Ngaihsunurkul a hmasaber bawnhnak
2 Ni thum nia fangin Galilee ram ai Kana khua ah mohoi puai um ai Zisu nuu khai ciata ah lo um i. 2Cia mohoi puai ah Zisu le a hnuahlunte khai ko i. 3Amahte in capittizu sam fangin, Zisu nuu in Zisu hnenah, “Amahte in capittizu nai lo i hang.” ti in rel i. 4Zisu in amah hnenah, “Nupui nuu, nang thawn bawn tuhhnak zai nai ing? I cuu khim lai lo i.” ti in sawn i. 5Zisu nuu in hnenumte hnenah, “Zaizongza amah in ning relhnak bangin bawn tuu-ih.” ti in rel i. 6Ciata ah lungto ti bel paruk um ai cia bel pakhat khiah Judah dan bang in somhnak tuhin ti kalan kul in sawmthum tha va i. 7Zisu in amahte hnenah, “Tibel khiah ti thawn thun tuu-ih.” ti in ruai i. Amahte in tibel khiah a dim pek in thun i. 8Ciafangin Zisu in amahte hnenah, “Tibel songai ti khiah lang tu i lai mohoi puai uktu pa hnenah pe tuu-ih.” ti in ruai i. Anite khai puai uktu pa pe i. 9Puai uktu pa in capittizu ai canghnak ti khiah cang ai konin hleng i ti khai ling lo i. Ikhalselai ti raaltu hnenumte in a konin hleng i ti khiah ling i. Ciafangin puai uktu pa in mohoi tlangval pa ko ai, 10Amah hnenah, “Mi dangte tu capittizu ur ber khiah puai pan ngom fangin suah ai, mite capittizu in ri liang lo fangin, a ur deuh lo capittizu khiah pe i. Ikhalselai nang tu capittizu ur khiah tuntian in nai ngio i lai si.” ti in ti i. 11Zisu in he ngaihsunurkulte a hmasaber khiah Galilee ram Kana khua ah bawn ai amah thangphathnak khiah laarruai ai a hnuahlunte in amah khiah sang i. 12Ciahnua fangin ani khai Kapernaum ah zu ai amah le a nuu le a naute kawmin feh ai ciata ah ni tamngai um i.
Zisu khiah Temple ah kawi i
(Matt. 21:12-13; Mark 11:15-18; Luke 19:45-46)
13Judahte passover khelhnak puai khiah nong manin Zisu khai Jerusalem ah feh i. 14Temple songah kawlpaw le tu le khuro te zuartute le paisa thleng tute to in hmu i. 15Ani khai rihual hual ben fangin amahte khiah a tu le kawlpaw te kawmin temple song in hnawt ai paisa thleng tute paisa khai lai sah berh ai cabuaite khai bungbaleh in dah ben fangin, 16Khurote zuartute hnenah, “Tunin hete lang tu i lai i Pa inn khiah dawr inn in can mah ih.” ti in rel i. 16Ciafangin a hnuahlunte in, “Na inn a thupui ze in ruat manin i hnophnak cang tuh i.” ti ai ngan awnghnak hih i. 18Ciafangin Judah mite in amah khiah sawn ai, “Hete na bawnhnak khiah aisu thu in bawn i si ti laarhnak tuhin zai hnikhnaihhnak kin hmuh thill tuh i si?” ti in zawt i. 19Zisu in amahte khiah sawn ai, “He temple khiah bal tu lio i lai ni thum songin sa ben tuh ing.” ti in ti i. 20Ciafang Judah mite in, “He temple sahnak khiah kum sawmli le kum ruk rai i khaw, nang in ni thum song in sa ben tuh i sim?” ti in ti i. 21Ikhalselai Zisu in a ruang pumpui khiah temple thawn santeh ai relhnak i. 22Ciamanin Zisu tholeh fangin a hnuahlunte in Zisu in amahte hnenah he thu rel awng khiah hih manin Lai Cianghlim le Zisu ai relhnak thu khiah sang i. 23Zisu khiah passover khelhnak puai nia ah Jerusalem ah um fangin ngaihsun urkul a bawnhnak manin mi tamngai in a hming sang i. 24Ikhalselai Zisu in amah veve khiah amahte hnenah ap nuam lo i. Ziangmanti fangin amah in mi veksen khiah ling liang i. 25Cen aisu in khai minung te thu khiah Zisu hnenah tetti khan kul lo i. Ziangmanti fangin Zisu in minungte ruathnak khiah ling liang i.