Tinim tu John Tazahawhnak (Matt. 3:1-12; Luke 3:1-9; 15-17; John 1:19-28)
1Pathian Fapa Zisu Khrih kawspal thupha hampanhnak khiah 2Prawfet Isaiah ai ngan ciahnak:
“Sik tuu-ih. Na lamupi seltu tuhin na hmai ah ii nalaang khiah hlat zo ing. 3 Bawipa lamupi kiah sel tuu-ih. 4 A khung khiah cang ruai tuu-ih.’ ti in hampalak in sap i.” ti ai nganhnak bangin pan i.
4Ziangmanti fangin tinimtu John khiah hampalak in hleng ai, “Ning thinlung khiah sir ben fangin ti ning nim tuh ing. Ciafangin Pathian in ning sualhnak khiah ning hlat sah zo i ti larruai i.” ti in tazahaw i. 5Ciafangin a hnenah Judea ram le Jerusalem khua ai minung hmuahhmuah khiah kawi ai amahte in amahte sualhnak khiah phuang ben fangin John in Jordan run songah tinim i. 6John in kala-uk hmul sil ai, a el ah savun elpen pen ai, khokhuak sa le hampalak ai khoitilu ei i. 7Ciafangin John in, “I hnua in kaimah hnak in upa sawn pa hleng tuh i. Kaimah in ut in a kedawl ri hawk sah tuh rin i tlak lo i. 8Ningte khiah ti thawn ti ning nim ing. Ikhalselai cia pa in Ciang Rauhla thawn ti ning nim tuh i.” ti in rel kongin tazahaw i.
Zisu khiah tinim i (Matt. 3:13-17; Luke 21-22)
9Ciafangin Zisu khai Galilee ramai Nazareth khua in hleng ai Jordan run songah John in amah khiah tinim i. 10Zisu khai ti songin a suak sawng fangin, vancung khiah hong ai Ciang Rauhla khiah khuro bangin a vumah tolh khiah Zisu in hmu i. 11Ciafang in vancung in aw pakhat in, “Nangmah khiah i ithnak i Fapa i si. Nangmah lakah lung i khim ngai i.” ti in ti i.
Zisu khiah Satan in sualso i (Mate 4:1-11; Luke 4:1-13)
12Ciasawng fangin Ciang Rauhla in Zisu khiah hampalak ah feh ruai i. 13Amah khiah hampalakah ni sawmli song Satan in sualso i. Amah khiah ramsate thawn in um tlang ai, vancung mite in amah khiah tuamhlawm i.
Zisu in Ngadawitu palite ko i (Matt 4:17-22; Luke 5:1-11)
14John khiah thawnghla fangin, Zisu khai Pathian ukhnak kawspal thupha tazahaw kongin Galilee ramah hleng ai, 15“A cuu khiah khim zo i hang. Pathian ukhnak khiah a nongniu ah i hang. Ciamanin ning sualhnak sir tu i lai kawspal thupha sang tuu-ih,” ti in ti i. 16Galilee tipui hiang ah Zisu vak teng fangin, Simon le a nau Andrew khiah sur vorh hnelhno in hmu i. Cia unaute khiah ngadawi ai amahte pum cawmtute i. 17Ciafangin Zisu in amahte hnenah, “I hlun tu i lai, minungte pom tu in ning bawn tuh ing.” ti in ti i. 18Ciasawng fangin anite khai a sur khiah hlum ai Zisu khiah hlun i. 19Zisu khai ciata in a hla thah ah feh leh thio ai Zebedee fapa James le a nau John khiah khawm songah sur thawlh hnelhno in hmu i. 20Ciafangin amah in amahte khiah ko vut ai anite in khai a paa Zebedee khiah kulite thawnin khawm songah hlumai Zisu hlun i.
A cianglo Rauhla naitu mi pakhat (Luke 4:31-37)
21Anite khai Kapernaum khua ah feh i. Ciafangin ani khai sabbath nia ah sanginn songah lut ai thucuk i. 22Ciafangin amahte khiah ngaihsun ur ngai i. Ziangmanti fangin amah in upadi dan cuktu sazate bangin cuk lo ai thunai tupa bangin cuk i. 23Ciafangin amahte sanginn songah a cianglo rauhla naitu pakhat umai, 24“Nazareth khua ai Zisu, kin thawn in bawn tuhhnak ziang nai i si? Kin hnawmcan tuhin kawi i hang sim? Aisu i si ti khiah na ling ing. Nangmah khiah Pathian ai a Cianghlim pa i si.” ti in au i. 25Ikhalselai Zisu in amah khiah, “Pong tam mah. Amah songin suak tu.” ti in hau i. 26Ciafangin a cianglo rauhla khai cia pa khiah thing ben fangin aw cawm ngai thawnin au ai a songin suak i. 27Ciafangin a veksenin ngaihsun ur ai, “He khiah ziang i pa? Zai thu thar i pa? Ziangmanti fangin amah in huthawm thawnin a cianglo rauhlate rin thu pe ai amahte in a thungai i.” ti in amahte tlaangtlaang rel i. 28Camkhat in a hming khiah Galilee ram hiang cingkim hmuah ah thang i.
Zisu in a urte cakruai i (Matt. 8:14-17; Luke 4:38-41)
29Ciafangin anite khai sanginn songin suak ai, James le John kawmin Simon le Andrew te inn ah lut i. 30Simon nu ai nuu khiah a hlawng in taal ai, cia nuu thu khiah amahte in Zisu rel i. 31Ciafangin Zisu khai kawi ai cia nuu khiah a kut in lang ai daang ai, cia nuu khai cak vut i. Ciafangin cia nuu in amahte khiah rongdo i. 32Cia nia zanlam nitla fangin amahte in Zisu hnenah a urte hmuahhmuah le khuavang naite khiah kawih i. 33Khua sen in hmunkhat in dawngkham ah taai tlang i. 34Urhnak phun cang thawn ai ur tu mi tamngai khiah amah in cakruai ai, khuavang tamngai khai hnawt i. Amah in khuavangte khiah pong siang lo i. Ziangmanti fangin amahte in Zisu khiah ling i.
35A thangha zing varciang hlan pui in, Zisu khai tho ai, mi um lo hmun ah feh ai ciata ah sawngen i. 36Ciafangin Simon le amah thawn ai umtute in Zisu khiah a hnua in hlun ai 37Zisu khiah tawk fangin, “Mi hmuah in na sii i.” ti in rel i. 38Ciafangin Zisu in, “Tazahaw thill leh thio hnak tuhin khua dang ah khai feh nga sing. Ziangmanti fangin cia ca ai heta ah hleng ing.” ti in ti i. 39Ani khai Galilee ram pumpalah ah feh ai amahte sanginn songah tazahaw ai khuavangte khiah hnawt i.
Zisu in miphaar pa ciangruai i (Matt 8:1-4; Luke 5:12-16)
40Ciafangin miphaar pakhat khiah a hnenah kawi ai, khuk caicin ben fangin, “Na nuam lekhaw i ciangruai thill i si.” ti in ngen i. 41Zisu in cia pa khiah ninghio ai a kut suah ai miphaar pa khiah tok ai, “I nuam i. Na ciang tu seh.” ti in ti i. 42Ciasawng fangin miphaar pa khai ciang lio i. 43Ciafangin Zisu in amah khiah a thupui in thupe ai amah khiah feh ruai ai, 44“Aisu hnenah khai zaikhai rel tuh lo khiah ralring tu. Ikhalselai feh tulai, na pumpui khiah phungki hmuh tu. Amahte hnenah tetti khanhnak tuhin Moses ai ruaihnakte khiah na ciangruai manin a hlu lo pe tu.” ti in ti i. 45Ikhalselai miphaar pa khai feh ai cia thu khiah nuamthaih in rel ai cia thu khiah nuamthaih in zaih i. Ciamanin Zisu khiah a laar ngai in khua songah lut thill lo i. Ciamanin ani khai hampalakah um ai a hnenah minungte khiah nuamhmun caang in kawi i.