh ai, Galilee ram le Judea ram le, 8Jerusalem khua le Idumea ram le Jordan run ralkhat ai miburpui in amah khiah hlun i. Tyre le Sidon khua ai miburpui in khai a bawnhnak hmuahhmuah za manin, a hnenah kawi i. 9Miburpui in amah khiah tet mawh ngai ti in Zisu in a hnuahlunte khiah amah ca tuhin khawm niu pakhat ralring in dah tuhin ruai i. 10Ziangmanti fangin Zisu in mi tamngai cakruai manin mi ur hmuahhmuah in amah khing tuhin nem tlaang i. 11A cianglo rauhlate in Zisu hmu fangin a hmai ah bok ai, “Nangmah khiah Pathian Fapa i si.” ti in au i. 12Ciafangin Zisu in amahte hnenah, “I thu khiah aisu khai rel mah ih.” ti in kham vut i.
Zisu in a hnuahlun hlainih ril i
(Matt. 10:1-4; Luke 6:12-16)
13Ani khai mual vumah hong ai, a hnenah a daihhnakte khiah ko ai ciate khai a hnenah kawi i. 14Ciafangin Zisu in minung hlainih khiah amah thawnin a catlo in um tuhin le amahte khiah tazahaw tuhin hlat tuhin le 15Urhnakte cakruai hnak tuh le khuavangte hnawthnak tuh power nai tuhin cia hlainihte khiah dah i: 16Cia hlainih te khiah, Peter ti in amah in hming pehnak Simon le, 17Zebedee fapa James le a nau John: ciate khiah Boanerges ti in hming pe ai cia khiah khuari fate ti ca i. 18Andrew le Filip le Batholomew le Matthew le Thomas le Alphaeus fapa James le Thaddaeus le Khanaan mi Simon 1e 19A zuartu Judas Iskariat i. Ciafangin anite khai inn songah lut i.
Zisu le Beelzebub
20Miburpui khiah hmunkhat in hleng leh thio manin amahte in rong peu khai ei thill lo i. 21Zisu rualpuite in cia thu khiah za fangin amah khiah pom tuhin suak i. Ziangmanti fangin amahte in, “Amah khiah a am i.” ti in ti i. 22Jerusalem ai hlengtu upadi dan cuktu sazate in, “Amah in Beelzebub nai ai khuavangte bawi power thawn khuavangte khiah hnawt i.” ti in ti i. 23Ciafangin Zisu in amahte khiah a hnenah ko ai, santehhnak thawn, “A kontihin Satan in Satan khiah hnawt tuh i? 24Kumpibawi ukhnak minungte in amahte veve khiah tawng in khan lekhaw, cia ukhnak khiah kho thill tuh lo i. 25Cen innkua khat khiah tawng in khan lekhaw cia innkua khiah kho thill tuh lo i. 26Cen Satan khai amah le amah tawng in khan lekhaw , amah khiah kho tuh lo ai cimpil tuh i. 27Thahat ngai pa khiah pen hmasa lo in aisu in khai a inn songah lut sah in a thilri khiah roksah thill tuh lo i. Amah khiah pen hmasa fang ian in a inn khiah roksah thill tuh i. 28Thungai in ning rel ing, Minungte khiah amahte sualhnak hmuahhmuah le Pathian zauhsuam ai ponghnak hmuahhmuah sualhlat sah tuh i. 29Ikhalselai Ciang Rauhla zauhsuam ai pongtu pa khiah zaikomin khai sualhlat sah tuh lo ai kumzangza cawhhnak ngah tuh khiah laukul i.” ti in rel i. 30Ziangmanti fangin amahte in, “Amah in a cianglo rauhla nai i.” ti in ti i.
Zisu nuu le a Unaute
(Mate 12:46-50; Luke 8:19-21)
31Ciafangin a nuu le a naute khiah hleng ai sumpua ah ding ai amah ko tuhin minung hlat i. 32Ciateng in miburpui khai a hiang cingkim ah to ai amahte in Zisu hnenah, “Na nuu le na naute khiah sumpua ah um ai na sii i.” ti in rel i. 33Ciafangin Zisu in, “I nuu le i naute khiah aisu te i?” ti in zawt i. 34Ani khai a hiang ai to tute khiah sik ai, “Sik tuu-ih, i nuu le i unaute! 35 Ziangmanti fangin Pathian daihhnak bawntute khiah i nuu le i naute le i farnute i.” ti in ti i.